Міжнародная валянтэрская супольнасьць InformNapalm.org працягвае цыкль ультыматыўных публікацыяў, зьвязаных з публікацыяй у адкрытым доступе ўсіх сабраных дадзеных на вайсковых пілётаў ВКС РФ, якія выконваюць злачынныя загады ў зьдзяйсьненьні ракетна-бомбавых удараў па мірных жыхарах у Сірыі і па ўмеранай сірыйскай апазыцыі. Ня гэтак даўно нашыя дзеяньні ўзарвалі расейскія сродкі масавай інфармацыі і нават змусілі прэс-сакратара прэзыдэнта Расеі Дзьмітрыя Пяскова зрабіць нязграбныя заявы пра “спэцслужбы, якія ўжо займаюцца пытаньнем бясьпекі пілётаў”. Таксама расейскі сэгмэнт Інтэрнэту быў вельмі напалоханы зьяўленьнем перакладаў інфармацыі пра пілётаў менавіта на арабскай мове.

Нагадаем, што сутнасьць нашага ультыматуму – спыніць злачынствы крамлёўска-тэрарыстычных сілаў ва Украіне і за ейнымі межамі. Публікацыя дадзеных кожнага асобнага пілёту адбываецца праз парушэньне расейскімі тэрарыстамі рэжыму спыненьня вагню на Данбасе.

Азнаёміцца ​​з усімі публікацыямі ў тэме ультыматуму і канфлікту ў Сірыі можна ў спасылцы.

17 і 18 кастрычніка 2015 году расейска-тэрарыстычныя сілы зьдзейснілі шэраг правакацыйных абстрэлаў ў раёне Пяскоў (Данецкая вобласьць), у выніку якіх быў паранены вайсковец збройных сілаў Украіны. У адказ на гэтае парушэньне мы публікуем дадзеныя штурмана бамбоўца Су-24М (бартавы нумар 16 “белы”) 6980-й гвардзейскай авіябазы.

Борт 16 (“белы”) быў зафіксаваны ў карных апэрацыях супроць Сірыйскага народу ў рэпартажы RT.

Выявіць дадзеныя экіпажу лятака нам удалося з дапамогаю відэа тэлеканалу “Звезда” (рас.) з рэпартажам пра вышкалы пілётаў 6980-й гв. АвБ.

На відэа штурман Антон Шульга дае інтэрвію журналісту на тле лятаку Су-24 з бартавым нумарам (“10”, “18” альбо “16”). Вызначыць, што Антон Шульга (18.02.1989 г.н., скончыў сярэднюю школу №16 гораду Чалябінска, скончыў ЧВВАКВШ у 2011 годзе) удзельнічае ў карнай апэрацыі ў Сірыі і ўскосна пацьвердзіць, што ён штурман 16 борту дапамаглі валянтэры з Цэнтра “Міратворац” (асобная падзяка супрацоўніку Цэнтра з пазыўным “Shurf”).

Падчас збору й аналізу інфармацыі было выяўленае, што Антон Шульга перад вылетам у Сірыю выдаліў у Сеціве практычна ўсе свае дадзеныя. Аднак, дапамагла яго выявіць, як гэта ня дзіўна –  ягоная ўласная жонка. Яна, вядома ж, намагалася напоўніцу прыхаваць дадзеныя свайго мужу, аднак ейныя нязграбныя дзеяньні патрапілі ў поле зроку аналітыкаў. Менавіта дзякуючы ейным  намаганьням мы атрымалі асноўную інфармацыю пра ейнага мужа – вайсковага злачынцу. У нас не было фатаздымкаў Антона Шульгі зь Сірыі, але толькі з Шагола, што пад Чалябінскам. І мы не былі на 100% упэўненыя ў тым, што ён паляцеў на Блізкі Усход. Але Наста Шульга адкінула ўсе сумневы. Напрыканцы верасьня 2015 году яна пачала раптоўна выдаляць з профілу ўсе фатаздымкі з мужам: акурат тады, калі пачалося перакідваньне расейскай авіяцыі ў Сірыю (на першым скрыншоце – фатаздымкі ў ейным профілі з 25-га верасьня, на другім – зь 17 кастрычніка; выдаленыя фота пазначаныя чырвоным). Ёй падалося гэта недастатковым, і яна вырашыла зьмяніць у сваім профілі прозьвішча. Гэтак мы даведаліся пра ейнае дзявочае прозьвішча, а дзякуючы гэтаму – пра папярэдняе мейсца жыхарства ў Беларусі і дату нараджэньня, а таксама дадаткова пераканаліся ў тым, што фатаздымкі з мужам зьніклі ня проста так. Праз вясельныя фатаздымкі, дбайна сабраныя Настай, мы атрымалі масу інфармацыі пра сваякоў мужа і пра яго самога.

