Міжнародная валянтэрская супольнасьць InformNapalm ў чарговы раз выявіла хлусьню Міністэрства Абароны Расеі. 2 сьнежня 2015 году Генштаб РФ падаў “доказы пакупкі Турэччынай нафты ў ІД”, падмацаваўшы ўсё гэта візуальнымі “сьведчаньнямі”. На брыфінгу Міністэрства абароны новы начальнік Галоўнага апэратыўнага ўпраўленьня Генэральнага штаба Сяргей Рудзкі распавёў пра пакупку нафты Турэччынай у ІД (ДАІШ) і падаў фота- і відэадоказы.

Прадстаўнікі расейскага Генштаба, збольшага, апэлявалі спадарожнікавым фатаздымкам з мейсца стаянкі кантрабандных нафтапрадуктаў, датаваным 14.11.2015 г., дзе, паводле іхнага запэўніваньня, зафіксаваныя больш за 3000 бэнзавозаў і фураў, нібыта прызначаных для перавозкі ў Турэччыну.

Аналітык каманды InformNapalm з дапамогаю GoogleEarth адшукаў дадзенае мейсца і зрабіў скрыншот мясцовасьці з архіву здымкаў GoogleEarth за 15.12.2004 г. (Заўвага: празь інструмэнт “гісторыя здымкаў” дадзенае мейсца адлюстроўванае размытым, але калі наблізіць яго і падвесьці паказьнік мышкі / націснуць на кнопку “Захаваць малюнак”, то GoogleEarth пазначае дату 15.12.2004 г.). Каардынаты мясцовасьці – 37.1753294, 42.556057. Назоў на турэцкай – TİCARİ ARAÇ PARK YERİ (Sıra Bekleme). Мяркуючы паводле спадарожнікавых здымкаў Google і “лёгіцы” Генэральнага Штаба ЗС РФ, можна зрабіць выснову, што прэзыдэнт Турцыі Эрдаган гандлюе нафтай з ІД пачынаючы з 2004 году, хаця ІД (крыху раней «Ісламская дзяржава Ірака і Леванта») існуе толькі з 2013 году. 11 гадоў таму там таксама была стаянка транспарту, і колькасьць машынаў на ёй ня менш, чымся на фатаздымку ад Гэнштаба РФ. Таксама можна заўважыць зьмены інфраструктуры гэтага мейсца за 11 гадоў.

На жаль, больш старыя фатаздымкі адсутнічаюць у GoogleMaps, інакш мы маглі б даведацца і невядомую ранейшую гісторыю “Ісламскае Дзяржавы”.

Таксама падаем цытату з фэйсбук-запісу нашага калегі з “Інфармацыйнага Супраціва” – экспэрта ЦВПД у пытаньнях інфармацыйнае бясьпекі Вячаслава Гусарава з справядлівымі заўвагамі: “Зь якога часу міністэрства абароны Расеі валодае паўнамоцтвамі пошуку доказаў “нелегальных паставак нафты ў Турэччыну”? Хіба гэта іхныя функцыі? Ці вызначаць, якую інфармацыю трэба распаўсюджваць? Сытуацыя нагадвае часы вайсковае дыктатуры”.

У выніку ўсяго вышэйпададзенага, можна зрабіць выснову, што супольная спэцапэрацыя міжнароднае валянтэрскае супольнасьці InformNapalm, Google, ІС і Дзярждэпартамэнта ЗША прайшла пасьпяхова. Расейскі Генштаб зноў злоўлены на хлусьні. У зьвязку з гэтым хочам нагадаць заяву расейскага ГШ з сьнежня 2014 году, у якім начальнік Генштаба Герасімаў, намякаючы на ​​выкрывальніцкія публікацыі InformNapalm і іншых OSINT-камандаў, зазначыў, што доказам прысутнасьці войскаў Расеі ва Украіне служаць “прымітыўныя падробкі”. Дык хто ж з нас брахун, таварыш Герасімаў?

 Матар’ял да публікацыі падрыхтаваў Міхаіл Кузьняцоў

Пераклаў на беларускую мову Дзяніс Івашын

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

 Актыўны распаўсюд у сацсетках вітаецца!