Міжнародная валянтэрская супольнасьць InformNapalm працягвае дасьледаваньні вайсковых злачынстваў Расейскай Фэдэрацыі праз спадарожнікавыя здымкі, даступныя ў сэрвісе Google Earth.

У адным з папярэдніх расьледаваньняў «Google Earth раскрывае сакрэты трафейнай тэхнікі тэрарыстаў» былі пададзеныя факты транспартаваньня тэхнікі з тэрыторыі РФ праз некантраляваныя дзялянкі ўкраінскае мяжы ў зоне баявых дзеяньняў.

У чарговым расьледаваньні InformNapalm зьдзейсьніў ідэнтыфікацыю гарматаў, напрамку іхнае  стральбы, маршрутаў  падвозу боепрыпасаў і сьлядоў, пакінутых у выніку абстрэлаў. Вайсковыя злачынствы ня маюць тэрміну даўніны, таму мы прааналізуем спадарожнікавыя здымкі памежнае тэрыторыі за верасень-кастрычнік 2014 году, якія захоўваюць мноства цікавых падрабязнасьцяў абстрэлаў з тэрыторыі РФ раёну населеных пунктаў Марынаўка, Першамайскі, Сьцяпанаўка і іншых ў жніўні 2014 году.

Цікава, што менавіта гэтыя населеныя пункты фігуруюць у зводах тэрарыстаў і расейскіх прапагандыстаў. Напрыклад у публікацыі з цынічным назовам: «Храналёія грамадзянскай вайны ва Украіне за 15 жніўня 2014», апублікаванай на расейскім рэсурсе Ruspravda.info паведамляецца (пакідаем у арыгінале):

«Подразделениями Национальной гвардии при поддержки танков осуществлялись неоднократные атаки на населенные пункты Мариновка, Степановка, Первомайский. В ходе упорных боев противник, обладающий значительно превосходящими силами, был отброшен на ранее занимаемые позиции. Решительные контратаки ополченцев позволили нанести противнику значительные потери в личном составе и материальных средствах».

Якія ж сілы былі прыцягнутыя да апэрацыяў у жніўні 2014 г. можна даведацца з аналізу спадарожнікавых здымкаў. Здымкі Google Earth сьведчаць не пра грамадзянскае, але менавіта пра вайсковае супрацьстаяньне і агрэсію суседняе дзяржавы супроць Украіны.

Скрыншот спадарожнікавага здымка з 14.09.2014 г. У ім зафіксаваная гаўбічная батарэя з 6 гарматаў (два вагнявых узводы), мейсца раскладкі БК, грузавікі і намёт. Мейсцазнаходжаньне на ўсход ад хутару Прыміускі Куйбышаўскага раёна Растоўскае вобласьці. Зялёным колерам пазначаныя каардынаты й дата. Праз тое, што ствол гарматы на здымку мае такую ж даўжыню, што і грузавік, можна зрабіць здагадку, што на здымку зафіксаваная 152-мм гаўбіца 2А65 Мста-Б. Даўжыня ствалу гарматы – 7200 мм, для параўнаньня даўжыня грузавіка Урал-4320 – 7366 мм,  КамАЗ-5350 – 7960мм. 122-мм гаўбіцы Д-30 мае ствол, даўжыня якога – 4660 мм, таму на здымку ён выглядаў бы менш за грузавік.

Крыху на захад ад гэтых гарматаў знаходзяцца старыя пазыцыі стральбы. Цікава, што яны таксама зафіксаваныя ў ранейшым здымку, зробленым 04.09.2014 г. Можна выразна пабачыць, што працавалі толькі пяць гарматаў.

Зараз давайце пагледзім наступны здымак у гісторыі, які датуецца 06.10.2014 г., і ў якім зафіксаваныя сьляды апаленае й вытаптанае зямлі ў мейсцах усталяваньня гарматаў (upd: нашыя чытачы дапамаглі выначыць, што вялікія чорныя плямы на здымку, гэта сьляды стральбы з сыстэмаў залпавага вагню, якія зьдзяйсьнялі ўдары з тае ж пазыцыі, напрамак стральбы ня вызначаны).

Паводле напрамку ствалу аднае з гарматаў правядзем дзьве лініі. Зялёная мае даўжыню 6400 мэтраў і ёсьць мёртвай зонай, то бок мінімальная дыстанцыя стральбы поўным зарадам. Чырвоная лінія – гэта зона паражэньня ад 6400 да 24700 мэтраў. Далей адзначым на мапе маркерамі варонкі ад абстрэлаў ля самай чырвонай лініі. Вось што атрымалася:

Ніжэй скрыншоты спадарожнікавых здымкаў мейсцаў артудараў:

Праз тое, што варонкі ад снарадаў у мейсцах, пазначаных маркерамі, можна пабачыць на здымках  з 15.08.2014 г. і пасунутыя леваруч ад лініі прыцэльваньня, таксама, як і старая пазыцыя батарэі, можна выказаць здагадку, што ўдары зьдзяйсьняліся яшчэ з старой пазыцыі. Падчас выкарыстаньня артылерыі важным фактарам зьяўляецца падвоз боепрыпасаў. На скрыншотах ніжэй адзначаны маршрут падвозу й склад.

Такім чынам, рыторыка расейскае прапаганды пра «перамогі арміі наваросіі» і «грамадзянскую вайну ва Украіне» зьяўляецца цынічным прыкрыцьцём сапраўднай агрэсіі Расейскай Фэдэрацыі, падчас якой выкарыстоўваюцца ня толькі гібрыдныя мэтоды паставак узбраеньня, тэхнікі і жывой сілы наймітаў , кадравых расейскіх вайскоўцаў, але й абстрэлы ўкраінскіх сілавікоў з-за “парэбрыка” (з тэрыторыі Расейскай Фэдэрацыі).

Нагадаем, што азнаёміцца ​​з факталягічнай доказавай базай дадзеных расьледаваньняў InformNapalm што да ўдзелу ў баявых дзеяньнях ва Украіне больш чымся 60 вайсковых падразьдзяленьняў ЗС РФ можна праз спасылку http://bit.ly/RussianPresence.

Матар’ял да публікацыі падрыхтаваў валянтэр міжнароднае супольнасьці InformNapalm Міхаіл Кузьняцоў.

На беларускую мову пераклаў Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Мы заклікаем чытачоў актыўна пашыраць нашыя публікацыі ў сацыяльных сетках. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём. Разам пераможам!