20 сакавіка надыйшла інфармацыя пра выяўленьне інфікаваных каронавірусам Covid-19 пасажыраў на лятаку беларускай авіякампаніі “Белавія”, які зьдзяйсьняў міжнародны рэйс у Казахстан. Рэспубліка Беларусь не зачыніла сваіх межаў і ў адрозьненьні ад большасьці суседніх зь ёю краінаў не ўвяла карантын. Гэта абвастрае ня толькі пагрозу для жыцьця й здароўя грамадзянаў Беларусі, але й стварае рэальную небясьпеку для міжнароднае супольнасьці й спрыяе пашырэньню пандэміі каронавірусу. Падаем артыкул рэдактара беларускае службы міжнароднае выведвальнае супольнасьці InformNapalm Дзяніса Івашына, апублікаваны ў выданьні «Новы Час».

Як заявіў афіцыйны прадстаўнік Міністэрства аховы здароўя Рэспублікі Казахстан Дыяс Ахметшарып, на борце авіякамапані «Белавія» былі выяўленыя два пасажыры, 1972 і 1981 гадоў нараджэньня, інфікаваныя каронавірусам.

Лятак выконваў палёт паводле маршруту Менск – Нур-Султан, аднак быў перанакіраваны ў Караганду. «Новы Час» вэрыфікаваў гэтую інфармацыю й атрымаў дадатковыя зьвесткі.

Паводле дадзеных кыргызстанскага інфармацыйнага рэсурсу AKIpress, усе 67 пасажыраў лятаку авіякампаніі «Белавія», які зьдзяйсьняў рэйс зь Менска ў сталіцу Казахстана Нур-Султан (колішняя Астана), патрапілі ў карантын. Беларуская авіякампанія перавозіла грамадзянаў Кыргызстану, якія вярталіся з эўрапейскіх краінаў.

Згодна з дадзенымі гісторыі палётаў анлайн-сэрвісу Flighradar24, які надае інфармацыю з трэкінга камэрцыйных авіярэйсаў, адзіным бортам зь Менска, які накіроўваўся ў Нур-Султан і быў перанакіраваны ў аэрапорт Караганды, зьяўляецца рэйс B2775 авіякампаніі «Белавія». Супрацоўнікі міжнароднага аэрапорту Нур-Султан пацьвердзілі «Новаму Часу», што вядзецца менавіта пра гэты борт.

17 сакавіка 2020 года рэйс B2775 зьдзяйсьняў лятак Embraer E195LR (бартавы нумар EW-399PO, с/н 19000667). Ён быў выраблены ў 2014 годзе, у красавіку гэтага ж года паступіў у паветраны флёт кампаніі «Белавія».

Embraer E195LR (б/н EW-399PO) авіякампаніі “Белавіа” / Jetphotos, Kuba Majek

Вызначанае, што з нацыянальнага аэрапорту «Менск» борт выляцеў 17 сакавіка а 20.15 паводле менскага часу й а 03:15 мясцовага часу меўся прызямліцца ў аэрапорце  Нур-Султана, аднак быў перанакіраваны ў аэрапорт Караганды, у якім прызямліўся а 03:11. Характэрна, што ўсе іншыя палёты гэтага рэйсу, а таксама другога (B2773), якія папярэднічалі яму й адбываліся пасьля, не былі скіраваныя ў Караганду, а выконвалі палёты ў штатным рэжыме. Вынікае, што менавіта падчас палёту на гэтым лятаку ў пасажыраў былі выяўленыя сымптомы захворваньня каронавірусам Covid-19, і ў межах захаваньня карантынных захадаў рэйс B2775 перанакіравалі не ў сталіцу, але ў суседнюю Караганду.

Ці зьдзяйсьняліся належныя санітарна-эпідэміялагічныя захады на борце лятаку яшчэ ў Казахстане? Як паведаміў «Новаму Часу» начальнік аддзелу па надзвычайных сытуацыях аэрапорту Нур-Султан Марат Кундакбаеў, для выкананьня ўсіх дэзынфэкцыйных захадаў на борце лятака патрэбна больш за гадзіну часу. Таксама ён дадаў, што лятакі зь Беларусі пакуль не патрапляюць пад падвышаны карантынны кантроль, гэта датычыць толькі бартоў з краінаў – асноўных агмянёў распаўсюду каронавірусу на гэты момант: Кітаю, Ірану й Італіі.

З гэтага вынікае, што, цалкам мажліва, ані ў Карагандзе, ані ў сталіцы Казахстана ў лятаку «Белавія», у якім былі выяўленыя інфікаваныя карановірусам пасажыры, не зьдзяйсьняліся належныя дэзынфэкцыйныя захады.

У прэс-службе авіакампаніі «Белавія» паведамілі, што дэзынфэкцыя лятаку рэйсу B2775 была зьдзейсьненая, аднак не пацьвердзілі інфармацыю, ці былі пасажыры на зваротным рэйсе з Нур-Султана ў Менск. Таксама прэс-служба адмовілася надаваць зьвесткі адносна зьмяшчэньня экіпажу лятаку й бортправаднікоў у карантын.

Заўвага рэдакцыі. Калі дэзынфэкцыя ад каронавірусу на борце лятака не праводзілася й на ягоны борт былі ўзятыя пасажыры заплянавага рэйсу, якіх даправілі ў Менск, – гэта можа мець азнакі зьдзейсьненага злачынства.

«Новы Час» зьвярнуўся з пытаньнем і да прэс-службы Нацыянальнага аэрапорту «Менск», каб высьветліць, чаму інфікаваныя каронавірусам былі выяўленыя не на тэрыторыі аэрапорту, але ўжо непасрэдна на борце лятаку «Белавія». У выніку атрымалі інфармацыю пра тое, што санітарна-эпідэміялягічны кантроль у аэрапорце зьдзяйсьняюць супрацоўнікі Рэспубліканскага цэнтру гігіены, эпідэміялёгіі й грамадзкага здароўя, аднак праводзіцца ён толькі й выключна ў дачыненьні да тых пасажыраў, якія прылятаюць у галоўную беларускую паветраную гавань. Кантроль пасажыраў на вылет практычна адсутнічае.

На жаль, гэта можа сьведчыць пра адсутнасьць паўнавартаснага санітарна-карантыннага кантролю ў Нацыянальным аэрапорце «Менск», у межах якога мае зьдзяйсьняцца пераверка ўсіх пасажыраў, але ня толькі тых, якіх прылятаюць у Беларусь. Праз гэтыя дзеяньні, ці, больш слушна, іхную адсутнасьць, можа адбывацца пашырэьнне эпідэміі каронавірусу, што яскрава дэманструе выпадак з выяўленьнем інфікаваных пасажыраў на борце лятаку кампаніі «Белавія», які вылецеў зь Менска й выконваў міжнародны рэйс. Гэта ня толькі ўплывае на міжнародны прэстыж нашай краіны, але наўпрост закранае пытаньні нацыянальнае бясьпекі Беларусі, абароны жыцьця й здароўя нашых уласных грамадзянаў.

Дзяніс Івашын, «Новы Час»