Правакацыя ФСБ з выкраданьнем колішняга працаўніка Запарожскае АЭС Яўгена Панова і абвінавачаньне яго ў падрыхтоўцы тэрактаў на тэрыторыі акупаванага Крыма спрычынілася да вялізнага міжнароднага й грамадзкага рэзанансу. Шэраг палітыкаў і грамадзкіх дзеячоў розных краінаў сьвету ацанілі гэтую інфармацыйную апэрацыю Расеі як штучна створаны casus belli і нават параўналі з Гляйвіцкім інцыдэнтам, які стаўся адной з падставаў да пачатку Другой усясьветнай вайны. Але калі РФ штучна стварае інфармацыйныя падставы для абвінавачаньня Украіны ў дывэрсіях, то Украіна насупраць можа прадэманстраваць сотні фактаў агрэсіі з боку РФ, у тым ліку дадзеныя што да перасячэньня расейскімі тэрарыстамі зь мінамётамі дзяржаўнае мяжы і зьздяйсьненьня абстрэлаў украінскіх сілавікоў. Гэтая публікацыя прысьвечаная аднаму з такіх інцыдэнтаў.

Яна падрыхтаваная на падставе матар’ялаў, атрыманых ад камандыра ўзводу радыёхімічнае і бактэрыялягічнай выведкі 79-й асобнай аэрамабільнай брыгады (ААЭМБр) лейтэнанта Віктара Міхайлюк. У расьледаваньні раскрытыя падрабязнасьці абстрэлаў падразьдзяленьняў украінскіх войскаў дывэрсійнымі групамі расейскіх вайскоўцаў з выкарыстаньнем мінамётаў. У матар’яле пададзеныя фотафакты фіксацыі пазыцыяў мінамётных разьлікаў, якія заходзілі на тэрыторыю Украіны з тэрыторыі РФ.

Першы мінамётны абстрэл каманднага пункту 79-й ААЭМБр ЗСУ расейскімі падразьдзяленьнямі быў зьдзейсьнены ўначы зь 1 на 2 ліпеня 2014 году. Тады расейцы выпусьцілі 15 мінаў з калібрам 82-мм па КП 79-й брыгады ў раёне вышыні 214,7 (каардынаты 47.887803, 39.152806 на схеме пазначаная як пункт А). Пасьля заканчэньня абстрэлу манэўровая група высунулася для пошуку варожых мінамётнікаў і іхнае пазыцыі, якая была выяўленая на скрыжаваньні пасадак (каардынаты 47.877537, 39.186252 на схеме пазначаная як пункт Z) і якая знаходзілася на тэрыторыі Украіны за 2,5 км ад КП брыгады. Група гэтак жа адсачыла маршруты, з дапамогаю якіх расейскія мінамётнікі патрапілі на тэрыторыю сумежнай сувэрэннай дзяржавы і адыйшлі пасьля заканчэньня абстрэлу (адзначаныя чырвонай і сіняй лініяй). Дадаткова на схеме ніжэй кропкамі B і C пазначаныя мейсцы выбухаў мінаў, якія Віктар сфатаграфаваў у той день.

Пасьля гэтага інцыдэнту уздоўж пэрыметру лягеру, апроч пастоў былі выстаўленыя сакрэты, якія знаходзіліся на адлегасьці 3,5 – 4 км ад КП брыгады. На адным з такіх сакрэтаў старэйшым баявой варты заступаў Віктар. Ён знаходзіўся на скрыжаваньні пасадак (каардынаты 47.877593, 39.197845 на схеме ніжэй пазначаныя як пункт A) і зьдзяйсьняў візуальнае назіраньне за лініяй дзяржаўнай мяжы з РФ. Заступіўшы 7 ліпеня на баявую варту ў сакрэт, Віктар зрабіў некалькі здымкаў для таго, каб ўначы, у выпадку фікасацыі сьвятла ад машынаў і тэхнікі, ацаніць мейсцазнаходжаньне аб’ектаў. Уначы з 7 на 8 ліпеня ля 01:00 назіральнік заўважыў ўспышкі мінамётаў. Віктар перадаў інфармацыю ў лягер і атрымаў дазвол на вядзеньне вагню па пазыцыі расейскіх мінамётнікаў (каардынаты 47.856943, 39.195502 на схеме ніжэй пазначаныя кропкай Z). Па супраціўніку быў адкрыты вагонь з АГС-17 (аўтаматычны станкавы гранатамёт). Праз тое, што ён мае максымальную далёкасьць стральбы 1700 мэтраў, а да пазыцыі мінамётнікаў было крыху болей за 2000 мэтраў, разрывы гранатаў адбываліся перад мінамётнымі разьлікамі супраціўніку. Расейскія вайскоўцы праз абстрэл спынілі стральбу і пачалі сьпешна адступаць на тэрыторыю РФ. Віктар выклікаў артылерыю, але нанесьці ўдар у патрэбны квадрат яна не змагла, бо цэль знаходзілася за 400 мэтрах ад мяжы. Снарады маглі патрапіць на тэрыторыю РФ, што было б адразу ўспрынятае за акт агрэсіі з боку Украіны.

Раніцой 8 ліпеня байцы 79-й брыгады на двух БТР і аўтамабілі УАЗ высунуліся на пазыцыі расейцаў і выявілі сьляды чатырох 120-мм мінамётаў. На мейсцы былі знойдзеныя: пліта ад 120-мм мінамёту (на ёй быў фарбаю насены нумар 8697) з прывязанымі да яе каламі ад армейскага намёту для пераноскі, асабістыя рэчы, плашч-намёты, некалькі папругаў, чахлы з расфарбоўкаю “флора”, кепкі з расейскім “лічбавым” камуфляжам і зь зьнятымі цэшкамі, цывільны цалёўнік “ПОСП3-9X42”.

У той ранак было вельмі вільготна, бо ўначы ішоў дождж, таму можна было выразна пабачыць сьляды, скуль расейскія мінамётнікі прыйшлі на тэрыторыю Украіны. Плюс, у так званай “нулявой” пасадцы падчас ранішняга агляду былі выяўленыя сьвежыя сьляды й некалькі вайсковых плашч-намётаў (на схеме пазначанае пунктам H).

Нагадаем, што нядаўна валянтэры InformNapalm апублікавалі расьледаванне «Абстрэлы Украіны з тэрыторыі РФ у жніўні 2014-га. Аналіз спадарожнікавых здымкаў 539 варанок».

Матар’ял да публікацыі падрыхтаваў валянтэр InformNapalm Міхаіл Кузьняцоў.

На беларускую мову пераклаў Дзяніс Івашын.

 (CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.