На «Армейскія гульні» ў Беларусь прыбылі два падразьдзяленьні ПДВ Расеі і падразьдзяленьне Росгвардыі – і ўсе яны ўдзельнічалі ў агрэсыі супроць Украіны.

З 22 жніўня да 4 верасьня ў Беларусі адбудуцца конкурсы VII Армейскіх гульняў, а менавіта «Палярная зорка», «Снайпэрскі рубеж» і «Пэўны прыём». З мэтай удзелу ў гульнях 17 жніўня  самалётам Іл-76 паветрана-касьмічных сілаў РФ з бартавым нумарам RA-78850 на аэрадром Баранавічы прыляцелі падразьдзяленьні ПДВ і Росгвардыі Расеі (вэб-архіў).

Пры гэтым, паводле дадзеных сэрвіса Flightradar, Іл-76 з бартавым нумарам RA-78850 17 жніўня выляцеў з аэрадрома Чкалаўскі ў Маскоўскае вобласьці, але пункт прыбыцьця зь невядомых прычынаў не ўказаны (вэб-архіў)

Удалося выявіць, што ў Беларусь прыбылі два расейскія падразьдзяленьні ПДВ (вэб-архіў) і падразьдзяленьне Росгвардыі «Витязь».

Па-першае, гэта 45-я асобная гвардзейская брыгада спэцыяльнага прызначэньня (в/ч 28337), якая базуецца ў мястэчцы Кубінка Маскоўскае вобласьці.

Вайскоўцы 45-е брыгады ўдзельнічалі ў акупацыі Крыма і баявых дзеяньнях на Данбасе, іх дадзеныя зафіксаваныя InformNapalm у базе расейскіх вайсковых частак, што бралі ўдзел у агрэсыі супроць Украіны.

Па-другое, гэта 11-я асобная гвардзейская дэсантна-штурмавая брыгада ПДВ (в/ч 32364). якая знаходзіцца ў горадзе Улан-Удэ, Буратыя. Гэтая брыгада «праславілася» тым, што ў студзені 2015 года 20 яе дэсантнікаў пасьля ўдзелу ў баявых дзеяньнях на Данбасе прыбылі назад у Буратыю ў выглядзе «груза-200».

Таксама ў Армейскіх гульнях у Беларусі удзельнічае 604-й цэнтар спэцыяльнага прызначэньня Росгвардыі «Витязь» (в/ч 3179) (вэб-архіў). Ёсьць дадзеныя, што байцы ЦСП «Витязь» бралі ўдзел у захопе Крыма, і за гэта атрымалі ўзнагароды разам з байцамі падразьдзяленьня «Бэркут» (вэб-архіў).

Дакладная колькасьць удзельнікаў «Армейскіх гульняў» з боку Расеі нідзе ня згадваецца.

Падбор гэтых збройных падразьдзяленьняў, што маюць досьвед удзелу ў агрэсыі супроць іншых краінаў, можа сьведчыць пра намер Расеі пад выглядам «Армейскіх гульняў» пачаць у Беларусі апэрацыю захопу накшталт крымскай. Або прынамсі гэтыя падразьдзяленьні атрымліваюць магчымасьць правесьці выведку на мейсцы перад непасрэдным пачаткам такой апэрацыі.

Служба маніторынгу беларускае рэдакцыі InformNapalm працягвае пільна сачыць за перасоўваньнямі вайскоўцаў і вайсковай тэхнікі краіны-агрэсара на тэрыторыі Беларусі пад выглядам вайсковых гульняў і вышкалаў, а таксама інфармаваць беларускае грамадзтва пра найбольш важныя факты, якія могуць уплываць на нацыянальную бясьпеку краіны. З гэтае нагоды мы заклікаем вас надаваць нам адпаведную інфармацыю праз сацыяльныя сеткі.