Міжнародная валянтэрская супольнасьць InformNapalm працягвае публікаваць пэрсанальныя дадзеныя лётнага i каманднага складу расейскіх Паветрана-касьмічных сілаў (ПКС), датычных да бамбаваньня мірных гарадоў і вёсак Сірыі. У выніку чрговага авіяўдару быў забіты доктар Хасан, знаёмы нашым чытачам праз свае нядаўняе эксклюзыўнае інтэрвію. У зьвязку з гэтым мы вырашылі скасаваць мараторый і працягнуць сэрыю публікацыяў пра афіцэрскі склад ПКС РФ, датычны да гібелі мірных сірыйскіх жыхароў. Гэтым разам фігурантам нашага расьледаваньня зьяўляецца камандыр 559-га бамбавальнага авіяпалку з Растоўскае вобласьці палкоўнік Надуда і шэраг пілётаў гэтага авіяпалку.

Пачаткам расьледаваньня стаўся аналіз шэрагу відэарэпартажоў расейскае тэлевізыі, у тым ліку на расейскім 1-м канале (архіў матар’ялу, рэзэрвовая копія відэароліку). Рэпартажы былі паказаныя напрыканцы 2013 г., у якіх палкоўнік Надуда пададзены ў статусе камандыра 559-га бамбавальнага авіяпалку 4-га камандаваньня (арміі) ВПС і СПА з Марозаўска (в/ч 75392, раней в/ч 40491-Г і в/ч 21385, Растоўская вобл.), куды пачалі паступаць найноўшыя шматфункцыянальныя зьнішчальнікі-бамбоўцы.

Паводле інфармацыі расейскіх СМІ з 18 студзеня 2016 году, выконваючым абавязкі камандыра 559-га бамбавальнага авіяпалку ў Марозаўску зьяўляецца падпалкоўнік Максім Дотц (архіў профілю), штатная пасада якога – намесьнік камандыра ў працы з асабістым складам (па-простаму – зампаліт) гэтага ж авіяцыйнага палку. Узьнікае слушнае пытаньне: куды ж падзеўся палкоўнік Надуда? Відаць па ўсім, камандыр палку разам з большай часткаю бамбоўцаў Су-34 і асабістым складам выправіўся ў блізкаўсходнюю камандыроўку.

У выніку зьдзейсьненага OSINT (выведка адкрытых крыніцаў) атрымалася вызначыць наступнае.

Палкоўнік Генадзь Станіслававіч Надуда, 01.01.1967 г.н., родам зь Першатравеньска Мікалаеўскай вобласьці Украіны. У 1988 годзе скончыў Чарнігаўскую вышэйшую вайсковую авіяцыйную вучэльню лётчыкаў (ЧВВАВЛ), факультэт зьнішчальнае авіяцыі. На працягу апошніх гадоў Г.Надуда служыў на Далёкім Усходзе РФ, у Прыморскім краі, скуль і быў пераведзены з падвышэньнем на поўдзень Расеі.

Сямейны стан – жанаты, двое дзяцей. Дачка – Алена Генадзьеўна Надуда (профіль у сацсеціве «VK», выдалены), 26 гадоў, спэцыяліст 1-га разраду 13-й групы базавай экспэртна-крыміналістычнай службы Упраўленьня фэдэральнай службы ў кантролі за абаротам наркотыкаў у Растоўскае вобласьці. Сын – Станіслаў Генадзевіч Надуда (профіль у сацсеціве «ОК»), 12 гадоў, жыве з бацькамі ў г. Марозаўску.

Сам Генадзь Надуда досыць актыўны ў інтэрнэт-прасторы, мае некалькі профіляў ў розных сетках, форумах і нават на сайце знаёмстваў:

• «VK» – першы профіль (архіў профілю, фотаальбому, кантактаў), другі профіль (неактыўны);
• Facebook– архіў профілю;
• «Мой Мир» (рас.)– архіў профілю;
• сайт знаёмстваў Badoo – архіў профілю.

