Міжнародная валянтэрская супольнасьць InformNapalm працягвае зьбіраць доказы вайсковых злачынстваў РФ ня толькі ва Украіне і Сірыі, але і ў іншых краінах сьвету. Расейскае вайсковае кіраўніцтва дагэтуль не зазнала пакараньня за свае папярэднія злачынствы, у тым ліку і за вайсковую агрэсыю супроць Грузыі ў жніўні 2008 году.

3 лістапада 2015 году валянтэр і сузаснавальнік супольнасьці InformNapalm Іраклі Камахідзэ падаў  эксклюзыўны відэаматар’ял, у якім зафіксаванае вар’яцтва расейскіх вайскоўцаў у жніўні 2008 году ў ваколіцах г.Горы.

Нагадаем, што Іраклі ў гэты момант зьяўляецца афіцэрам запасу, ён больш за 10 гадоў аддаў службе ў збройных сілах Грузыі і прымаў асабісты ўдзел у супрацьдзеяньні расейскай вайсковай агрэсыі.

Зь першых дзён інтэрвэнцыі Расейскай Фэдэрацыі ў Крым, ён далучыўся да групы інфармацыйных партызанаў і пачаў зьдзяйсьняць дапамогу ўкраінскім валянтэрам і вайскоўцам ў выяўленьні  расейскіх вайсковых фармаваньняў, зь якімі ён сутыкнуўся ў Грузыі.

На кадрах відэа, якое ён падаў, можна пабачыць, як інтэрвэнты, дзеля забавы, зьнішчаюць аўтамабіль перасоўнай станцыі GSM апэратара сотавай сувязі.

“У архівах яшчэ вельмі шмат матар’ялу, які дазволіць прыцягнуць да міжнароднага суду расейскіх акупантаў, якія прыйшлі ў Грузыю ў 2008 годзе насаджаць “рускі сьвет”. Шматлікія расейскія вайсковыя злачынцы ўжо апазнаныя (у тым ліку і ў гэтым відэароліку), кожны атрымае, што заслугоўвае. Гэтае відэа зробленае ў Грузыі, у ваколіцах г.Горы ў жніўні 2008 году, ужо пасьля “мірнага пагадненьня Мядзьведзева-Сарказі”. З моманту наданьня моцы гэтаму пагадненьню, у той час як грузынскі бок выконваў усе ўмовы, расейскія акупанты чынілі марадэрства, крадзяжы і рабаваньне. У пададзеным відэа з актамі вандалізму, удзельнічаюць танкісты матастралковага злучэньня Паўночна-Каўказскае вайсковае акругі (зараз ПВА) і дэсантнікі 104-га палку ПДВ з Пскова”, – удакладніў Іраклі Камахідзэ на сваёй старонцы ў фэйсбуку.

Матар’ял падрыхтаваны адмыслова для InformNapalm.org.

CC BY / Перадрук з пазначэньнем спасылкі на крыніцу вітаецца.

 Пераклаў на беларускую мову – Дзяніс Івашын