Валянтэры міжнароднае супольнасьці InformNapalm выявілі чарговы факт расейскага гібрыднага тэрарызму. У прыватнасьці, атрыманая сьвежая інфармацыя пра украінскую камандыроўку байцоў Галоўнага выведвальнага ўпраўлення ГШ МА РФ.

У поле зроку трапіў нейкі Мікалай Стацук – профіль у instagram (архіў профілю), профіль у “VK” на імя Мікалай Стацук (архівы профілю, фотаальбому, кантактаў), 9 верасьня 1994 году нараджэньня, родам з г.Майскі Кабардына-Балкарыі. Тэрміновую службу да 2014 г. уключна праходзіў на караблі Чарнаморскага флёту РФ – в/ч 90921 МА РФ, на вайскова-марской базе ў Наварасійску, у прыватнасьці, служыў на марскім тральшчыку “Жалезьнякоў”. Затым, перайшоў на «сухапутны» кантракт.

3 сьнежня 2015 году Стацук выклаў у сваім блёгу некалькі сьвежых фатаздымкаў з г.Маздок у Паўночнае Асэтыі. Пад адным зь іх (архіў) ёсьць цікавы дыялёг зь нейкім @slynko56 (архіў), глядзіце вытрымку (падаем у арыгінале):

«- Ты че контракт подписал?
– Уже как 7 месяцев.
– Ясно… И че платят?
– Мне хватает. Пиши в лс, отвечу!».

У гэтым фатаздымку нашую ўвагу прыцягнуў нарукаўны шаўрон, гэта скрыжаваныя стрэлы на тле спэцыфічнага чырвонага «пяці-пялёсткавага» гвазьдзіку – ведамасная эмблема і афіцыйны сымбаль расейскіх частак ГРУ ГШ. Сінявата-бірузовую цэнтральную частку эмблемы відаць значна горш, таму адразу вызначыць вайсковую частку не атрымалася, давялося шукаць інфармацыю далей.

Найбольш цікавыя моманты ў гэтым расьледаваньні:

Шэраг фатаздымкаў – 1, 2, 3 (архіў: 1, 2, 3) Стацук выклаў з “камандыроўкі” з 18 па 20 лістапада 2015 году. Пад адным з фота маецца перапіска з карыстальнікам @dmitriypasha (архіў) (пакідаем у арыгінале):

«- Это ты где?)
– В лс пиши отвечу
– ОК»

Адразу на некалькіх «камандыровачных» фота, выкладзеных крыху раней, выразна відаць, як Стацук пазуе ў нестатутнай форме з нашыўкамі так званай «Данецкай Народнай Рэспублікі» (архіў). Лес удалечыні, недабудаваная пяціпавярховая “хрушчоўка”, гаражы, лініі электраперадачаў і іншае, усё гэта нагадвае данецкія краявіды. Чарговае фота з эмблемай “ДНР” і мадэрнізаванай снайпэрскай вінтоўкай СВДС (якая маецца ва ўзбраеньні толькі ЗС РФ), суправаджаецца камэнтаром Мікалая (архіў) (падаем у арыгінале):

«- Ты кем это заделался?)
– Да так ) в СпН попал !)
– Это что?)
– В войска специального назначения, спецназ»

Падчас далейшага расьледаваньня, быў ідэнтыфікаваны сябар Стацука – нейкі Жэня Савіська, профіль ”VK” (архіў профілю, фотаальбому, кантактаў), які зьяўляецца таварышам у службе нашага галоўнага фігуранту. Напрыклад, у сваім блёгу Савіська пазуе ў армейскай форме з гэтакім жа шаўроном, зь якім ідэнтыфікаваны Стацук у Маздоку. Больш за тое, на старонцы Савіські быў знойдзены вымпел з сымболікай 346-й Асобнай брыгады спэцпрызначэньня ГРУ, у якой, як было высьветленае, служаць абодва вайскоўцы.