Нумар тэлефону Надуды +79147100355 (апэратар МТС). Эл. пошта gestapil2009@mail.ru. Меркавана, карыстаецца аўтамабілем Mercedes-Benz ML клясы чорнага колеру з рэгістрацыйным нумарам Р995РО/39RUS (стары аўтамабіль Toyota, рэг.нумар Р510АВ/125RUS, падарыў дачцы).

Фотаальбомы палкоўніка Надуды маюць вельмі шмат патасна-глямурных здымкаў:

У ягоных альбомах ёсьць нават фатаздымак з сустрэчы выпускнікоў Чарнігаўскае лётнае вучэльні 1988 году, якая адьылася некалькі гадоў таму.

Нягледзячы на ​​ўкраінскія карані Надуды і на тое, што ён усё яшчэ падтрымлівае сувязь з шматлікімі сваякамі, якія жывуць ва Украіне, яго цяжка лічыць украінцам – ды і сам палкоўнік не надта да гэтага імкнецца, хаця летні адпачынак 2015 году ён бавіў у акупаваным Крыме.

У сацсеціве Надуда закранаў і грузінскую тэму. Палкоўнік выкладвае фатаздымкі расейскага вайсковага ўварваньня ў Грузію ў 2008 годзе, у якіх акупанты «рэкамендуюць» грузінам навучацца вайсковай справе, і падмацоўвае сваім камэнтаром: «Неяк так…». У зьвязку з гэтым хацелася б зазначыць, што «рэкамендацыі» улічаныя, і свайго часу акупант атрымае належнае. А зараз «таварышу» палкоўніку, камандыру бамбавальнага авіяпалку сьлед было б падрыхтавацца да праблемаў, якія ў яго паўстануць у  выніку гэтае публікацыі. Палкоўнік, які ня здольны выконваць элемэнтарныя нормы кансьпірацыі, які ня толькі «спаліў» сябе, але й “зліў” інфармацыю службовага характару, ніколі ня будзе генэралам.

Пастскрыптум: у выніку вывучэньня відэа пра авіяполк Марозаўск, атрымалася вызначыць прозьвішчы яшчэ некалькіх вайскоўцаў, якія, у адрозненьне ад камандыра палку Надуды, не зьяўляюцца такімі актыўнымі ў інтэрнэт-прасторы.

Канстантын Кулінскі – камандыр эскадрыльлі, падрабязнасьці і відэа ў спасылцы (архіў матар’ялу, рэзэрвовая копія відэа).

• Аляксей Бялонаў – старэйшы лётчык, падрабязнасьці і відэа ў спасылцы (архіў матар’ялу, рэзэрвовая копія відэа). У гэтым жа відэа фігуруе і камандыр палку Надуда – хранамэтраж 2:18-2:45.

Такім чынам, камандыр 559-га БАП і ягоныя афіцэры ўвойдуць у наш сьпіс і будуць уключаныя ў абноўленую інфаграфіку для будучага міжнароднага вайсковага трыбуналу (глядзіце артыкул “Вызначаныя экіпажы расейскіх лятакоў ПКС РФ у Сірыі”), тым больш, што ў гэтым чорным сьпісе ўжо фігуруе іхны калега – Штурбабін Сяргей, штурман, лётчык першае клясы 559-га БАП, Марозаўск, Растоўская вобласьць. У Сірыі, меркавана, лётаў на Су-34, бартавы нумар 03 «чырвоны», RF-93830. Нягледзячы на ​​закрытую інфармацыю пра склад ПКС РФ у Сірыі, меркаваць, што марозаўскі авіяполк удзельнічае ў апэрацыі «Возмездие» (рас.) дае падставы інфармацыя з розных форумах і блёгаў.

Матар’ял да публікацыі падрыхтаваны на падставе ўласнага OSINT-расьледаваньня міжнароднай валянтэрскай групай InformNapalm.

Аўтар матар’ялу Іраклі Камахідзэ.

На беларускую мову пераклаў Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Падзяліцеся публікацыяй у сацсеціве, выпальвайце крамлёўскіх акупантаў разам з InformNapalm!