Сёньня, 3 траўня, Паветрана-касьмічныя сілы (ПКС) РФ у Сірыі страцілі шматмэтавы зьнішчальнік Су-30СМ. Паволе паведамленьня Міністэрства абароны РФ, сёньня а 08:45 пасьля ўзьлёту з аэрадрому Хмэймім над акваторыяй Міжземнага мору адбылася катастрофа расейскага зьнішчальніка Су-30СМ. Зазначанае, што загінулі абодва пілёты.

Міністэрства абароны дзяржавы-агрэсара папярэдняй прычынай авіякатастрофы называе мажлівае патрапленьне птушкі ў турбіну рухавіку й адкідвае вэрсіі што да зьбіцьця яго супраціўнікам зь зямлі.

Мясцовы сірыйскі апэратар і фатограф Mohammed Ghorab апублікаваў у сваім твітэры некалькі фатаздымкаў моманту крушэньня расейскага зьнішчальніка:

fall of a #Russian plane in the sea off the port city of #Jabla in #Syria pic.twitter.com/M9b2loCTMA

— MOHAMMED GHORAB (@MGhorab3) May 3, 2018

Крушэньне Су-30СМ адбылося непадалёк партовага гораду Jableh, што месьціцца за 2,5 км на паўднёвы захад ад авіябазы Хмэймім.

Спадарожнікавае фота Google Earth

Су-30СМ – гэта мадэрнізаваны двухмясцовы шматмэтавы зьнішчальнік пакаленьня 4+, збудаваны на базавай мадэлі Су-27. Абсталяваны двума двухконтурнымі фарсаванымі турбарэактыўнымі рухавікамі з кіраваным вэктарам цягі АЛ-31ФП, з дапамогаю якіх забясьпечваецца звышманэўраванасьць лятака. Першы ягоны палёт адбыўся ў 2012 годзе.

Зьнішчальнік Су-30СМ ПКС РФ у Сірыі / Фота – Аляксандар Калаціла

Лятак можа сягаць максымальнай хуткасьці на вышыні – 2350 км/г, мае баявы радыюс 1500 км, можа несьці да 8 тонаў баявой нагрузкі. Зьнішчальнікі Су-30СМ вырабляе Іркуцкі авіяцыйны завод ПАО “Карпарацыя “Іркут”. Кошт аднаго лятака складае прыблізна 25-30 млн даляраў ЗША.

Пасьля чарговай заявы У. Пуціна ў сьнежні 2017 г. пра сканчэньне ваеннай апэрацыі ў Сірыі й вывад ваеннага кантынгенту, ПКС РФ зазналі ўжо шэраг вельмі значных стратаў і катастрофаў, апошняя зь якіх адбылася ў сакавіку 2018 году, калі падчас заходу на пасадку на аэрадром Хмэймім разьбіўся вайскова-транспартны лятак Ан-26. У катастрофе загінулі 33 пасажыры й 6 чальцоў экіпажу.

Чытайце таксама:

• Лятакі Су-30СМ, выяўленыя ў аэрапорце Латакіі, і сірыйскія маніпуляцыі РФ.
• Чужыя дзеці: сабраныя дадзеныя экіпажу расейскага зьнішчальніка Су-30СМ у Сірыі.
•  У Сірыі падчас узьлёту разьбіўся расейскі франтавы бамбовец Су-27.
• Асабістыя дадзеныя 116 афіцэраў ПКС РФ, якія зьнішчаюць мірнае насельніцтва ў Сірыі (інфаграфіка).

Матар’ял да публікацыі падрыхтаваў рэдактар беларускае службы міжнароднае выведвальнае супольнасьці InformNapalm Дзяніс Івашын.

Падчас выкарыстаньня інфармацыі актыўная спасылка на крыніцу абавязковая.
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.