Заўвага: 342-ая АБрСпН ГРУ сфармаваная ня гэтак даўно, што да гэтай вайсковай часткі, то ў адкрытым доступе маецца няшмат інфармацыі. Некаторыя падрабязнасьці пра гэтае злучэньне СпН InformNapalm падаваў яшчэ ў красавіку 2014 году. Варта зьвярнуць увагу на тое, што мейсцам базаваньня брыгады зьяўляецца г.Прахладны ў Кабардына-Балкарыі – акурат менавіта той самы рэгіён, скуль родам і сам Стацук. Таксама, варта зазначыць, што 342-ая брыгада неаднойчы  фігуравала ў нашых расьледаваньнях ў кантэксьце “растоўска-ўкраінскіх” камандыровак. Раней была зафіксаваная ля мяжы з Украінай.

Пра прыналежнасьць Стацука да вайсковай часткі, дысьлякаванай у Кабардына-Балкарыі, таксама ўскосна сьведчаць іншыя дадзеныя. Напрыклад, камэнтары на старонцы сябра нашага галоўнага фігуранту нейкага @soldier_boys07 з згадваньнем пра вайсковую службу ў КБР.

Пра ўдзел расейскага спэцназаўца Стацука ў збройным канфлікце ва Украіне, сьведчаць і іншыя факты. Напрыклад, дакладна такія ж гаражы, як і на фота з “украінскай камандыроўкі” Стацука, былі выяўленыя на старонцы «сэпаратыста» Дзьмітрыя Грамакова ў сацсетцы “VK” (архіў профілю, фотаальбому, кантактаў), які ваюе ў так званым «Батальёне спэцыяльнага прызначэньня Мікалаеўскага» “ДНР” і зьяўляецца супольным сябрам байца той жа 346-й брыгады ГРУ Анатоля Іваненкі ў сацсетцы “VK”  (архіў профілю, фотаальбому, кантактаў). Сам будынак, як мяркуецца, знаходзіцца ў Старабешаве. Цікава тое, што сам Грамакоў зьяўляецца «сябрам сябра» Стацука і пазуе з пазычанымі ў расейскіх ГРУ-шнікаў штатнымі СВДС (згадвалася вышэй) і АК з начным прыцэлам.

Такім чынам, гэты матар’ял яскрава сьведчыць пра тое, што Крэмль працягвае па-ранейшаму закідваць сваіх «гібрыдных» вайскоўцаў ва Украіну. А пасьля таго, як ГРУ-шнікі ці іншыя акупанты трапляюць ва ўкраінскі палон, расейскія СМІ адразу пачынаюць  ужываць у адносінах да іх словы, якія бяруць у двукосьсе: «байцы ГРУ», «жаўнеры ЗС РФ» і г.д. або сьціпла дадаюць словазлучэньні «яны заблукалі» або «нібыта ваююць» ва Украіне.

Глядзіце тэматычныя спасылкі што да папярэдніх публікацыяў InformNapalm адносна 346-й БрСпН ГРУ ГШ РФ:

• 346-я Брыгада спэцпрызначэньня ГРУ, April 23, 2014
• 346-я Асобная брыгада спэцыяльнага прызначэньня ГРУ ва Украіне, September 13, 2014
• Расейскія войскі ў Крыме – выведнікі 346-й БСН, December 11, 2014
• Дывэрсантаў 346-й брыгады ГРУ рыхтуюць паводле сыстэмы Станіслаўскага, January 30, 2015
• Найноўшыя бронеаўтамабілі “Тайфун” ва ўзбраенні расейскіх сілаў уварваньня, February 2, 2015

Ідэнтыфікацыю расейскіх вайсковых злачынцаў зьдзейсьніў валянтэр міжнароднае супольнасьці InformNapalm Мікалай Махно

Пераклаў на беларускую мову Дзяніс Івашын

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

 Актыўны распаўсюд у сацсетках вітаецца!