Сірыйскі цэнтар маніторынгу за выкананьнем правоў чалавека (OSDH), штаб-кватэра якога знаходзіцца ў Вялікай Брытаніі, паведаміў, што ў панядзелак увечары, 19 кастрычніка, у выніку “звышдакладных” авіяўдараў расейскае авіяцыі па раёну Джабаль Акрад (Jabal Akrad) загінулі 45 чалавек. Апроч загінулых мірных жыхароў, забіты таксама камандыр паўстанцкае Першае ўзьбярэжнае дывізыі Базыль Замо (Basil Zamo), які змагаўся ў шэрагах Сірыйскае свабоднае арміі супроць рэжыму Башара Асада. Ён уваходзіў у групу афіцэраў, якія пакінулі шэрагі арміі Асада. Першая паўстанцкая ўзьбярэжная дывізыя зьяўляецца асноўнаю сілаю Свабоднае арміі на захадзе Сірыі. Верагодна, менавіта гэты афіцэр быў галоўнай мэтай авіяўдару, які быў скаардынаваны паводле сыгналу мабільнае сувязі.

Афіцыйная пазыцыя Расейскай Фэдэрацыі, якая задэкляравала правядзеньне сваёй паветранай апэрацыі супроць “Ісламскае Дзяржавы”, зводзіцца да тых жа інструмэнтаў адкрытае хлусьні і інфармацыйных маніпуляцыяў, якія ўжываліся і ва Украіне. Дэ-юрэ Расея сьцьвярджае, што ейная армія задзейнічаная ў антытэрарыстычнай апэрацыі супроць баявікоў “Ісламскае Дзяржавы”, хаця дэ-факта 85% ад усіх авіяўдараў, якія зьдзейсьнілі ВКС РФ у Сірыі, прыпадаюць на пазыцыі, дзе ўвогуле няма баявікоў “ІД”.

85% расейскіх авіяўдараў па раёнах, дзе ІД увогуле няма; Расея ўдзельнічае ў грамадзянскай вайне Асада, але не супроць ІД

Гэтыя 85% удараў зьнішчаюць паўстанцаў Свабоднае сірыйскае арміі (якія таксама змагаюцца супроць “ІД” і рэжыму Башара Асада) і мірных сірыйскіх грамадзянаў (з мэтай павялічэньня панікі і справакаваньня яшчэ большага прытоку ўцекачоў у краіны ЭЗ).

Рэгіянальная сытуацыя зь сірыйскімі ўцекачамі

У сваю чаргу ў сацсетках арабскага сэгмэнту Інтэрнэта ўжо пачалі зьяўляцца ўлёткі з заклікамі праводзіць барацьбу супроць “расейскіх вайсковых злачынцаў“.

Нагадаем, што актывісты міжнароднае валянтэрскае супольнасьці InformNapalm працягваюць публікаваць асабістыя дадзеныя вайсковых пілётаў, якія ўдзельнічаюць у сірыйскай вайсковай апэрацыі. Матар’ялы з бартавымі і рэгістрацыйнымі нумарамі лятакоў, фатаздымкамі, прозьвішчамі і імёнамі пілётаў паводле “Ультыматуму InformNapalm Крамлю за парушэньне рэжыму спыненьня вагню” пэрыядычна публікуюцца на некалькіх замежных мовах, уключаючы арабскую. Гэта выклікала шквал абурэньня ў расейскім сэгмэнце Інтэрнэта і справакавала прэс-сакратара РФ Дзьмітрыя Пяскова зрабіць неасьцярожныя камэнтары. У сваю чаргу, адзін з цэнтральных арабскіх тэлеканалаў “Аль Арабія” параўнаў уцечку інфармацыі, якую публікуюць валянтэры InformNapalm, з дзейнасьцю WikiLeaks.

20 кастрычніка 2015 году ў Данецкай вобласьці пачаўся адвод узбраеньня з абодвух бакоў. Паводле словаў “міністэрства абароны ДНР”, баявікі “Данецкай народнай рэспублікі” пачалі адводзіць узбраеньне з калібрам менш за 100 мм на Дэбальцаўскім напрамку. Таксама ў СМІ запэўніваюць, што на Дэбальцаўскім напрамку прарасейскія баявікі адвялі 10 танкаў.
За адводам тэхнікі назіраюць прадстаўнікі АБСЭ. У сваю чаргу валянтэры міжнароднае групы InformNapalm таксама сочаць за выкананьнем рэжыму спыненьня вагню. Паводле ўласных крыніцаў групы, ракіроўка сілаў баявікоў ня ёсьць сапраўдным адводам, але мае характар ​​перадысьлякацыі.

У выпадку якой-кольвек правакацыі з боку аб’яднаных расейска-сэпаратысцкіх сілаў на Данбасе “ІнфармНапалм” абяцае выдаць чарговую порцыю ўнікальных дадзеных пілётаў ВКС РФ у Сірыі або аб’ектаў расейскай вайсковай інфраструктуры, а таксама распаўсюдзіць інфармацыю на некалькіх мовах, уключаючы арабскую.

Матар’ял падрыхтаваў валянтэр міжнароднае групы InformNapalm у Сірыі Адыль Аль-Алім

(с) Інфармацыя падрыхтаваная адмыслова для сайту InformNapalm.org, падчас перадруку й выкарыстаньня матар’ялу актыўная спасылка на аўтара і наш праэкт абавязковая.

 Пераклаў на беларускую мову – Дзяніс Івашын