Ваколіцы газаперапрацоўнага заводу кампаніі Hayan Petroleum Company – пункт сталай дысьлякацыі групы расейскіх наймітаў з прыватнай вайсковай кампаніі (ПВК) «Вагнэр» у Сірыі. Такую выснову зрабілі валянтэры міжнароднае выведвальнае супольнасьці InformNapalm, якія выявілі новыя фота наймітаў і зьдзейсьнілі геапазыцыянаваньне здымкаў.

Калі мёртвыя могуць распавесьці больш, чымся жывыя.

5 верасьня малдоўскае выданьне AVA.MD апублікавала дадзеныя расейскага найміта Апостала Уладзіслава Іванавіча, пазыўны «Волк» (рас.), грамадзяніна Расейскае Федэрацыі й Рэспублікі Малдова. Ён знаходзіўся ў складзе расейскага атраду, які спрабаваў штурмаваць газаперапрацоўны завод CONOCO 7 лютага 2018 г. і загінуў у выніку высокадакладнага ўдару авіяцыі й бесьпілётнікаў ВПС ЗША.

Каманда InformNapalm зьвярнула ўвагу на адзін з асабістых фатаздымкаў Уладзіслава Апостала.

З наяўнасьці ў фота ўпрыгожанай і палітай навагодняй ялінкі, можна меркаваць, што яно зробленае напачатку студзеня, прыблізна за месяц да гібелі найміта.

На заднім пляне можна пабачыць трубы й рэзэрвуары нафтагазавага заводу.

Валянтэры InformNapalm зьдзейсьнілі геапазыцыянаваньне й вызначылі мейсца здымкі – гэта паўночна-заходні бок газаперапрацоўнага заводу кампаніі Hayan Petroleum Company. Вызначэньне геалякацыі фатаздымку Апостала было зробленае з дапамогаю відэа расейскіх прапагандыстаў.

Цікава, што раней, на тэрыторыі гэтага заводу была зафіксаваная яшчэ адная група «вагнэраўцаў» разам зь вядомым расейскім наймітам-нэанацыстам Аляксеем Мільчаковым, які ўдзельнічаў і ў вайне на Данбасе на баку расейскіх акупацыйных войскаў. Апроч гэтага, перад галоўным будынкам заводу ўсталяваны помнік наймітам ПВК «Вагнэр».

Але гэта яшчэ ня ўсе пазлы: 8 ліпеня 2018 г. непадалёк гэтага заводу сфатаграфаваўся (архіў фота) на тле будаўнічай тэхнікі расеец Яўген Шапавалаў (архіў акаўнту, фатаздымкаў, кантактаў). Ён выклаў здымак у фотаальбоме з назовам «работа.». Каардынаты мейсца фатаграфаваньня: 34.60782200, 37.89565300. Што менавіта будуюць вагнэраўцы на сваёй базе з дапамогаю аўтакранаў – пытаньне пакуль застаецца адкрытым.

Яшчэ адное фота сьведчыць пра тое, што ў Сірыю Яўген Шапавалаў і ягоныя калегі патрапілі не звычайным чынам, але на борце лятаку Іл-76 вайскова-транспартнае авіяцыі ВПС РФ. Фота з грузавога адсеку:

З дапамогаю выяўленых новых фатаздымкаў удалося пацьвердзіць прысутнасьць у раёне газаперапрацоўнага заводу кампаніі Hayan Petroleum Company групы наймітаў ПВК «Вагнэр», якія выкарыстоўваюць тэрыторыю заводу як мейсца сталай дысьлякацыі. Гэтая інфармацыя можа быць карысная для сілаў кааліцыі, каб запабегчы новым спробам расейцаў штурмаваць і захопліваць нафтаперапрацоўныя аб’екты ў Сірыі.

Матар’ял падрыхтаваў Міхаіл Кузьняцоў адмыслова для сайту міжнароднае выведвальнае супольнасьці InformNapalm.

Рэдагаваў і пераклаў на беларускую мову Дзяніс Івашын.

Пашырэньне й перадрук з спасылкаю на крыніцу вітаюцца!
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.