Ня гэтак даўно каманда InformNapalm зьдзейсьніла OSINT-расьледаваньне, у выніку якога былі ідэнтыфікаваныя расейскія вайскоўцы і танкі з складу тактычнай групы 6-й танкавай брыгады (ЗВА в/ч 54096, г.Ніжні Ноўгарад) ЗС РФ, якія прайшлі праз “украінскую камандыроўку”. Гэтае расьледаваньне было падмацаванае бясспрэчнымі фатасьведчаньнямі, гл. ““Танкавы біятлён – 2014” 6-й танкавай брыгады ЗС РФ на Данбасе”, Аugust 17, 2015.

Наш новы матар’ял быў створаны на падставе відэасюжэту журналісту Усеўкраінскай Інфармацыйна-Прававой газэты “Дарожны Кантроль” – “Расейскія жаўнеры, якіх не было на Данбасе”, які быў сьведкам таго, як украінскія вайскоўцы захапілі расейскі танк Т-72Б3 і даставілі яго з поля бою ў пасёлак Мнагапольле (арыгінал відэасюжэту даступны для зарэгістраваных карыстальнікаў, у зьвязку з чым копія відэароліку апублікаваная на нашым партале ў спасылцы).

У выніку дадатковай OSINT-выведкі каманды InformNapalm, быў выяўлены і ідэнтыфікаваны яшчэ адзін расейскі “танкіст-біятланіст” – Аляксей Бярэзін, дакуманты якога былі выяўленыя ў кінутым пад Ілавайскам танку.

Доўга шукаць Аляксея Бярэзіна не давялося – профіль у сацсеціве: https://vk.com/id58265801, архіў: https://archive.is/2BBjb, ён зьяўляецца сябром танкіста-кантрактніка з той жа в/ч 54096, якога мы выявілі раней – Вадзіма Раманюха, з фатаальбому якога пасьля нашай жнівеньскай публікацыі зьніклі шэраг фатаздымкаў, якія сьведчаць пра “ўкраінскую камандыроўку”. Сьпіс кантактаў застаўся некранутым, праз што мы досыць лёгка ідэнтыфікавалі Бярэзіна (“добра” працуеце таварышы ФСБ-падціральшчыкі, за гэта вам асаблівая падзяка).

На старонцы Аляксея Бярэзіна нічога асабліва няма, адзінае, кідаецца ў вочы, што хлопчык прагне славу. У ягоным фатаальбоме былі зафіксаваныя шэраг вядомых групавых фатаздымкаў танкістаў 6-й ТБр падчас “украінскай камандыроўкі-2014”, якія фігуравалі ў профілях ягоных таварышаў у службе, якія мы прадастаўлялі раней, у тым ліку леташняе фота, выкладзенае 23 жніўня 2015 году, з цынічным камэнтаром “Прывітаньне ўкропам))”.

Вернемся да вывучэньня відэа. 26 жніўня 2014 году ў баі пад Ілавайскам украінскія вайскоўцы захапілі мадэрнізаваны расейскі танк Т-72Б3. Пра гэта падрабязна вядзецца ў матар’яле “Цензор.Нет” з 27.08.2015г. – “Палкоўнік Кавальскі: “Расейскі Т-72Б3 мы захапілі нечакана для саміх сябе – для большасьці з нас гэта быў першы бой”. У прыватнасьці, захоплены найноўшы расейскі танк Т-72Б3 узору 2013 году, абсталяваны радыёэлектроннай апаратурай французскае і беларускае вытворчасьці. Палкоўнік Міхаіл Кавальскі зазначае наступнае: “Мы высунуліся ў Агранамічнае і занялі пазыцыі між кінутымі будынкамі…Прыкладна а 12.00 26 Жніўня мы ўбачылі, як наўпрост на нас йдзе калёна супраціўніка. Наперадзе танк, за ім 6 БМД. Я даў каманду БМП, яна выкацілася, і прыблізна з дыстанцыі 400 мэтраў мы адкрылі вагонь. Танк спыніўся, і ў яго нешта ўспыхнула і загарэлася на вежы. БМД высадзілі дэсант і, пабачыўшы, што танк стаіць, разьвярнуліся й пачалі адыходзіць. Пяхота таксама пачала адыход уздоўж пасадкі. У адную з БМД патрапіў снарад, але яна змагла зьехаць. Іншых стратаў супраціўнік не зазнаў… Танк хацелі падарваць, але я пагледзеў – танк быў цалкам спраўны, пашкоджаньні былі касмэтычнымі. Быў паранены, мабыць, мэханік-кіроўца, таму што на вежы былі сьляды крыві. Усіх параненых супраціўнік забраў з сабою. Падчас прачэсваньня мы выявілі кінутую спраўную снайпэрскую вінтоўку расейскай вытворчасьці. Танк таксама быў расейскі – у ім знайшлі ўсе фармуляры і дакуманты…”

Гэтай інфармацыі і фота- відэаматар’ялаў цалкам дастаткова, каб спалучыць адное з адным. Паводле карткі ўліку кіраваньня шарагоўца А.Бярэзіна, якая была сярод кінутых расейцамі дакумантаў, зафіксаваная ягоная прыналежнасьць да 3-й танкавай роты 1-га танкавага батальёну (6-й танкавай брыгады). Тут у ідэнтыфікацыі дапамагае зноў жа фатаздымак з альбому В.Раманюха, у якім  маркаваньне 3-й танкавай роты зафіксаванае на патроннай скрынцы зэнітнага кулямёту танку, ну а па-над зафарбаваным бартавым нумарам машыны нанесенае знаёмае паводле мінулых разглядаў белае ідэнтыфікацыйнае кола.

Глядзіце тэматычныя матар’ялы што да 6-й асобнай танкавай брыгады, якія падрыхтавала каманда InformNapalm.org раней:

– Чарговая хлусьня расейскай прапаганды – танкі Т-72ДЗ(БЗ). September 23, 2014

– Расейскія вайскоўцы з 6-й танкавай брыгады маюць форму Унутраных войскаў МУС РФ. October 1, 2014

– Глянь! Знаёмыя ўжо нам танкі! October 30, 2014

– Куды зьнікаюць “тэрміновыя” расейскія кантрактнікі з Муліна. February 15, 2015

– Інтэрнэт-карыстальнікі ідэнтыфікавалі палонных расейскіх жаўнераў пад Ілавайскам. March 22, 2015

– У Растоўскую вобласьць перакінутае падразьдзяленьне 6-й танкавай брыгады. June 26, 2015

– “Танкавы біятлён – 2014” 6-й танкавай брыгады ЗС РФ на Данбасе. August 17, 2015

Аўтар OSINT-расьледаваньня Victory Krm (krmvictory). Матар’ял да публікацыі падрыхтаваў Іраклі Камахідзэ

(с) Інфармацыя падрыхтаваная адмыслова для сайта InformNapalm, падчас перадруку й выкарыстаньня матар’ялу спасылка на аўтара і наш праэкт абавязковая.

Пераклад Дзяніса Івашына