Каманда InformNapalm.org выявіла і ідэнтыфікавала чарговага расейскага спэцназаўца, які прайшоў праз “ўкраінскую камандыроўку” – вайскоўца-кантрактніка сумнавядомай 3-й брыгады ГРУ ГШ ЗС РФ в/ч 21208 з Тальяці – Яўген Курносаў, 23 лютага 1992 году нараджэньня, родам з Чэлябінска.

У сацсетках выяўленыя некалькі профіляў Яўгена Курносава:

– “УКантакце” https://vk.com/id116910598, архіў https://archive.is/AxpQX;

– “Мой Сьвет” http://my.mail.ru/mail/kurnosov.2318/, архіў https://archive.is/JsoB7;

– “Інстаграм” https://instagram.com/kurnosovevgeny/, архіў https://archive.is/K92HI.

У адрозненьні ад іншых расейскіх інтэрвэнтаў, інфармацыя, якую мае Я.Курносаў у “Укантакце” мінімальная, хаця на альтэрнатыўных крыніцах ён больш актыўны. Найбольш цікавай зьяўляецца ягоная старонка ў “Інстаграм”, зь якой удалося адсачыць ягоную “украінскую камандыроўку”, у тым ліку вызначыць геаграфію паводле геотэгаў, згодна зь якімі ён пасьпеў пабываць ва Украіне ў г.Луганску, а таксама ў Каменск-Шахцінску і Мілераве Растоўскае вобласьці РФ (дзе паводле нашых дадзеных разгорнутыя базавыя і перавалачныя лягеры расейскіх войскаў) – глядзіце фатападборку.

Тое, што Я.Курносаў зьяўляецца кадравым вайскоўцам ЗС РФ і ў прыватнасці 3-й брыгады спэцназу, пацьверджвае шэраг чынінкаў:

– Сяброўскае кола, у якім фігуруюць колішнія і дзеючыя вайскоўцы-кантрактнікі 3-й БрСпН (Я.Курносаў праходзіў тэрміновую службу ў гэтым жа злучэньні спэцназу ў 2011 годзе (архіў: https://archive.is/eQYli), пасьля чаго падпісаў кантракт);

  
– Відэаролікі з выступу агітбрыгады ў базавым лягеры акупацыйных сілаў у Растоўскае вобласьці з нефармальнымі сьцягамі ПДВ/СпН (выкладзеныя ў “Інстаграм” 2 тыдні таму);

– Фатаздымак з аэрадрому Мілерава Растоўскае вобласьці (выкладзены ў “Мой Сьвет” 26.06.2015 г., у “Інстаграм” 30.06.2015 г.), аэрадром актыўна выкарыстоўваюць расейскія акупанты для перакідваньня і ратацыі, на якой фіксуецца транспартны лятак “Іл-76”. Паводле ўдакладненай інфармацыі InformNapalm, гэты лятак знаходзіцца на балансе Унутраных войскаў МУС РФ (пра што сьведчыць адпаведная афарбоўка ў выглядзе трыкалёру на фюзеляжы). Згодна з рэестрам “Іл-76”, усяго на балансе УВ МУС РФ знаходзілася 12 адзінак гэтых машынаў, зь іх 2 лятакі (бартавыя нумары 76801 і 76825 – разьбіліся), 2 лятакі (бартавыя 76802 і 76826) знаходзяцца ў захоўваньні, з пазасталых 8 адзінак, адзін (бартавы 76829) мае стандартную афарбоўку, тыя сем, што засталіся (бартавыя 86887, 86888, 86925, 76803, 73804, 76827, 76828) пафарбаваныя ў колеры расейскага сьцягу. Інфармацыя пра палёты расейскай вайсковай авіяцыі на тэрыторыі РФ, тым больш пералёты з вайсковых аэрадромаў, закрытая, але паводле нашых дадзеных, з пачатку 2015 году на аэрадромах Растоўскае вобласьці быў зафіксаваны “Іл-76” з бартавым 76803.

Нагадваем, паводле назіраньняў InformNapalm.org, апошнім часам расейскае вайсковае камандаваньне перайшло да новай тактыкі задзейнічаньня сваіх вайскоўцаў на Данбасе. У пэрыяд “дзеяньняў менскіх дамоўленасьцяў” расейцы адмовіліся ад ужываньня звыклых тактычных групаў (БТГр/РТГр), бо буйныя баявыя адзінкі на Данбасе ня могуць заставацца незаўважанымі. Новая тактыка прадугледжвае прыкамандыраваньне да складу незаконных збройных фармаваньняў “Наваросіі” дробных групаў (аддзяленьне/узвод) вайскоўцаў у выглядзе ўзмацненьня і інструктараў, галоўным чынам, гэта адмыслоўцы вузкага профілю: выведнікі, снайпэры, якія раствараюцца сярод НЗФ баявікоў.

Заўвага: у траўні 2015 году расейскія вайскоўцы 3-й брыгады спэцназу ГРУ, якія трапілі ў палон, капітан Ярафееў і сяржант Аляксандраў у складзе зводнага падразьдзяленьня выконвалі баявыя задачы ў Луганскае вобласьці. Пасьля таго, як яны трапілі ў палон, асабісты склад камандыраваных спэцназаўцаў досыць хутка быў вывезены з Украіны, гл.:

– “У палон пад Шчасьцем патрапілі байцы тальяцінскага спэцназу ГРУ”

– “Хуткі адвод частак расейскага спэцназу з Луганска зьвязаны з пагрозай бунту – спэцназавец 3-й АБр СпН ГРУ РФ”

Таксама, нагадваем, што напачатку чэрвеня 2015 году ў Луганску былі выяўленыя і ідэнтыфікаваныя расейскія вайскоўцы 22-й брыгады спэцназу ГРУ (в/ч 11659, п. Сьцяпны, Растоўская вобласьць)

– “Ідэнтыфікаваныя вайскоўцы 22-й брыгады СпН ГРУ РФ, якія выконваюць баявую задачу ў Луганску”

Матар’ял да публікацыі падрыхтавалі: Іраклі Камахідзэ і krmvictory.
(с) Інфармацыя падрыхтаваная адмыслова для сайта InformNapalm.org, падчас перадруку й выкарыстаньня матар’ялу спасылка на аўтара і наш праэкт абавязковая.

Пераклад Дзяніса Івашына.