Жудасны тэракт, які адбыўся ўвечары 14 ліпеня 2016 году ў французскім горадзе Ніца, ускалыхнуў сусьветную супольнасьць. Падчас сьвяткаваньня Дня ўзяцьця Бастыліі, або як яго называюць самі французы “Нацыянальнага Сьвята”, кіроўца грузавіку на вялікай хуткасьці пратараніў натоўп людзей на ўзьбярэжнай. Паводле папярэдніх дадзеных загінулі 84 чалавекі, у тым ліку 10 дзяцей. Параненыя ля 100 чалавек, зь іх 18 знаходзяцца ў крытычным стане.

У СМІ ўжо зьявілася інфармацыя, што адказнасьць за тэракты ўзяла на сябе тэрарыстычная арганізацыя ІДІЛ. Пра сувязь гэтай структуры і расейскіх спэцслужбаў ужо неаднаразова зазначалі экспэрты, але гаворка мае йсьці не пра здагадкі, а пра факты.

Чытайце таксама: Расея – спонсар міжнароднага тэрарызму: ад ІДІЛ да Л/ДНР

Памятаеце, як злацешыліся расейскія чыноўнікі з нагоды папярэдніх тэрактаў у Брусэлі? Але гэта было толькі вяршыняю айсбэрга. Сваю порцыю нэгатыву з гэтай нагоды тады пасьпела выказаць і марыянэткавае «міністэрства замежных справаў ДНР».

На ангельскамоўнай вэрсіі афіцыйнага сайту так званага «міністэрства замежных справаў» тэрарыстычнай арганізацыі «Данецкая народная рэспубліка» былі выяўленыя заявы, зробленыя 23 сакавіка 2016 г., у якіх ва ўльтыматыўнай форме выказаныя прэтэнзіі да ЭЗ і ЗША празь непрызнаньне тэрарыстычнага анклаву ў якасьці асобнай рэспублікі, і ў якіх тэракты ў Брусэлі названыя “актам помсты”.

Тэкст заявы, апублікаваны на афіцыйным сайце «МЗС ДНР» (спасылка, архіў):

На жаль, расейскамоўную вэрсію гэтай заявы знайсьці не ўдалося, магчыма, яна была зьнішчаная маскоўскімі куратарамі рэсурсу пасьля значнага рэзанансу падзеі, але засталася ў ангельскамоўным сэгмэнце сайту.

Вядома, што афіцыйны сайт «МЗС ДНР» знаходзіцца ў расейскай даменнай зоне і кіруецца з Масквы. Таксама шматлікія факты сьведчаць пра тое, што спэцслужбы РФ куруюць тэрарыстычныя анклавы расейскіх баявікоў, якія ваююць ня толькі на тэрыторыі Украіны, але і ў Сірыі.
Наконт тэрактаў у Ніцы пазначанае вышэй «міністэрства» яшчэ не выказала сваю пазыцыю.

Чытайце таксама: Масква фарматуе Паўночны Каўказ пад ІДІЛ

Даведка: тэрарыстычныя акты ў Брусэлі – выбухі ў брусэльскім аэрапорце і брусэльскім мэтрапалітэне на станцыі «Малбек» – адбыліся 22 сакавіка 2016 г. Шэраг афіцыйных асобаў РФ вельмі неадназначна і нават з сарказмам камэнтавалі сытуацыю, што спрычынілася да паўставаньня разнастайных тэорыяў пра расейскі сьлед у гэтай трагедыі. Адказнасьць за тэракты ўзяла на сябе тэрарыстычная арганізацыя «Ісламская Дзяржава», якая падазраецца ў сувязях з расейскімі спэцслужбамі.

Варта таксама зазначыць, што мэр Ніцы, дэпутат Нацыянальнага Сходу Францыі Крысьціян Эстразі з 26 лютага па 1 сакавіка 2016 году прымаў з афіцыйным візытам дэлегацыю акупаванай Расеяй крымскай Ялты на чале з так званым “мэрам” А.Растэнкам, зь якім падпісаў мэмарандум пра “працяг далейшай супрацы і ўзмацненьня сяброўскіх, пабрацімскіх і партнэрскіх сувязяў”. На афіцыйным сайце Эстразі таксама зазначанае, што акупаваны Крым зьяўляецца тэрыторыяй Расейскай Фэдэрацыі. Расейскія СМІ актыўна выкарысталі гэта для зьдзяйсьненьня прапаганды і нават падкрэсьлілі, што Эстразі падчас свайго візыту ў Маскву раскрытыкаваў урад Францыі за нежаданьне пастаўляць Расеі «Містралі».

Магчыма, уся гэтыя факты і падзеі зьяўляюцца часткаю стратэгічных дзеяньняў РФ што да дэстабілізацыі ЭЗ і значнага павялічэньня ўзроўню страху перад ІДІЛ, за сьпінай якой стаяць крамлёўскія лялькаводы.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.