Паводле назіраньняў міжнароднае валянтэрскае супольнасьці InformNapalm, у памежных з Украінай раёнах Растоўскае вобласьці фіксуецца скопішча новых сілаў і сродкаў ЗС РФ, сярод якіх выяўленая рэактыўная артылерыя з складу 385-й артылерыйскай брыгады (в/ч 32755, мейсца сталай дысьлякацыі – Тоцкае, Арэнбургская вобласьць) Цэнтральнае вайсковае акругі.

Паводле ўдакладненых дадзеных, у “растоўскай камандыроўцы” знаходзіцца першая батарэя рэактыўнага артылерыйскага дывізыёна 385-й артбрыгады, ва ўзбраеньні якой маюцца 220-мм РСЗВ “Ураган” (9К57). На цяперашні момант рэактыўшчыкі з Урала базуюцца ў палявым лягеры ў раёне палігону Кузьмінскага Растоўскае вобласьці. Падразьдзяленьне рэактыўнае артылерыі з Арэнбурга ў Растоўскую вобласьць было перакінутае сёлета напрыканцы верасьня і ўвесь гэты час было занятае баявой падрыхтоўкай, у тым ліку ажыцьцяўленьнем схаваных маршаў, разгортваньнем на баявых пазыцыях і адыходам.

У пацьверджаньне нашай інфармацыі зазначым, што мы сачылі за некалькімі профілямі расейскіх вайскоўцаў гэтага рэактыўнага падразьдзяленьня. Адзін з профіляў, які належыць вайскоўцу 385-й артбрыгады Руслану Альмукашаву, https://vk.com/id303606000, выдалены. Цалкам мажліва, прычына гэтаму – выкладваньне ў альбом фатаздымкаў на тле рэактыўнае ўстаноўкі разам з таварышамі ў службе. Такім чынам, замест звычайнага і простага выдаленьня кампрамэнтуючага фота з профіляў назіраем поўную зачыстку інфармацыі. Мейсцам лякацыі выдаленага фатаздымку быў Мясьнікоўскі раён Растоўскае вобласьці, дзе напярэдадні таварышы ў службе Руслана хваліліся багатым уловам рыбы. Як рэактыўшчыкі з Тоцкого гарнізона былі выяўленыя праз рыбу, нагадвае прыкладна тое ж самае, як летась танкістаў 5-й танкавай брыгады з Бураціі дапамаглі выявіць сабакі хаскі.

Дарэчы, гэта ня першая фіксацыя 385-й артылерыйскай брыгады ў кантэксьце “растоўска-ўкраінскай камандыроўкі”. Артылерыя гэтай брыгады да ўкраінскай мяжы была перакінутая ў жніўні 2014 году і базавалася ў Каменск-Шахцінскім раёне Растоўскае вобласьці, ля самай мяжы. Ва ўзбраенні гэтага падразьдзяленьня фіксаваліся 152-мм самаходныя артылерыйскія ўстаноўкі 2С19 “Мста-С”, меркаваны склад – да батарэі (каля 6-8 адзінак).

Паводле ўскосных сьведчаньняў, артылерысты 385-й брыгады, выкарыстоўваючы тактыку качэўных батарэяў, перыядычна высоўваліся на баявыя пазыцыі для вядзеньня вагню супроць аб’ектаў на тэрыторыі Украіны, больш падрабязна чытайце – “САУ” Мста-С “385-й артылерыйскай брыгады з Урала на мяжы з Украінай“.

Нагадваем, што, паводле інфармацыі міжнароднае валянтэрскае супольнасьці InformNapalm з 21 лістапада 2015 году, расейскае вайсковае камандаваньне пачало канцэнтраваць сьвежыя сілы ў памежных з Украінай раёнах Растоўскае вобласьці. Паводле апэратыўных дадзеных супольнасьці,  да самай украінскай мяжы падцягнутае тактычнае падразьдзяленьне з складу 8-й асобнай горнай матастралковай брыгады, чытайце: “Расея канцэнтруе сьвежыя сілы для перакідваньня на Данбас”.

Матарыял да публікацыі падрыхтаваны на падставе ўласнага OSINT-расьледавання міжнароднай валянтэрскай групай InformNapalm. Аўтары матар’ялу Іраклі Камахідзэ і Victory Krm.

Пераклаў на беларускую мову Дзяніс Івашын

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.