Што дае нам падставы лічыць Антона Шульгу штурманам 16-га борту:

– ягоная жонка напрыканцы верасьня, падчас перакідваньня лятакоў у Сірыю, выдаліла ў сваім профілі ўсе фатаздымкі з мужам (першая спроба прыхаваньня сьлядоў);

– пазьней яна зьмяніла прозьвішча на дзявочае (другая спроба прыхаваньня сьлядоў).
– у сірыйскай апэрацыі ўдзельнічаюць Су-24М: 04 (белы), 05 (белы), 08 (белы), 16 (белы), 25 (белы), 26 (белы), 71 (белы); Су-24М2: 72 (белы), 74 (белы), 75 (белы), 76 (белы) (то бок з нашага сьпісу мы можам выключыць барты “10” і “18”).

Таксама мы зараз прадэманструем, як Мінабароны РФ хлусіць у сваіх заявах, згодна зь якімі авіяўдары зьдзяйсьняюцца нібы па баявіках “ІД”, але не па апазыцыі.

Праз аналіз відэа каналу “Расея 24” былі выяўленыя цікавыя дадзеныя. На 01:27 хранамэтражу відэа можна пабачыць мапу, на якой пазначаныя мейсцы авіяўдараў Су-24М ў раёне Эл-Латамна, Тель-Біса, Эр-Растан. У гэтым жа відэа мы бачым, што ў начных авіяўдарах 01 кастрычніка 2015 году прымалі ўдзел барты “05” і “26” “белы” з 6980-й гв. АвБ. Нагадаем, што група Інфармнапалм выявіла і апублікавала дадзеныя экіпажаў гэтых лятакоў у папярэдніх артыкулах.

Далей мы параўналі лякацыі авіяўдараў з інтэрактыўнай мапай грамадзянскай вайны ў Сірыі (чырвоным пазначаныя ўрадавыя войскі Сірыі, зялёным – ўмераная сірыйская апазыцыя). Як бачым, удары Су-24М 01 кастрычніка 2015 году былі зьдзейсьненыя па гарадох, якія кантралюе сірыйская апазыцыя.

Цяпер скарыстаемся відэа каналу “ВГТРК” з рэпартажам, які прысьвечаны начным ударам першага кастрычніка 2015 году. У ім мы можам пабачыць борт “16”, які і ажыцьцяўляў карныя налёты на Эл-Латамну, Тэль-Бісу, Эр-Растан.

Такім чынам, мы пацьвердзілі, што экіпаж борту 16 мае наўпроставае дачыненьне да бамбаваньня мірных сірыйскіх жыхароў і ўмеранай апазыцыі, а ягоныя пілёты зьяўляюцца вайсковымі злачынцамі.
Вайсковаму кіраўніцтву РФ мы нагадваем, што кожнае вайсковае злачынства, зьдзейсьненае як у Сірыі, гэтак і на Данбасе будзе мець асымэтрычны адказ з боку нашае міжнароднае валянтэрскае групы.

Матар’ял падрыхтаваны міжнароднай валянтэрскай групай InformNapalm і распаўсюджваецца на ўмовах ліцэнзыі Creative Commons. Перадрук або які-кольвек іншы распаўсюд інфармацыі з пазначэньнем крыніцы – вітаецца.

 Пераклаў на беларускую мову – Дзяніс Івашын