Расейска-тэрарыстычныя войскі разьмяшчаюць на акупаваных тэрыторыях Данбаса й Крыма вялізную колькасьць узбраеньняў, боепрыпасаў і выбуховых рэчываў. Досыць часта склады з боепрыпасамі базуюцца побач з жылымі масывамі, школамі й дзіцячымі садкамі, гэтак акупацыйныя войскі абараняюць сябе «жывым шчытом» зь мірных грамадзянаў, нягледзячы нават на тое, што гэтыя грамадзяне ёсьць збольшага «расейскамоўным насельніцтвам», якое «добраахвотнікі» з Расеі нібы прыехалі абараняць.

Падчас маніторынгу інтэрнэт-рэсурсаў расейскіх прапагандыстаў валянтэры міжнароднае выведвальнае супольнасьці InformNapalm выявілі фатаздымкі, з дапамогаю якіх было вызначанае мейсцазнаходжаньне яшчэ адной базы захоўваньня тэхнікі й выбуховых рэчываў асобнай інжынэрна-сапёрнай роты расейскага акупацыйнага корпуса ў Данецкай вобласьці (в/ч 08820). База знаходзіцца ў Будзёнаўскім раёне гораду Данецка на вул. Баумана, 11 (каардынаты пазыцыі на мапе). У фатаздымках зафіксаваная ўстаноўка разьмінаваньня УР-77 «Мэтэарыт», машына БКТ-РК2 або ТМК-2 і зарады для ўстаноўкі разьмінаваньня УЗП-77, якія ўтрымліваюць 725 кг выбуховага рэчыва ПВВ-7.

Паводле атрыманай інсайдэрскай інфармацыі траціна плошчы памяшканьня складу, пазначанага ў фота лічбай 4, прызначаная для захоўваньня драўляных скрыняў зялёнага колеру армейскага ўзору. З аналізу фатаздымкаў, дадзеных інсайдэраў, а таксама спэцыялізацыі падразьдзяленьня можна зрабіць здагадку, што склад выкарыстоўваецца для захоўваньня выбуховых рэчываў, мінаў, а таксама зарадаў для установак разьмінаваньня. Нагадаем, што толькі адзін боекамплект для УР-77 (два зарады УЗП-77) гэта 1450 кг (!) выбуховага плястычнага рэчыва. А колькі дзясяткаў тонаў гэтае выбухоўкі захоўваецца яшчэ на складзе? Згодна з мапай паблізу (менш за 200 мэтраў) знаходзяцца жылыя дамы Трэналаўкі. А на адлегласьці каля 340 мэтраў, на вул. Енісейская, 14 знаходзіцца дзіцячы садок (каардынаты на мапе). У зьвязку з гэтым валянтэры выведвальнае супольнасьці заклікаюць нашых чытачоў данесьці інфармацыю пра разьмяшчэньне складу выбуховых рэчываў непасрэдна ля жылога сэктару да прадстаўнікоў маніторынгавай місіі АБСЭ. Расейскія акупанты працягваюць застасоўваць практыку разьмяшчэньня складоў тэхнікі й боепрыпасаў пад прыкрыцьцём мірнага насельніцтва, якое выкарыстоўвае ў якасьці “жывога шчыта”. Мы ўжо неаднойчы закраналі гэтую тэму, глядзіце, напрыклад, нашае расьледаваньне:

Тэрарысты выкарыстоўваюць колішнюю школу ў пасёлку Спартак для захоўваньня тэхнікі й боепрыпасаў

Нагадаем, што напрыканцы кастрычніка валянтэрская аэравыведка перадала міжнароднай выведвальнай супольнасьці InformNapalm новыя фатаздымкі буйнога скопішча ўзбраеньня й тэхнікі расейскага акупацыйнана кантынгенту на Данбасе, з дапамогаю якіх былі ідэнтыфікаваныя й дьзве ўстаноўкі разьмінаваньня «Мэтэарыт», што маюцца ва ўзбраеньні Расейскае Фэдэрацыі, разам з тым адустнічаюць якія-кольвек факты пра іхны захоп у выглядзе трафеяў у ЗСУ, што сьведчыць пра наўпроставыя пастаўкі гэтага ўзбраеньня з РФ. Апроч свайго асноўнага прызначэньня – разьмінаваньня аб’ектаў – УР-77 выкарыстоўваецца і для зьнішчэньня жывой сілы ва ўмацаваных руінах будынкаў. Задакумантаванае выкарыстаньне ўстановак гэтага тыпу не па прызначэньню ў Другой Чачэнскай кампаніі, а таксама падчас штурму Данецкага аэрапорта на Данбасе. Таксама зафіксаванае выкарыстаньне УР-77 у Сірыі для нападаў на ўмацаваньні ў раёне Джабар.

Матар’ял да публікацыі падрыхтавалі Кузьма Тутаў і Міхаіл Кузьняцоў.

Пераклаў на беларускую мову Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.