Службовыя дакуманты, масыў фота і іншых дадзеных сталіся даступнымі падчас аналізу сацыяльнага профілю аднаго з расейскіх вайскоўцаў тэрміновае службы. Гэтыя дадзеныя дазволілі раскрыць інфармацыю пра разьмяшчэньне, задачы, якія выконваюцца і камандны склад в/ч 22179 (г.Майкоп), а таксама пра працяглыя камандыроўкі вайскоўцаў 33-й асобнай матастралковай брыгады на “Кадамаўскі” палігон (Растоўская вобл.), дзе іх у дабраахвотна-прымусовым парадку абіраюць для ўдзелу ў вайне на Данбасе.

08.07.15 г. сышоў на заслужаны дэмбель адзін з інфармацыйных спонсараў InformNapalm.org, камандыр КШМ в/ч 22179 малодшы сяржант ЗС РФ Паграбняк Дзьмітры Андрэевіч. Як складзецца ягоны далейшы лёс пакуль невядома, але ў службовай характарыстыцы, якую падпісалі ягоныя наўпроставыя камандырыі, пазначанае наступнае: “Варты таго, каб служыць у ворганах і спэцпадразьдзяленьнях МА, МНС, МУС РФ, ФСБ РФ”. Мы шчыра спадзяемся, што Фэдэральная служба бясьпекі РФ скарыстае з магчымасьці ўзяць на службу гэтага каштоўнага адмыслоўца і сапраўднага сэлфі-майстра.

[Глядзець як слайдшоў]

“Варты таго, каб служыць у ворганах і спэцпадразьдзяленьнях МА, МНС, МУС РФ, ФСБ РФ”

Дзякуючы малодшаму сяржанту Дзьмітрыю Паграбняку, нам удалося выявіць інфармацыю пра разьмяшчэньне, задачы, якія выконваюцца і камандны склад в/ч 22179 (г.Майкоп, Рэспубліка Адыгея, РФ). Выяўленыя дадзеныя пра камандны склад – часовага выканаўцу абавязкаў (ЧВА) начальніка штаба в/ч 22179 падпалкоўніка А.Засопіна; начальніка выведкі артылерыі і ЧВА начальніка артылерыі в/ч 22179 маёра Я.Распопіна; камандыра ўзводу ўпраўленьня начальніка артылерыі старэйшага лейтэнанта Д.Осіпава і іншых вайскоўцаў. Таксама былі пацьверджаныя дадзеныя пра асноўнае мейсца дысьлякацыі 33-й АМСБр ў г.Майкоп і пра працяглае знаходжаньне вайскоўцаў гэтай брыгады ў складзе іншых падразьдзяленьняў ЗС РФ, якія знаходзяцца ў базавым лягеры ля ўкраінскай мяжы ў раёне палігону “Кадамаўскі” у Кастрычніцкім раёне Растоўскае вобласьці.

Падпалкоўнік А.Засопін

маёр Я.Распопін

[Глядзець як слайдшоў]

11 ліпеня гэтага году, “Газета.Ru” таксама апублікавала інфармацыю, што некалькі дзясяткаў кантрактнікаў з в/ч 22179 33-й асобнай матастралковай брыгады (Майкопская выведвальная брыгада) зьбеглі з палігону “Кадамаўскі” у Растоўскае вобласьці, бо спалохаліся адпраўкі ва Украіну. Супраць іх распачатыя крымінальныя справы, ім пагражае да дзесяці гадоў пазбаўленьня волі за самавольнае пакіданьне частак і дэзэртырства. Вайскоўцы і іхныя сваякі распавялі, што жылі ў нечалавечых умовах і іх агітавалі паехаць дабраахвотнікамі ў Данбас.

“30.09.2014 году шараговец Шаўкуноў І.М., вайсковец, якi праходзіць вайсковую службу паводле кантракту, падчас знаходжаньня ў складзе свайго падразьдзяленьня ў службовай камандыроўцы на палігоне “Кадамаўскі”, які дысьлякуецца ў Кастрычніцкім (сельскім) раёне Растоўскае вобласьці, праз незадаволеньне тым, што яго накіравалі ў службовую камандыроўку за межы Майкопа і Рэспублікі Адыгея, нежаданьне пераносіць цяжкасьці вайсковай службы, з мэтай суцэльнага ўхіленьня ад праходжаньня вайсковай службы… самавольна пакінуў мейсца службы – палігон “Кадамаўскі” і зьехаў на мейсца жыхарства”. Падрабязна ў матар’яле “Газета.RU”.

Такім чынам, гэты матар’ял з прадстаўленымі прозьвішчамі, пасадамі і фатаздымкамі камандаваньня вайсковай часткі №22179 можа служыць падставай да далейшых расьледаваньняў удзелу вайскоўцаў гэтага і іншых вайсковых фармаваньняў у выкананні злачынных загадаў, якія працягваюць падаграваць вайну на Данбасе. Верагодна, менавіта начальнік выведкі артылерыі і ЧВА начальніка артылерыі в/ч 22179 маёр Я.Распопін, які знаходзіўся з сваімі падначаленымі ў працяглай камандыроўцы ля ўкраінскай мяжы, мае ведаць падрабязнасьці злачынных загадаў расейскага камандавання.

Матар’ял падрыхтавалі Irakli Komaxidze & Roman Burko адмыслова для InformNapalm.org

Пераклад Дзяніса Івашына