Сёньня ад інсайдэраў InformNapalm прыйшла цікавая інфармацыя пра “камбата Козыра” з “7-й брыгады ДНР”, якога мы нядаўна ўжо фіксавалі на відэа.

Як мы паведамлялі раней, 4 жніўня 2015 году камандыр “1-га батальёна 7-й брыгады ДНР” Казырэнка Андрэй Уладзімеравіч (пазыўны “Козыр”), 1969 г.н., у нецьвярозым стане зайшоў на блёкпост і здаўся украінскім сілавікам ў раёне пгт Міронаўскага. (пруф: https://informnapalm.org/11382-kombat-dnr-slavyansk-video).

Баявікі працягваюць разважаць пра ўчынак свайго баявога камандыра ў іхных шэрагах заўважаная пэўная насьцярожанасьць і разгубленасьць.
У сеціве мы знаходзілі розныя трактоўкі гэтай падзеі з боку тэрарыстаў “ДНР”: адныя сьцьверджвалі, што “Козыр” гераічна загінуў, падбіваючы ўкраінскі танк, іншыя – лічаць ягоны ўчынак прагматычным і заплянаваным.

Адная з вэрсыяў, якая была знойдзеная ў сеціве і мае аўтарства расейскага прапагандыста і актыўнага тэрарблёгера Аляксандра Жучкоўскага, дае цікавыя падрабязнасьці (пруф: http://vk.com/wall151630709_28200):

Фота: Аляксандар Жучкоўскі / Тост за “Козыра”

“Што да гісторыі зь вядомым камандырам “Козырам”. Гісторыя вельмі дзіўная і непрыемная. Часткова пра гэта пісаў “Чырвонец”: http://chervonec-001.livejournal.com/775105.html. Ня ведаю, што спрычынілася да гэтых дзеяньняў “Козыра”, але ўжо ясна, што ён да гэтага рыхтаваўся. Перад сваім сыходам з групай на ўкраінскі блёкпост ён быў нецьвярозы, зьняў папаху і нацельны крыжык з просьбай перадаць яго сваякам. Пры сабе ў яго была толькі граната і адзін ПМ. Калі група выйшла да блёкпосту, “Козыр” кінуў ва ўкраінскі танк гранату і загадаў людзям адыходзіць. Група (12 чалавек) адыйшла, байцы пачулі толькі адзін стрэл з пісталету. А пасьля зьявілася вядомае відэа допыту “Козыра” украінцамі. Гэта мне распавялі ягоныя калегі. Я з “Козырам” не працаваў, таму не магу казаць і высоўваць вэрсыі, што зь ім адбылося. Адназначна толькі тое, што гэта быў крок усьвядомлены.

Зараз адбываецца зусім незразумелы мне прэцэдэнт – 7 брыгаду ДНР (часткай якою быў батальён “Козыра”) уводзяць у корпус ЛНР. Магчыма – з-за таго, што адбылося з “Козырам”. Брыгаду выводзяць з Дэбальцава, сюды ўжо панаехала начальства з ЛНР і апісвае маёмасьць падразьдзяленьняў. Брыгада і так рассыпалася, а цяпер байцы масава адтуль сыходзяць”.

Ну і ў дадатак вышэйсказанага расейскім тэрарыстам, маюцца дадзеныя, што верныя “Козыру” баявікі разглядаюць учынак іхнага камандыра, як заклік да дзеяньняў. Верагодна, не апошнюю ролю гуляюць заявы “Козыра” пра “Менск, як піяр з 4-х бакоў” і сыгнал пра належнае стаўленьне да вайсковапалонных з боку ЗСУ. Паралельна, на дадзены момант у інфармацыйным полі з боку расейскай прапаганды, нагнятаецца страх і агрэсыя. Падкантрольныя РФ СМІ запускаюць чуткі пра  напад з боку Украіны, які мае адбыцца неўзабаве і паралельна рыхтуюць падкантрольныя ім падразьдзяленьні да атакуючых дзеяньняў, верагодна, з спадзевам зьнішчыць “дзікія” брыгады ў мясарубцы першага эшалёну атакі. У такіх умовах перад ідэйнымі прадстаўнікамі мясцовага “апалчэння”, якім быў “Козыр”, паўстае пытаньне выжываньня: альбо весьці перамовы і здавацца украінскім сілавікам, альбо стаць інструмэнтам гульні Крамля і загінуць за чужыя інтарэсы…
Матар’ял падрыхтаваў Раман Бурко, адмыслова для InformNapalm.org. Падчас перадруку й выкарыстаньня матар’ялу спасылка на наш праэкт абавязковая.

Пераклад Дзяніса Івашына