Падчас выкананьня OSINT-задачаў, арыентаваных на выяўленьне і ідэнтыфікацыю вайсковай тэхнікі незаконных збройных фармаваньняў “ДНР/ЛНР”, каманда InformNapalm.org на адным з прапагандысцкіх рэсурсаў сэпаратыстаў выявіла фатаздымак бронеаўтамабілю Knight XV, які выкладзены 28 жніўня 2015 году, з камэнтаром “Отжатый у ВСУшников (рас.)”.

InformNapalm прасачыў гісторыю гэтага здымка і іншыя дэталі, зьвязаныя з гэтым бронеаўтамабілем. Як згадвалася вышэй, фатаздымак “аджатага” Knight XV у сацсеціве “УКантакце” зьявіўся 28 жніўня 2015 году. У гэты ж дзень быў зроблены ягоны рэпост і ў “twitter”-ы, дзе ў камэнтарох пазначанае, што на тле машыны пазуе расейскі вайсковы назіральнік, які працуе супольна з місыяй АБСЭ на Данбасе. Было знойдзенае і іншае, ранейшае паведамленьне з фатаздымкам трафейнага Knight XV, якое зьявілася 24 жніўня 2015 году, з назовам “Апалчэнцы “аджалі” ў ЗСУ джып сына Януковіча”, якое, цалкам мажліва, і зьяўляецца першакрыніцаю гэтае навіны. У той жа дзень, 24 жніўня 2015 году, разгляд у тэме захопу бронеаўтамабілю Knight XV зьявіўся на форуме “yaplakal” – “Прыгоды бранявіку сына Януковіча з ЗСУ ў ДНР”.

Як высьветлілася, гэты бронеаўтамабіль “Knight XV” быў у асабістым аўтапарку прэзыдэнта Януковіча і быў адною з улюбёных цацак ягонага малодшага сына. Адныя зь першых згадак пра тое, што пазашляхавік “Knight XV” знаходзіцца на службе ва ўкраінскіх сілавікоў і мае новую камуфляжную афарбоўку, зьявіліся ў кастрычніку 2014 году. Паводле матар’ялу “Камсамольскай праўды ва Украіне” з 11 кастрычніка 2014 году з спасылкай на “Вайсковую тэлевізыю Украіны” з назовам “Пазашляхавік Януковіча-малодшага “ваюе” ў зоне АТА”, браняваную машыну выкарыстоўвалі дзеля вывазу параненых з поля бою. За дзень да гэтага, 10 кастрычніка, на сайце topgir.com.ua быў апублікаваны артыкул з назовам “Бранявік Януковіча ў зоне АТА выкарыстоўвае генэрал-лейтэнант?!”, у якім з спасылкай на журналіста Ляўко Стэка зазначанае, што пазашляхавік “Knight XV” служыў транспартным сродкам для нейкага генэрал-лейтэнанта Юрыя Думанскага.

Заўвага: З ТТХ і апісаньня Knight XV вынікае, што машына, якая каштуе амаль $500 000, была прэзэнтаваная ў 2008 годзе. Бронеаўтамабіль збудаваны на базе Gurkha, які першапачаткова базуецца на агрэгатах грузавіку Ford F-550. Бронеахова пазашляхавіку Knight XV вытрымлівае наўпроставыя трапленьні з АК-47 і M16. Аўтамабіль важыць 4,5 тоны і мае рухавік V10 з аб’ёмам 6.8 літраў і магутнасьцю 400 конскіх сілаў.

Нагадаем, што гэта не адзінкавы выпадак “страты” (здачы) спраўнай тэхнікі, якая потым апынаецца на службе НЗФ. 28 верасьня сёлета InformNapalm апублікаваў матар’ял з назовам “Дзе й калі быў згублены бронеаўтамабіль КрАЗ “Фартэцыя на колах”” адносна ўкраінскага бронеаўтамабілю КрАЗ, які цяпер выкарыстоўвае НЗФ “наваросіі”. Гэтая інфармацыя была ўспрынятая неадназначна, у тым ліку зьявіліся камэнтары пра антыпатрыятычнасьць падобнага кшталту публікацыяў, якія нібы ськіраваныя на дыскрэдытацыю ЗСУ. Мы лічым за свой абавязак асьвятляць кожны падобны факт, з спадзевам атрымаць адказы на пытаньні – “дзе, хто й калі згубіў тэхніку, чаму яна дасталася ворагу ў спраўным стане, хто мае адказаць за гэта?”

Матар’ял да публікацыі падрыхтаваў Іраклі Камахідзэ

(с) Інфармацыя падрыхтаваная адмыслова для сайту InformNapalm.org, падчас перадруку й выкарыстаньня матарыялу актыўная спасылка на аўтара і наш праэкт абавязковая.

Пераклад Дзяніса Івашына