Мы дзякуем усім чытачам InformNapalm, якія адгукнуліся на просьбу прыняць удзел у сацыяльным апытаньні, сутнасьць якога палягала ў вызначэньні фатаздымка, на якім знаходзяцца прадстаўнікі “апалчэньня ДНР/ЛНР”, і на якім – вайскоўцы ЗС РФ? Мэта апытаньня – даведацца пра крытэры, якімі апэруюць чытачы падчас ідэнтыфікацыі расейскіх сілаў уварваньня ва Украіну.

Пераважная большасьць чытачоў пазначыла фота №2 як асноўны варыянт. Менавіта на другім фатаздымку паводле меркаваньня большасьці сфатаграфаваныя расейскія вайскоўцы.

Забягаючы наперад варта адзначыць, што назіраньне і аналітычны падыход нашай чытацкай аудыторыі ёсьць доказам здольнасьці людзей, якія нават не зьяўляюцца вайсковымі адмыслоўцамі, аднак у стане зрабіць слушны аналіз. Пытаньне насамрэч аказалася больш складаным, чым нам здавалася. Але аб усім па парадку.

ФОТА №2

Пачнем свой разгляд з фота №2. Першае, на што зьвяртаеш увагу на гэтым фатаздымку, наяўнасьць у рукох гэтых людзей стралковае зброі. І ўся гэтая зброя – баявая, згодна з расейскімі законамі. Тым ня менш, на іх няма аніводнага атрыбуту, які б дазволіў адназначна ідэнтыфікаваць іхную прыналежнасьць да сілавых ведамстваў Расеі. Адпаведна, у клясычным разуменьні, гэтыя людзі не зьяўляюцца расейскімі жаўнэрамі (магчымыя варыянты: “апалчэнцы”, “дабравольцы”, “адпускнікі”). Але…

Як мінімум, у аўтара старонкі, на якой быў зьмешчаны гэты фатаздымак (vk.com/id54533677), на шыі вісіць расейскі АК-74М.

Мал.2 АК-74М

Фота зробленае на тэрыторыі Куйбышаўскага раёну Растоўскае вобласьці, гэта пазначанае ў геатэгу, пакінутым у суседнім фатаздымку з таго ж профілю ў сацсеціве, які быў дададзены ў той жа дзень.

Нагадаем, што Куйбышаўскі раён пакуль яшчэ знаходзіцца пад юрысдыкцыяй РФ, такім чынам, нашэньне баявое зброі асобамі, што не належаць да сілавых ведамстваў Расеі, зьяўляецца крыміналам. Але, што самае цікавае, як усе памятаюць, паводле заяваў расейскага боку “дабравольцы” самі здабываюць зброю, захопліваючы яе ва украінскіх сілавікоў, але не ў расейскага войска. На фота мы бачым непасрэдны доказ таго, што расейская прапаганда хлусіць: “апалчэнцы” знаходзяцца ў Расеі і яны – узброеныя!

Але расейскія скептыкі могуць запярэчыць, маўляў фота з аўтаматамі таемна зрабілі куйбышаўскія мужыкі, што вырашылі вызначыцца сярод сваіх сяброў крутым сэлфі і аддалі апошнія грошы, каб набыць аўтаматы ў ваенторгу. На гэта ў нас ёсьць свой адказ – наступнае фота гэтых жа “апалчэнцаў” у гэтай жа пасадцы ўжо на расейскім танку Т-80.

