У вынікау OSINT-выведкі, зьдзейсьненай на Марыюпальскім напрамку міжнароднай валянтэрскай супольнасьцю InformNapalm, былі выяўленыя мейсцы, у якіх АРСС (аб’яднаныя расейска-сэпаратысцкія сілы) верагодна хаваюць артылерыйскае ўзбраеньне, якое мае быць адведзенае ад лініі разьмежаваньня. Выведчыкі InformNapalm выказваюць падзяку маці расейскіх наймітаў за фіксацыю злачынстваў сваіх дзяцей. Сыны не заўжды рашучыя, часам скупыя што да інфармацыі і фота, але руплівыя маці імкнуцца запоўніць прагаліны сваіх “пупсаў” фатаздымкамі.

З самага пачатку ўзброенага канфлікту на Данбасе нашая валянтэрская супольнасьць зьдзяйсьняе  маніторынг і назіраньне як за штатнымі падразьдзяленьнямі акупацыйных войскаў Расеі, гэтак і за кантынгентам НЗФ “наваросіі”, на падставе якіх і былі сфармаваныя так званыя Данецкі і Луганскі карпусы. У гэтай публікацыі пададзены так званы 9-ы Марыюпальска-Хінганскі матастралковы полк, зона адказнасьці якога – Марыюпальскі напрамак. 21 кастрычніка 2015 году мы ўжо назіралі “паказушны” адвод танкаў, крыху пазьней на камэры прадэманстравалі адвод артылерыі на адлегласьць 30 км ад лініі разьмежаваньня, зь ейным нібыта перакідваньнем на базу захоўваньня ў Ілавайск. Адвод тэхнікі і ўзбраеньня пацьвердзілі і расейскія “назіральнікі”, у прыватнасьці, кіраўнік прадстаўніцтва ЗС Расеі ў СЦКК Хасан Калоеў заявіў наступнае: “З сёньняшняга дня, пасьля таго, як місыя АБСЭ зьдзейсьніць вэрыфікацыю гэтага ўзбраеньня, мы можам лічыць, што ўсе артылерыйскія сыстэмы меней за 100 мм у ДНР адведзеныя”.

Паводле неаднаразовых паведамленьняў мясцовых жыхароў Наваазоўска, цяжкое ўзбраеньне, уключаючы артылерыю і бранетэхніку, не было адведзенае, але схаванае ў ваколіцах – у разнастайных сельскагаспадарчых і вытворчых будынках і ангарах. Пацьверджаньнем гэтаму ёсьць фатаздымкі мінамётных гарматаў 2Б16 “Нона-К” з боекамплектам, “шчыра пададзеныя” маці расейскага найміта Яўгена Стафеева Тацьцянай Стафеевай (спасылка на архіў профілю: https://archive.is/Q0alv, спасылка на архіў фота: https://archive.is/9kRF0).

На фатаздымку зафіксаваныя 6 гарматаў гэтага тыпу. На тле яшчэ дзьвюх гарматаў пазуе Яўген Стафееў (спасылка на архіў профілю: https://archive.is/1FYAB з псэўданімам Яўген Мароз). Нескладана было выявіць і сапраўдную старонку Яўгена (спасылка на архіў профілю: https://archive.is/mh0Gj). На пазначанай гармаце ёсьць дата апошняга ТА 2-01.10.

Фатаздымкі зробленыя ў памяшканні збожжавага току, якое прызначанае для папярэдняй сушкі і часовага захоўваньня збожжа. На кадрах можна пабачыць, што падлога і сьцены ангару аблепленыя збожжавым пылам.

Што да Яўгена Стафеева, то атрымалася высьветліць наступнае: у складзе НЗФ “ДНР” ён знаходзіцца з 7 ліпеня 2015 году, пазыўны “Лясны” (вытворны ад назвы гораду, скуль ён прыехаў).

Падчас вывучэньня профілю Яўгена Стафеева, былі выяўленыя фота і відэа з палявых выхадаў.

Апошнія выяўленыя фатаздымкі Яўгена маюць геалякацыю у раёне сяла Краснаармейскага, Наваазоўскага раёну, што пазначае меркаваны раён знаходжаньня гарматаў 2Б16.

У скрыншоце з спадарожнікавае мапы ў раёне сёлаў Краснаармейскае-Кулікова-Акцябр можна пабачыць сьляды, пакінутыя тэхнікай, а таксама ўезд на тэрыторыю ангараў двух танкаў.

Ангары, якія мы выявілі, нагадваюць тыя, у якіх захоўваліся гарматы 2Б16, пра што было пазначанае вышэй. Гэтыя ангары знаходзяцца на адлегласьці ня болей за 10 км ад лініі разьмежаваньня. Пра тое, што гэтыя граматы, усё ж, не адведзеныя, сьведчыць фатаздымак з палявога выхаду баявікоў, выкладзены 20.11.2015 г.

Падвоз гарматаў і боекамплекту ажыцьцяўляецца з дапамогай трох браняваных КамАЗаў тыпу «Мустанг» і аднаго грузавога “Урала”, што гэтак жа унікальна, як і наяўнасьць такой колькасьці гарматаў – мінамётаў “Нона-К”, і сьведчыць пра пастаўкі гэтага тыпу ўзбраеньня і тэхнікі з Расеі, з “ваенторга” Пуціна-Шайгу.

У зьвязку з тым, што ані фота-, ані відэафіксацыі адводу гарматаў тыпу “Нона-К” 2Б16 не было зьдзейсьненае з боку місыі АБСЭ, каманда InformNapalm мяркуе, што яны знаходзяцца там жа, дзе й былі зафіксаваныя ў кастрычніку 2015 году. Зыходзячы з усяго вышэйпададзенага, настойліва просім маніторынгавую місыю праінспэктаваць ангары пазначанага раёну Краснаармескае-Кулікова-Акцябр.

Даведка: 120-мм гаўбіцы-мінамёты “Нона-К” украінская армія мае ня болей за дзьве адзінкі. 3 верасьня 2014 году на тэрыторыі Луганскае вобласьці мясцовыя жыхары зафіксавалі калёну вайсковай тэхнікі з колькасьцю 25 адзінак, у якой грузавыя аўтамабілі “Урал”-ы і “КамАЗ”-ы цягнулі на прычэпах сем гарматаў “Нона-К”. Апроч гэтага, было зафіксаванае выкарыстаньне гарматаў 2Б16 сіламі “ДНР” у жніўні 2014 году ў Ілавайску. У Ясінаватай у жніўні 2014 году былі зьнішчаныя 2 адзінкі гэтага ўзбраеньня. Падчас баёў пад Дэбальцава было таксама зафіксаванае выкарыстаньне батарэі з трох 120-мм гарматаў-мінамётаў 2Б16 “Нона-К” сілаў “ДНР”. Аднак, апроч фіксацыі канвою грузавікоў, якія перавозілі на буксіры ўзбраеньне 2Б16 у Луганску 03.02.2015 г., ніводны з вышэйпададзеных фактаў ня быў задакумэнтаваны ў справаздачах місыі АБСЭ.

Матар’ял да публікацыі падрыхтаваны на падставе ўласнага OSINT-расьледаваньня міжнароднай валянтэрскай супольнасьцю InformNapalm. Аўтар матар’ялу Victory Krm.

Пераклаў на беларускую мову Дзяніс Івашын

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.