Нядаўняе стварэньне маніторынгавага цэнтру дапамогі зьніклым і пацярпелым дзецям у РФ супала з абраньнем “ўпаўнаважаных” ў правах дзіцяці ў ЛНР і ДНР. Гэтыя падзеі адбыліся практычна сынхронна, што выклікала прыцягненьне да гэтага ўвагі грамадзкасьці. Падчас дэталёвага разгляду працы гэтых наваствораных фармаваньняў асаблівую цікавасьць выклікалі БПЛА, якія яны ўзялі “ва ўзбраеньне”.

Як паведамілі izvestia.ru, Нацыянальны маніторынгавы цэнтар дапамогі зьніклым і пацярпелым дзецям (“АОГ НМЦППиПД”, рас.) аб’яднаў намаганьні дзяржведамстваў у пошуку зьніклых дзяцей, выкарыстоўваючы дзеля гэтага бесьпілётныя лятальныя апараты (БПЛА).

Заснавальнікам цэнтру стаўся Павал Астахаў, кіраўнік Асацыяцыі ўпаўнаважаных у правах дзіцяці, і Станіслаў Скусаў, кіраўнік арганізацыі “Кібэрдружына” (праэкт ЛБІ ў барацьбе зь дзіцячай парнаграфіяй у інтэрнэце). Сярод заснавальнікаў “НМЦППиПД” фігуруе таксама Валерый Салянін, адзін з кіраўнікоў грамадзкага руху “Муніцыпальны шчыт Масквы”. Філіі новай структуры ўжо былі створаныя ў 23 рэгіёнах Расеі.

У сярэдзіне чэрвеня Прэс-служба Упаўнаважанага пры прэзыдэнце Расейскай Фэдэрацыі ў правах дзіцяці заявіла пра тое, што ў “Луганскае народнае рэспубліцы” (“ЛНР”) заснаваны пост Упаўнаважанага ў правах дзіцяці. На гэтую пасаду была прызначаная Натальля Хоршава, якая раней займала пасаду кіраўніка Адміністрацыі галавы “ЛНР”.

Характэрна, што ў траўні гэтага году Упаўнаважаны пры прэзыдэнце Расеі ў правах дзіцяці Павал Астахаў адмовіўся абараніць 17-гадовую Хеду Гайлабіеву, якую прымусілі выйсьці замуж за 46-гадовага начальніка Нажай-Юртаўскага РАУС Чачэніі Нажуда Гучыгава.

Тым ня менш, навастворанае ведамства дало выразна зразумець, што менавіта БПЛА для іх зьяўляюцца прыярытэтным накірункам і менавіта зь іхнай дапамогай новыя структуры плянуюць вырашаць “праблемы дзяцей”.

Цяпер варта ўзгадаць адзін з відэасюжэтаў, сфільмаваных у ліпені 2014 году, у якім паведамляецца, што ўкраінскія памежнікі зьбілі расейскі бесьпілётнік мадыфікацыі Zala 421-08 (відэа).

Група кампаніяў ZALA AERO на цяперашні момант зьдзяйсьняе поўны цыкль распрацоўкі і вытворчасьці бесьпілётных лятальных апаратаў.

Як паведамляецца на іх афіцыйным сайце zala.aero, у 2008 годзе ў Арктыцы паводле замовы ЦНДІ Марфлота адбыліся выпрабаваньні БЛА ZALA 421-08 і ZALA 421-06. Запуск быў зьдзейсьнены з борту судна. У 2011 годзе БПЛА ZALA выкарыстоўваліся падчас ліквідацыі надзвычайнай сытуацыі на арсэнале захоўваньня боепрыпасаў МА РФ у п.Пугачове, Малапургінского раёну Удмурцкае Рэспублікі. У 2014 годзе была зьдзейсьненая пастаўка 5 комплексаў у МУС Расеі і 8 комплексаў у МНС Расеі. На цяперашні момант у МУС Расеі створана больш за 30 авіяцыйных атрадаў спэцыяльнага прызначэньня, і столькі ж – у МНС Расеі.

Характэрна, што падчас прэзэнтацыі праэкту “НМЦППиПД” на фота з удзелам Валерыя Саляніна і Паўла Астахава таксама можна заўважыць і інфармацыйныя стэнды з БПЛА, пра якія заяўлялі ў сваіх інтэрвію сузаснавальнікі цэнтру. Гэта тыя самыя ўзоры БЛА ZALA.

Фатаздымкі з Валерыем Саляніным, знойдзеныя на ягонай старонцы ў сацсеціве facebook, таксама дэманструюць і правядзеньне кансультацыйных сустрэчаў у Крамлі з упаўнаважанай у правах дзіцяці пры галаве “ДНР” Янай Чэпікавай.

Мы ня хочам рабіць хуткія высновы, але ў выпадку, калі пасьля навінаў пра зьнішчэньне расейскага БПЛА ZALA, які зьдзяйсьняў выведку ўкраінскае тэрыторыі для чарговага абстрэлу з РСЗА або ажыцьцяўленьня наступальных апэрацыяў, вы пачуеце заявы пра тое, што гэты бесьпілётнік “шукаў зьніклых дзяцей”, не зьдзіўляйцеся – усё ў межах кансультацыяў.

Аўтар: Дзьмітры Настын

(с) Інфармацыя падрыхтаваная адмыслова для сайта InformNapalm, падчас перадруку й выкарыстаньня матар’ялу спасылка на наш праэкт абавязковая.

Пераклад Дзяніса Івашына