Валянтэры міжнароднае супольнасьці InformNapalm падчас зьдзяйсьненьня выведкі адкрытых крыніцаў сабралі інфармацыю, якая сьведчыць пра прысутнасць на акупаванай тэрыторыі Украіны расейскага падразьдзяленьня з складу 25-й асобнай мотастралковай брыгады Заходняе вайсковае акругі Збройных сілаў Расейскай Фэдэрацыі.

У задачы падразьдзяленьня ўваходзіць баявая варта (ажыцьцяўляецца ратацыйным чынам), рэкагнасцыроўка тэрыторыі ў зоне адказнасьці.

Падчас маніторынгу сацыяльных сетак у поле зроку OSINT-экспэртаў InformNapalm патрапіў расейскі вайсковец Мікалай Анашкін, у фотаальбоме якога было выяўленае новае фота (архіў) з пазначэньнем геалякацыі «сяло Раздольное, Украіна». Згодна з геалякацыяй фота й спадарожнікавым здымкам мясцовасьці, GPS-лякацыя фатаздымку пазначаная на фота зь невялікай хібнасьцю. Фатаздымак зроблены, меркавана,  у мейсцы базаваньня расейскіх вайскоўцаў, пра што сьведчыць вялікае скопішча вайсковай тэхнікі, зафіксаванае на спадарожнікавых фота. Гэтая база знаходзіцца на іншым беразе ракі Кальміус, паміж н.п. Раздольнае і Васілеўка, Старабешэўскага раёну Данецкае вобласьці Украіны, тэрыторыя СПТВ №150, дакладныя каардынаты 47.610548, 38.012789.

Таксама было вызначанае, што Мікалай Анашкін (архіў на профіль, фотаальбом, кантакты) родам з г. Валгадонск, зьяўляецца кадравым вайскоўцам ЗС РФ, праходзіць службу ў 25-й асобнай мотастралковай брыгадзе (в/ч 29760 Пскоўская вобл., пас. Стругі Красныя) ЗВА ЗС РФ. Сьпіс ягоных кантактаў і супольныя фатаздымкі з таварышамі ў службе пацьверджваюць гэта. Досыць адметнымі зьяўляюцца ягоныя фота з «новымі сябрамі» – мясцовымі сэпаратыстамі і расейскімі баявікамі-наймітамі: Пазывны Кузбас, Яўген Ермакоў, Уладзімер Аляксандравіч, Максім Наканечны, Коста і іншыя.

Паводле фотаальбому Мікалая Анашкіна, перакідваньне тактычнай групы 25-й АМСБр з Пскоўскай вобласьці да ўкраінскай мяжы пачалося напрыканцы лютага 2016 году. Станам на красавік 2016 году, пскоўскія мотастралкі базаваліся ў часовым палявым лягеры ў памежным з Украінаю раёне Растоўскае вобласьці. На працягу гэтага часу асабовы склад тактычнае групы займаўся баявой падрыхтоўкай і зладжваньнем, уваходзіў у вобраз «шахтароў».

Заўвага: 25я АМСБр – в/ч 29760, раней не фігуравала ў матар’ялах InformNapalm, адпаведна дадзеныя пра гэтае вайсковае злучэньне яшчэ ня былі занесеныя ў «чорны сьпіс» частак і злучэньняў ЗС РФ, якія прайшлі праз так званую «украінскую камандыроўку». Гл. матар’ял “Прафэсійная расейская армія ва Украіне. Дасьледаваньне і інфаграфіка” і ўкладку «Падразьдзяленьні» нашай базы дадзеных.

Даведка: 25-я асобная гвардзейская Сэвастопальская Краназнамённая мотастралковая брыгада імя Латышскіх стралкоў, в/ч 29760 (Пскоўская вобл., пас. Стругі Красныя), была разгорнутая нядаўна на падставе колішняй 42-й базы захоўваньня ўзбраеньня й тэхнікі. Арганізацыйна-штатная структура брыгады адпавядае стандартнай структуры брыгады новага тыпу ЗС РФ: Упраўленьне, 3 МСБ, стралковая рота (снайпэраў), танкавы батальён, два гаўбічныя самаходна-артылерыйскія дывізіёны, рэактыўны артылерыйскі дывізыён, супрацьтанкавы артылерыйскі дывізыён, зэнітны ракетны дывізыён і зэнітны ракетна-артылерыйскі дывізыён, выведвальны батальён, рота БПЛА, інжынэрна-сапёрны батальён, рота РХБА, батальён кіраваньня (сувязі), рота РЭБ, батарэя кіраваньня і артылерыйскай выведкі, узвод кіраваньня і радыёлякацыйнай выведкі, узвод кіраваньня, рамонтна-аднаўленчы батальён, батальён матар’яльнага забесьпячэньня, камэнданцкая рота, мэдычная рота, узвод інструктараў, узвод трэнажэраў, палігон, аркестар.

Узбраеньне: 40 адз. танкаў – Т-72Б і 1 адз. Т-72БКб, 159 адз. МТ-ЛБ, 18 адз. БМ-21 «Град», 36 адз. 122-мм СГ 2С1 «Гвазьдзіка», 18 адз. 120-мм мінамётаў 2С12 «Сані», 12 адз. 100-мм гарматаў МТ-12 «Рапіра», 12 адз. самаходных ПТРК 9П149 «Штурм-С», 27 адз. ПТРК 9К115 «Мэтыс», 11 адз. БТР-80, 4 адз. БРДМ-2, 12 адз. БМ 9А33БМ2(3) «Аса», 6 адз. БМ 9А34(35) «Страла-10», 6 адз. ЗСУ 2С6М «Тунгуска», 27 адз. ПЗРК 9К38 «Ігла».

Камандырам 25-й МСБр зьяўляецца гвардыі падпалкоўнік В. Дрэбезаў, які раней праходзіў службу на пасадзе камандыра батальёну 467-га акруговага навучальнага цэнтра ЗВА.

.

Матар’ял да публікацыі падрыхтаваны на падставе ўласнага OSINT-расьледаваньня валянтэрамі міжнароднай супольнасьці InformNapalm Іраклі Камахідзэ,  Відаль Сарокін і Victory Krm.

На беларускую мову пераклаў Дзяніс Івашын.

 (CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Азнаёміцца з факталягічнай доказавай базай дадзеных расьледаваньняў InformNapalm што да ўдзелу ў баявых дзеяньнях ва Украіне больш чымся 60 вайсковых падразьдзяленьняў ЗС РФ можна праз спасылку http://bit.ly/RussianPresence.

Падзяліцеся публікацыяй у сацсеціве! Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.

Таксама вы можаце падтрымаць працу нашага сайта і ахвяраваць на развіцьцё праэкту на старонцы Crowdfunding. Усе атрыманыя сродкі йдуць выключна на тэхнічную падтрымку рэсурсу InformNapalm.org. Разам пераможам!