Вядомы беларускі артыст, саліст ВІА “Сябры” Сяргей Герасімаў на працягу апошніх пяці гадоў асабіста прыязджае з забаўляльнай праграмай ва акупаваныя ўкраінскія гарады Луганск, Алчэўск, Кіраўск і выступае перад баявікамі расейскіх акупацыйных войскаў. 8 траўня 2019 году Цэнтар “Міратворац” занес Сяргея Герасімава ў Базу дадзеных “Чысьцец”.

У Базе “Міратворца” Сяргей Герасімаў фігуруе з наступнымі азначэньнямі: сьвядомае парушэньне Дзяржаўнай мяжы Украіны з мэтай пранікненьня на акупаваную расейска-тэрарыстычнымі бандфармаваньнямі тэрыторыю Украіны на Данбасе; сьвядомы ўдзел у антыўкраінскіх прапагандысцкіх мерапрыемствах.

Ідэнтыфікацыйныя дадзеныя:

Герасімаў Сяргей Барысавіч

Нарадзіўся 23 лістапада 1961 г. у в. Ісакава Васкрасенскага раёну Маскоўскае вобласьці ў сям’і прафэсійных артыстаў вайсковых ансамбляў. Жыве ў Менску. Заслужаны артыст Беларусі, саліст вакальна-інструмэнтальнага ансамблю “Сябры”, грае на акустычнай гітары й скрыпцы. Узнагароджаны мэдалём Францішка Скарыны.

Акаўнты сацсетак: “VK” (архіў акаўнту, фатаздымкаў, кантактаў); “OK” (архіў акаўнту, фатаздымкаў, кантактаў); “FB” №1 (архіў акаўнту, фатаздымкаў, кантактаў), №2 (архіў акаўнту, фатаздымкаў, кантактаў).

Падчас правядзеньня выведкі адкрытых крыніцаў інфармацыі выяўленае, што Сяргей Герасімаў незаконна наведвае і зьдзяйсьняе канцэртную дзейнасьць на часова акупаванай тэрыторыі Данбасу пачынаючы з 2014 году (1, 2). У 2015 годзе ён выступаў у захопленым Алчэўску перад баявікамі бандфармаваньня “Призрак” (рас.). У 2016 годзе акупацыйная адміністрацыя гораду Кіраўск (Галубіўка, знаходзіцца пад кантролем “ЛНР”) надала яму званьне “Почетный гражданин города Кировска” (рас.). Выправы на акупаваны Данбас ён зьдзяйсьняе разам зь вядомым расейскім акторам Сяргеем Махавіковым, які паводле дадзеных Цэнтру «Міратворац» фінансава дапамагае баявікам расейскага акупацыйнага кантынгенту.

Сяргей Герасімаў разам з Сяргеем Махавіковым (леваруч)

Вызначанае, што ў лютым 2019 году Сяргей Герасімаў выступаў перад мясцовымі так званымі воінамі-інтэрнацыяналістамі, шмат зь якіх удзельнічаюць сёньня ў баявых дзеяньнях супроць украінскай арміі (архіў). Галава расейскага тэрарыстычнага ўтварэньня “ЛНР” Леанід Пасечнік асабіста ўзгародзіў яго ганаровым знакам “От благодарного народа ЛНР” (рас.).

Гэтыя паездкі, якія маюць азнакі крымінальнага правапарушэньня, зьяўляюцца пэрсанальнай ініцыятывай Сяргея Герасімава, аднак кідаюць вялікі цень на ўвесь легендарны ансамбль “Сябры”.

Кіраўніку ансамблю Анатолю Ярмоленку сьлед тэрмінова паставіць пытаньне пра мэтазгоднасьць знаходжаньня ў складзе творчага калектыву чалавека, які наўпрост ганьбіць ягонае імя праз стасункі з прадстаўнікамі расейскай акупацыйнай адміністрацыі на захопленай тэрыторыі Украіны і выступы перад баявікамі расейскіх акупацыйных войскаў.

Рэдактар беларускае службы
міжнароднае выведвальнае супольнасьці InformNapalm
Дзяніс Івашын.

Пашырэньне й перадрук з спасылкаю на крыніцу вітаюцца!
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.