Падчас OSINT-выведкі ў ідэнтыфікацыі мейсцаў скопішча расейскай вайсковай тэхнікі і жывой сілы акупацыйных войскаў РФ каманда InformNapalm.org у Алчэўску (прачытаць пра гэта можна ў гэтым матар’яле) выявіла фатаздымкі ўкраінскага бронеаўтамабілю КрАЗ “Фартэцыя на колах”.

Нагадаем, што такі бронеаўтамабіль-“фартэцыя” распрацавала кіеўскае навукова-вытворчае аб’яднаньне “Практыка” у 2014 годзе. Упершыню гэты браняваны грузавік быў прадэманстраваны ў межах 11-ае міжнароднае выставы “Зброя і бясьпека”. Машына стваралася на базе паўнапрываднога КрАЗа. Галоўным адрозненьнем новага браняванага грузавіку ад традыцыйных бронеаўтамабіляў сталася асаблівае разьмяшчэньне асабовага складу ў браняваным кунзе: крэслы зьмешчаныя ў цэнтры. Байцы сядзяць спінаю да сьпіны і падчас руху маюць мажлівасьць страляць праз вокны-байніцы, як у фартэцыі. У гэтым і ёсьць падабенства гэтага бронеаўтамабілю з фартэцыяй, з прычыны чаго і зьявіўся такі назоў, паведамляе выданьне “Мая Слабажаншчына”.

Грузавік “Фартэцыя на колах” выкарыстоўваюць для транспартаваньня баявых падразьдзяленьняў (да 23 чалавек). Браняванае пакрыцьцё абараняе ня толькі кабіну, але й маторны адсек, акумулятары, паліўныя бакі і блёк рэсывэраў. Замест кузаву распрацоўшчыкі абсталявалі машыну бронемодулем для байцоў. Сьцены кунгу маюць дадатковы супрацьаськепкавы падклад, а падлога – шматварствавую структуру. Бронеаўтамабіль абаронены ад АКМ, АК-74, СВД, мінаў і самаробных выбуховых прыстасаваньняў.

На дадзены момант гэтыя бронемашыны знаходзяцца ва ўзбраеньні Нацгвардыі Украіны.

Баявое хрышчэньне браняванага аўтамабілю адбылося ўвосень 2014 году на Усходзе Украіны, калі адзін з грузавікоў патрапіў у засаду баявікоў і быў абстраляны з трох бакоў. У той дзень была моцная залева. Аўтамабіль быў у жудасным стане: заднія колы былі цалкам разарваныя, аўтамабіль рухаўся на абадох. У выніку грузавік змог самастойна выехаць з поля бою, а галоўнае – ніхто не загінуў. Ні шкло, ні бронесталь не прапусьцілі ў кабіну ніводнае кулі.

Узьнікае пытаньне: дзе й калі быў згублены ўкраінскі бронеаўтамабіль КрАЗ “Фартэцыя на колах” коштам каля 75 тыс. даляраў? Сёньня сярэдні курс даляра 22 грн, то бок кошт аднаго падобнага браняванага грузавіку на сёньня складае каля 1 млн 650 тысячаў грыўняў.

Фатаздымкі, якія былі знойдзеныя ў баявікоў з акупацыйных войскаў РФ, што знаходзяцца ў Алчэўску

Нагадаем, што першыя фатаздымкі згубленага бронеаўтамабілю “Фартэцыя на колах” зьявіліся ў сеціве 1 сакавіка 2015 году на прарасейскіх сайтах, у якіх расейскі баявік з брыгады “Призрак” (рас.) пазуе на тле КрАЗа.

Пра тое, што гэта той самы КрАЗ, сьведчыць поўнае супадзеньне ў афарбоўцы, а таксама самае вялікае пашкоджаньне машыны – сколатае вакенца ў кабіне бронеаўтамабілю з правага боку.

Літаральна некалькі дзён таму ў камэнтарах на адным сайце былі выкладзеныя яшчэ некалькі новых восеньскіх фатаздымкаў бронеаўтамабіляў КрАЗ. На гэтых фота можна пабачыць ромб з літарай “П” унутры.

Прааналізаваўшы фота і відэа, на якіх украінскі бронеаўтамабіль зафіксаваны з усіх бакоў і знутры, мы не пабачалі сур’ёзных пашкоджаньняў, так што можна дапусьціць, што гэты грузавік быў страчаны ў цалкам працаздольным стане.

Дык дзе й калі быў страчаны ўкраінскі бронеаўтамабіль КрАЗ “Фартэцыя на колах” і чаму пакінуты ў непашкоджаным стане ворагу?

Гэта не адзінкавы выпадак страты (здачы) цалкам працаздольнай, спраўнай вайсковай тэхнікі ворагу.

Зараз мы ўвесь час чуем пра барацьбу ўкраінскіх спэцслужбаў з спансараваньнем тэрарызму – сьпіс вялікі і азнаёміцца ​​зь ім можна ў розных СМІ. Спынімся на адным прыкладзе: “Харкавянін атрымаў пяць гадоў вязьніцы за фінансаваньне тэрарыстаў”, – паведамляе “Обозреватель” (рас.). То бок “мужчына перавёў у гатоўку пробны транш у памеры 20 тысячаў грыўняў праз канвэртацыйны цэнтар” і атрымаў 5 гадоў. А аддаць ворагу баяздольную вайсковую тэхніку коштам 1 млн 650 тыс. грыўняў – гэта нармалёва? Кагосьці пасадзілі? Дзе адказнасьць вайскоўцаў на ЎСІХ узроўнях камандаваньня, чаму пакаранымі маюць быць толькі шарагоўцы?

Матар’ял падрыхтаваў @BuTaJIu4eK адмыслова для InformNapalm.org.

Пераклаў на беларускую мову – Дзяніс Івашын

(с) Падчас перадруку й выкарыстаньня інфармацыі спасылка на аўтара і наш праэкт абавязковая.