Мал.3 Т-80

Назваць танк дадзенага тыпу “аджатым ва ўкраінскага войска” не наважыцца нават самы зацяты расейскі прапагандыст. Як бачыце, асобы на танку тыя ж самыя, што і на “фота №2”. То бок, адзіным спосабам для Крамля захаваць сытуацыю у межах прыстойнасьці і законнасьці зьяўляецца магчымасьць прызнаць усіх удзельнікаў гэтага пэрформансу расейскімі вайскоўцамі (або прадстаўнікамі сілавых ведамстваў). Аднак, у гэтым выпадку пытаньняў будзе яшче больш…

Такім чынам, прызнаем усіх байцамі арміі РФ. Але тады атрымліваецца, што на традыцыйную крамлёўскую просьбу, паказаць ім расейскае войска на данбаскіх палетках, можна сьмела паказваць фатаздымкі любога ўзброенага ваякі, зь бясконцае колькасьці неапазнаных зялёных чалавечкаў, якія запаланілі данецкія стэпы і заяўляць, што гэта і ёсьць расейскі вайсковец. Тым больш, што ў Крыму так і было.

Для падобнага падыходу, ёсьць дадатковыя падставы, досыць абгрунтаваныя. Крыніца, фатаздымкі “Варыянт нумар два”, шчыра дэманструе сваю прыналежнасьць да расейскага войска (http://vk.com/id54533677).

Калі дапусьціць, што гэты Юра, як і ўсе ягоныя паплечнікі на здымках ёсьць вайскоўцамі пазначанай, 8-ай АМСБр, то яны забраліся вельмі далёка ад сяла Барзой. Мейсца базаваньня гэтага падразьдзяленьня знаходзіцца за 1000 км ад цяперашняга мейсца знаходжаньня Юры. Пра прычыны гэтага шпацыру можна меркаваць з асобных элемэнтаў абмундыраваньня людзей з фотазагадкі.

Мал.5 Жгут і Павязка

Жгут

Жгут, якім абкручаны прыклад аўтамата, шматкроць разоў дэманстраваўся на аўтаматах “апалчэнцаў-дабравольцаў” падчас баёў на Данбасе. Зьява гэта нестатутная, і таму, сумніўна, каб без патрэбы, вайскоўцы абкручвалі гэтым атрыбутам баявую зброю. Белыя анучы і ізаляцыйная стужка на пісталетнай ручцы, могуць служыць варыянтам, які палягчае ідэнтыфікацыю сваіх байцоў у палявых умовах. Тое самае можна сказаць і пра анучы, якімі абкручаны сусед “жгутавага аўтаматчыка”.

Павязка

Дадзены спосаб, таксама нестатутны для войскаў РФ,  але мае шырокае распаўсюджаньне сярод “сэпаратыстаў”. То бок, калі пагадзіцца, што на фатаздымку №2 прысутнічаюць расейскія вайскоўцы, то давядзецца прызнаць і іхны ўдзел у баявых дзеяньнях на ўсходзе Украіны. І фота ГАЗ-66 з белым квадратам кажа пра тое ж.

Мал.6 ГАЗ-66

ФОТО 1

З фатаздымкам №1 з нашага апытаньня сытуацыя падобная, але з адною невялічкаю розьніцай: ён зроблены на тэрыторыі Украіны. І пытаньні наконт гэтага фота ў нас паўсталі толькі да “апалчэнца”, які мае імя Аляксей Міронаў (http://vk.com/id239030223).

Па-першае, уражвае гардэроб.

Мал.7 Касьцюмчык

Згадзіцеся, што 4 тыпы палявой формы было б раскошаю нават для мушкетэраў караля Людовіка XIV, не кажучы ўжо пра простых “шахтароў” і “камбайнэраў”.

Мал.8 Кулямёт

Нагадаем, што кулямёт РПК-74М знаходзіцца на ўзбраеньні расейскага войска.

У выніку праведзенага разам з чытачамі аналізу фота-загадкі можна падкрэсьліць, што і на першым і на другім фота мы, відавочна, назіраем ня простых “апалчэнцаў”, але, як мінімум, наймітаў, якіх забясьпечвае расейскі бок і/або расейскіх вайскоўцаў.

Матар’ял падрыхтаваў Al Gri адмыслова для InformNapalm.org

Пераклад Дзяніса Івашына

RU: Ребусы российской агрессии против Украины: фотозагадка