Валантэры-дасьледчыкі каманды InformNapalm зьдзейсьнілі чарговую OSINT-выведку, гэтым разам сацыяльнага профілю кадравага расейскага вайскоўца сяржанта-артылерыста 32-й асобнай матастралковай брыгады ЗС РФ, які быў заўважаны ў баявых дзеяньнях на Данбасе.

Варта адзначыць, што профіль расейскага інтэрвэнту з 32-й АМСБр мы пачалі дасьледаваць дзякуючы пільнасьці аднаго з чытачоў InformNapalm (DikaKopeykin) 11 чэрвеня. Праз ягонае папярэдняе вывучэньне высьветлілася, што старонка інтэрвэнту ўжо каля тыдня раскрытая украінскімі блёгерамі, але прадстаўленыя празь іх частковыя запісы у “Твітэры” ня былі зьведзеныя ў сыстэму, што спрычынілася да таго, што інфармацыя засталася па-за ўвагай і ня была зрэалізаваная.

Сяржант ЗС РФ С.Патыліцын з мэдалём “За вяртаньне Крыма”

Праз вывучэньне поўнага спэктру наяўнай інфармацыі, якая маецца ў профілю сацыяльнага сеціва (фатаздымкі, відэа, статусы, камэнтары, прывязкі да мясцовасьці і шмат інш.) атрымалася выявіць некаторыя дэталі што да “крымска-данбаскіх камандыровак” і паслужнога сьпісу расейскага вайскоўца за пэрыяд 2014-2015 гг.

Пяройдзем да дэталяў. Сяржант Сьцяпан Патыліцын (https://vk.com/id70681033 або ў архіве: https://archive.is/dEMwv).
Расейскі вайсковец-кантрактнік 32-й асобнай матастралковай брыгады (в/ч 22316, мейсца дысьлякацыі – Навасібірская вобласьць, г. Шылава), Цэнтральная вайсковая акруга.

Служыць ва ўзводзе ўпраўленьня гаўбічнага самаходнага артылерыйскага дывізыёну в/ч 22316 (тая ж 32-я МСБр) і адказвае за карэктаваньне вагню вагнявых сродкаў дывізыёну (152 мм САУ 2С3 “Акацыя”). Напачатку расейскай інтэрвэнцыі і акупацыі крымскае паўвыспы С.Патыліцын у лютым 2014 году ў складзе свайго падразьдзяленьня быў перакінуты з Сібіра ў Крым, пра што сьведчаць шэраг фатаздымкаў, у тым ліку з пасьведчаньнем да мэдалю МА РФ “За вяртаньне Крыма”, выдадзенае на ягонае імя на падставе загаду МА РФ №219 з 17 красавіка 2014 году з подпісам начальніка ўпраўленьня кадраў Цэнтральнае вайсковае акругі генэрал-маёру А.Несьцерава. Пасьля “крымскай камандыроўкі”, падразьдзяленьне С.Патыліцына павярнулася на мейсца сталай дысьлякацыі.

Сяржант ЗС РФ С.Патыліцын на Данбасе

2 ліпеня 2014 году пачалася чарговая, гэтым разам “данбаская камандыроўка” С.Патыліцына, пра што сьведчыць камандыраванае прадпісаньне №1041 з адкрытай датай вяртаньня, якое выдаў на ягонае імя начальнік штабу в/ч 22316 падпалкоўнік Р. Насыбулін на падставе загаду штабу 41-й агульнавайсковае арміі Цэнтральнае вайсковае акругі 1 ліпеня 2014 №41/268/9-10 з наўпрост несамавітай фармулёўкай “для аказаньня садзейнічаньня памежным ворганам ФСБ”. 4 верасьня 2014 году С.Патыліцын, перад перакідваньнем з Растоўскае вобласьці на ўкраінскі Данбас зьмяшанага дывізыёну (у складзе батарэяў САУ “Акацыя” і РСЗА “Град”) батальёна-тактычнай групы 32-й АМСБр, падпісвае стандартнае “абавязальніцтва – пра неразгалошваньне інфармацыі абмежаванага доступу“.

Тое, што С.Патыліцын у складзе свайго падразьдзяленьня напрыканцы лета – напачатку восені 2014 году знаходзіўся на Данбасе, пацьверджвае сэрыя фатаздымкаў і відэа зь ягонага ж профілю. На фатаздымках можна пабачыць расейскіх жаўнераў у баявых палявых умовах, якія апранутыя ў нестатутную вайсковую форму, якая ёсьць характэрнай для баявікоў “Наваросіі” зь белымі апазнавальнымі павязкамі і іншымі ўскоснымі прыкметамі. Але найбольш цікавымі і пераканаўчымі сьведчаньнямі ёсьць фатаздымкі сяржанту С.Патыліцына, зробленыя ў раёне Амвросіеўкі, у тым ліку ля пасту ДАІ, які быў апазнаны карыстальнікамі “Твітэра”.

Першая данбаская камандыроўка С.Патыліцына скончылася напачатку кастрычніка 2014 году. За  вынік летне-восеньскіх “прыгодаў” ва Украіне ён быў узнагароджаны чарговым мэдалём – “За вайсковую доблесьць”, што засьведчанае ў фатаздымку зь ягонага фатаальбому, які выкладзены  10 траўня 2015 году.

Пасьля паўгадавога перапынку і праходжаньня дадатковай падрыхтоўкі ў Валгаградзкай вобласьці (верагодна, на палігоне “Прудбой”, дзе больш за год зьдзяйсьняецца зладжваньне БТГр, якія рыхтуюцца да “украінскіх камандыровак”), С.Патыліцын і ягонае падразьдзяленьне напачатку траўня было зноў перакінутае у памежны з Украінай раён Растоўскае вобласьці РФ.

Зь пералікам скрыншотаў фатадоказаў з профілю сяржанта можна азнаёміцца ​​ў галерэі ніжэй:

Заўвага: у красавіку-траўні 2015 году каманда InformNapalm зафіксавала перакідваньне некалькіх сьвежых батальёна-тактычных групаў Цэнтральнае вайсковае акругі ЗС РФ, у тым ліку з 32-й матастралковай брыгады з Навасібірска ў Мілерава.

Пра прысутнасьць падразьдзяленьняў ЦВА ў Растоўскае вобласьці ў складзе групоўкі сілаў уварваньня, у тым ліку 32-й АМСБР, “ІнформНапалм” падаваў інфармацыю і раней – у верасьні-лістападзе 2014 году, падрабязнасьці – у тэгах:

– Інфармацыя пра расейскія падразьдзяленьні зь Сібіра, якія дзейнічаюць на тэрыторыі Украіны

– РФ працягвае сьцягваць войскі да самай мяжы з Украінай (32-я МСБР)

Аўтар: Іраклі Камахідзэ

(с) Інфармацыя падрыхтаваная адмыслова для сайта InformNapalm, падчас перадруку й выкарыстаньня матар’ялу спасылка на наш праэкт абавязковая.

Пераклад Дзяніса Івашына

RU: Расследование участия сержанта ВС РФ 32-й ОМСБр в оккупации Крыма и войне на Донбассе