Анатоль Баронін, Da Vinci AG, адмыслова для InformNapalm.

Пасьля Сірыі Расейская Фэдэрацыя плянуе разгарнуць сваю вайскова-марскую групоўку ў раёне Чырвонага й Арабійскага мораў, узмоцненую атамнымі падводнымі ракетаносьбітамі. Пра гэта сьведчыць асаблівая актыўнасьць РФ у рэгіёне.

Міжнародная выведвальная супольнасьць InformNapalm наконадні апублікавала дадзеныя пра азнакі вайсковае супрацы паміж Масквой і Хартумам і пляны разьмяшчэньня расейскай вайскова-марской базы ў Порт-Судане. Яны сьведчаць пра тое, што Расейская Фэдэрацыя зьдзяйсьняе пэўныя захады дзеля ўзмацненьня сваёй вайсковай прысутнасьці ўздоўж пэрымэтру Арабійскае паўвыспы.

Амбіцыі РФ на гэтым не абмяжоўваюцца. Як паведамляе афіцыйны сайт МА РФ, 15 сьнежня з Кранштадта выйшла акіянаграфічнае дасьледвальнае судна (АДС) Балтыйскага флёту «Адмірал Уладзімірскі». Маршрут АДС праходзіць цераз Балтыйскае й Паўночнае моры, далей праз пратоку Ля-Манш у Атлантычным акіяне, затым празь Гібралтар і Міжземнае мора, праз Суэцкі канал і Баб-эль-Мандэбскую пратоку ў Чырвоным моры – ў Індыйскі акіян. Далей судна мае йсьці да выспы Маўрыкій.

Асаблівыя выведвальныя азнакі

Пасьля апошняе далёкае выправы ў Адэнскую затоку судна на працягу трох месяцаў знаходзілася ў верфях Кранштацкага марскога заводу для аднаўленьня тэхнічнае гатоўнасьці й выкананьня працаў. У выніку на караблі ўсталявалі гравімэтрычны комплекс «Папугай» расейскае вытворчасьці, новы гідралягічны зонд ОЛД-1 і мадэрнізаваны вымяральны рэхалёт НЭЛ-1000М.

Паводле афіцыйных дадзеных у Індыйскім акіяне экіпаж судна мае дасьледаваць паноўна выяўленую розьніцу глыбіняў і выяўляць навігацыйную небясьпеку, вывучаць характарыстыкі раёнаў і зьбіраць зьвесткі для карэгаваньня мапаў, кіраўніцтваў і дапаможнікаў для плаваньня цягам усяе выправы. У маршруце пераходу таксама заплянаванае правядзеньне комплексных акіянаграфічных дасьледваньняў, праверка працы радыёнавігацыйных сыстэмаў.

Пазначаныя задачы, а таксама маршрут АДС «Адмірал Уладзімірскі» можа сьведчыць пра тое, што асноўнай задачаю ягонае місіі зьяўляецца ўдакладненьне марскіх мапаў для навігацыі падводных лодак.

Сам раён зьдзяйсьненьня дасьледвальных працаў таксама сьведчыць пра цікавасьць ВМФ РФ да акваторыі Чырвонага мора, а таксама да паўднёва-ўсходніх водаў Арабійскага мора, разам з Адэнскаю затокаю. Раён мае вялікае значэньне для транспартаваньня блізкаўсходняе нафты. То бок, узмацненьне расейскае вайсковае прысутнасьці ў гэтым рэгіёне надасьць мажлівась Расеі зьдзяйсьняць уплыў на транспартаваньне энэрганосьбітаў у Эўропу, ствараць, у выпадку неабходнасьці, блякаду лягістычных камунікацыяў, уплываць на дынаміку коштаў на сусьветным рынку. Характэрна, што падчас місіі на борце караблю знаходзіцца падразьдзяленьне марское пяхоты.

Сьлед асабліва зазначыць, што ўзрастаньне інтарэсу ў 2017 годзе да ўзмацненьня вайсковае расейскае прысутнасьці ў рэгіёне супала з ўзрастаньнем анялагічнага інтарэсу з боку Тэгерана. Гэтак, у чэрвені 2017 году 47-я флятылія ВМС Ірана ў складзе двух караблёў – “Alborz” і “Bushehr”, а да гэтага 46-я флятылія ВМС Ісламскае Рэспублікі знаходзіліся ў Адэнскай затоцы.

У лютым ВМС Ірана пачалі завяршальную стадыю буйнамаштабных вышкалаў, якія адбываліся ў паўночнай частцы Індыйскага акіяну.

Такім чынам, бяручы пад увагу высокі ўзровень каардынацыі дзеяньняў й вайскова-палітычнае супрацы паміж Масквой і Тэгеранам (напрыклад, у Сірыі), існуе высокая верагоднасьць таго, што ўзмацненьне вайсковае прысутнасьці дзьвюх дзяржаваў у акваторыі Чырвонага мора й Адэнскае затокі скаардынаваныя й маюць агульныя мэты.

Пераклаў на беларускую мову Дзяніс Івашын.

Падчас выкарыстаньня інфармацыі актыўная спасылка на крыніцу абавязковая.
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.