Новая справаздача Спэцыяльнай маніторынгавай місіі (СММ) АБСЭ стаў сапраўднай сэнсацыяй і адкрыцьцём для адмыслоўцаў – яна ўпершыню за ўвесь час баявых дзеяньняў на Данбасе афіцыйна раскрыла адразу 4 новыя тыпы расейскіх сыстэмаў радыёэлектроннай барацьбы на акупаванай тэрыторыі ў Луганскай вобласьці. Сыстэмы былі выяўленыя ў н.п. Чарнухіна (Луганская вобласьць). Гэта сучасныя расейскія распрацоўкі, а іхная прысутнасьць на Данбасе наўпрост сьведчыць пра ўдзел Расейскай Фэдэрацыі ў вайне супроць Украіны. Больш падрабязна пра тое, чаму гэтыя дадзеныя вельмі важныя, і пра мажлівыя прычыны замоўчваньня АБСЭ гэтай інфармацыі на працягу двух тыдняў – у новым расьледаваньні InformNapalm.

У непадкантрольных ураду раёнах 28 ліпеня 2018 г. міні-БпЛА СММ выявілі 4 розныя сыстэмы радыёэлектроннай барацьбы («Леер-3» РБ-341В, 1Л269 «Красуха-2», РБ-109A «Быліна» і 1 комплекс радыёэлектроннай барацьбы з БпЛА «Рэпэлент-1») ля н.п. Чарнухіна (64 км на паўднёвы захад ад Луганску). СММ упершыню зафіксавала наяўнасьць усіх чатырох комплексаў. 2 жніўня 2018 г. падчас зьдзяйсьненьня палёту над гэтай жа дзялянкай БпЛА не зафіксавалі гэтыя сыстэмы.

– вядзецца ў справаздачы СММ АБСЭ, апублікаванай 11 жніўня 2018 г.

Афіцыйнаю ёсьць вэрсія справаздачы на ​​ангельскай мове, таму мы падаем ніжэй менавіта гэты скрын:

Праз аналіз дадзеных у справаздачы СММ АБСЭ валянтэры міжнароднае выведвальнае супольнасьці InformNapalm выявілі два вельмі важныя чыньнікі:

1. Падобнае скопішча розных тыпаў РЭБ і наяўнасьць сярод іх найноўшага аўтаматызаванага комплексу РБ-109A «Быліна», які пачаў паступаць у войскі Расейскай Фэдэрацыі толькі ў 2018 годзе, сьведчыць пра тое, што гэта магутны камандны пункт. Паводле значнасьці яго можна назваць наземным аналягам натаўскае электроннае сыстэмы выведкі й кіраваньня AWACS.

СБ-109A «Быліна» – гэта найноўшы звышсакрэтны комплекс, задачай якога зьяўляецца каардынацыя ўсіх комплексаў РЭБ ў ягонай зоне дзеяньня. Такую сыстэму выкарыстоўваюць для прыкрыцьця буйных камандна-штабных аб’ектаў узроўню не ніжэй за брыгаду. На дадзены момант у адкрытых крыніцах няшмат інфармацыі й фатаздымкаў машынаў з складу гэтага комплексу. Некаторыя зь іх маюцца ў тэматычным зборніку “Радиоэлектронная борьба в Вооруженных Силах Российской Федерации – 2017” (архіў).

Апроч гэтага, два іншыя найноўшыя расейскія комплексы 1Л269 «Красуха-2» і «Рэпэлент-1» – гэта таксама досыць складаныя й дарагія сыстэмы РЭБ. Немажліва ўявіць, каб Расея проста перадала іх у рукі некампэтэнтных баявікоў. Кіраваньне гэтымі комплексамі таксама зьдзяйсьняюць расейскія вайскоўцы, бо пазначаныя сыстэмы ўваходзяць у структуру РЭБ Міністэрства абароны РФ.

Нагадваем, што міжнародная выведвальная супольнасьць InformNapalm раней ужо фіксавала й публікавала доказы прысутнасьці на акупаванай тэрыторыі Луганскае й Данецкае абласьцей 9 найноўшых тыпаў расейскіх сыстэмаў РЭБ (дадзеныя зведзеныя ў адзіную базу), у прыватнасьці быў выяўлены й комплекс РЭБ СБ-341В «Леер-3», пазначаны ў справаздачы СММ АБСЭ.

Афіцыйная справаздача маніторынгавае місіі АБСЭ пра прысутнасьць на Данбасе сучасных расейскіх сыстэмаў РЭБ можа й мае стаць штуршком да ўхваленьня міжнароднай супольнасьцю новых вельмі жорсткіх санкцыяў у дачыненьні да Расейскае Фэдэрацыі як агрэсара й акупанта – дзяржавы, што стварае гібрыдныя арміі, падтрымлівае, спансуе й куруе дзеяньні тэрарыстаў на Данбасе.

2. Яшчэ адзін вельмі важны чыньнік – гэта прычына, чаму СММ АБСЭ амаль два тыдні марудзіла з публікацыяў такіх сэнсацыйных дадзеных. Місія зафіксавала 4 унікальныя расейскія комплексы РЭБ яшчэ 28 ліпеня 2018 г., але толькі праз 9 дзён 11 жніўня гэта інфармацыя зьявілася на сайце АБСЭ. За гэты час хтосьці, верагодна, пасьпеў папярэдзіць расейскае камандаваньне й ужо 2 жніўня ўсе комплексы былі прыбраныя з н.п. Чарнухіна (Луганская вобласьць) і перадысьлякаваныя. Падобна на тое, што шпігунскі скандал у СММ АБСЭ будзе працягвацца, але самая публікацыя вельмі важных для сусьветнай супольнасьці дадзеных пра расейскія сыстэмы РЭБ дае надзею, што АБСЭ паступова пазбавіцца расейскіх агентаў.

Міжнародная выведвальная супольнасьць InformNapalm зьвяртаецца да чытачоў на акупаванай тэрыторыі Данбасу. Калі вы сталіся сьведкамі перасоўваньня ўзбраеньня й вайсковай тэхнікі і ў вас маюцца фота- ці відэадоказы, якія даюць мажлівасьць зрабіць прывязку да мясцовасьці, дасылайце іх нам на пошту:

Матар’ял падрыхтавалі Кузьма Тутаў і Раман Бурко адмыслова для сайту міжнароднае выведвальнае супольнасьці InformNapalm.

Пераклаў на беларускую мову Дзяніс Івашын.

Пашырэньне й перадрук з спасылкаю на крыніцу вітаюцца!
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.