Нельга недаацэньваць суперніка, але варта рабіць папраўку на ягоныя магчымыя памылкі. У гэтым расьледаваньні падаем інфармацыю пра ідэнтыфікацыю пазыцыяў расейскай супрацьпаветранай абароны (СПА) на авіябазе Хмэймім у Сірыі. У нас няма тэхнічных магчымасьцяў, каб даць заключныя высновы што да пазначаных расейскіх комплексаў, якія могуць выкарыстоўваць або дзеля адцягненьня ўвагі, або для мэтаў прапаганды. Пазыцыі тэхнікі не зьмяняліся з 2016 году, а мейсцы схаванай дысьлякацыі СПА пакуль ня выяўленыя, і гэта важная дэталь для выпраўнога пункту гэтага аналізу.

Расейскія прапагандысты тэлеканалу міністэрства абароны РФ «Звезда» (рас.) раскрываюць пазыцыі расейскай групоўкі СПА на авіябазе Хмэймім. 11 чэрвеня 2017 году на сваім канале сэрвісу Youtube яны апублікавалі відэа з назовам “Военная приемка в Сирии. База Хмеймим. Часть 2”. Праз аналіз відэа атрымалася ўсталяваць дакладнае знаходжаньне двух зэнітна-ракетна-гарматных комплексаў «Панцыр-С2», дзьвюх радыёлякацыйных станцыяў 1РЛ-123Е, чатырох пускавых установак 5П85ТЕ2 комплексу С-400, радыёлякацыйнай станцыі 92Н6Е комплексу С-400 і дызэль-генэратараў, якія сілкуюць комплексы С-400.

Агульная схема разьмяшчэньня сродкаў СПА паводле аналізу відэа (для павялічэньня націсьніце на спадарожнікавае фота)

Каардынаты зэнітна-ракетна-гарматных комплексаў «Панцыр-С2» пададзеныя ў спасылках 1, 2. Зазначым, што ў відэа зафіксаваныя менавіта мадэрнізаваныя “Панцыры”, якія візуальна адрозьніваюцца ад ЗРПК «Панцыр-С1» новым радыёлякатарам.

Побач знаходзяцца дзьве радыёлякацыйныя станцыі выяўленьня 1РЛ-123Е, якія выкарыстоўваюць разам з ЗРПК «Панцыр» (1, 2).

На ўсходнім баку авіябазы знаходзяцца парамі чатыры пускавыя ўстаноўкі 5П85ТЕ2 комплексу С-400 (1, 2), радыёлякацыйная станцыя 92Н6Е (3) і дызэль-генэратары (4).

Характэрна, што на хронаметражы відэа 15:00 – 15:30 расейскі прапагандыст распавядае пра забарону выкарыстаньня смартфонаў, а таксама фота- і відэапрыладаў асабовым складам авіябазы дзеля таго, каб пазьбегнуць перахопу інфармацыі, у тым ліку што да разьмяшчэньня тэхнікі й сродкаў забесьпячэньня базы. У той жа самы час у відэа раскрываюцца падрабязнасьці пра склад і дакладнае знаходжаньне групоўкі СПА. Што ж гэта? Чарговая хіба расейскіх прапагандыстаў або наўмысная дэзынфармацыя для стварэньня «ілжывых цэляў». Праз аналіз здымкаў на сэрвісе Terraserver зрабіць канчатковыя высновы не ўдалося. Вызначанае, што разьмяшчэньне тэхнікі не зьмянялася з 2016 году, а відавочныя мейсцы схаванага разьмяшчэньня тэхнікі СПА ня выяўленыя.

Матар’ял да публікацыі падрыхтаваў Міхаіл Кузьняцоў адмыслова для сайту InformNapalm.

Пераклаў на беларускую мову Дзяніс Івашын.

 (Creative Commons — Attribution 4.0 International — CC BY 4.0)

Рабіце рэпост і дзяліцеся зь сябрамі.

Падпісвайцеся на старонкі супольнасьці InformNapalm у

Фэйсбук / Твітэр / Telegram

і апэратыўна атрымлівайце інфармацыю пра новыя матар’ялы.