Каманда Informnapalm.org у межах OSINT-выведкі працягвае зьбіраць бясспрэчныя факты непасрэднага ўдзелу расейскай арміі ў неабвешчанай вайне супраць Украіны.

У выніку новага расьледаваньня былі выяўленыя і ідэнтыфікаваныя артылерыйскія падразьдзяленьні 17-й асобнай матастралковай брыгады (в/ч 65384, мейсца дысьлякацыі – Шалі, Чачэнія) 58-й агульнавайсковай арміі Паўднёвае вайсковае акругі (ПВА) ЗС РФ, якое мінулае восені прымала ўдзел у баявых дзеяньнях на Данбасе на Марыюпальскім напрамку.

Дзякуючы інфармацыі і фатаматар’ялу, якія былі атрыманыя ў выніку вывучэньня й аналізу профілю сацсеціва патэнцыйнага фігуранту гаагзкага трыбуналу, вайскоўца самаходнага артылерыйскага дывізыёну 17-й АМСБр сяржанта Канстантына Нв-Пашыніна (“Укантакце”: ID 218715797, архіў: https://archive.is/D2w92), удалося выявіць “баявы шлях” артылерыстаў гэтага вайсковага злучэньня – ад выезду напачатку лета 2014 году на “вышкалы” у Валгаградзкую і Астраханскую вобласьці (дзе прызначаныя для перакідваньня ва Украіну тактычныя групы расейскіх войскаў праходзяць зладжваньне і баявую падрыхтоўку), да наступнай адпраўкі ў Растоўскую вобласьць і іхнага перакідваньня на Данбас.

Апроч звычайнай ідэнтыфікацыі з звыклым маскарадам ад расейскіх вайскоўцаў, якія падчас “растоўска-ўкраінскіх камандыровак” ператвараюцца на баявікоў “наваросіі” (нестатутны вонкавы выгляд і форма адзеньня, белыя ідэнтыфікацыйныя павязкі), а ўзбраеньне і тэхніку маскуюць пад “набытыя ў ваенторгу”, была вызначаная таксама геаграфія дзеяньня артылерыйскага падразьдзяленьня з Чачэніі на Данбасе з канкрэтнай прывязкай да аб’ектаў і мясцовасьці. У прыватнасьці, атрымалася выначыць, што станам на пачатак восені 2014 году САУ “Мста-С” 17-й матастралковай брыгады знаходзіліся ў раёне ветранога поля Наваазоўскае ВЭС (ветраная электрастанцыя). Глядзіце дэталёвы разгляд:

Нягледзячы на ​​тое, што фатаздымкі ў фатаальбоме нашага фігуранту сяржанта 17-й АМСБр К. Нв-Пашыніна выкладзеныя ў розны час (https://vk.com/id218715797?z=albums218715797, архіў: https://archive.is/pzKNX), дзякуючы гэтаму матар’ялу і іншым крыніцам (шэраг відэаролікаў, якія распаўсюджаныя на youtube) атрымалася аднавіць храналёгію “растоўска-ўкраінскай” камандыроўкі і іншыя важныя дэталі:

– напачатку лета 2014 году, у чэрвені, артылерыйскае падразьдзяленьне 17-й брыгады, якое было перакінутае з Чачэніі, было зафіксаванае ў Валгаградзкай і ў Астраханскай вобласьцях, дзе на палігонах Прудбой і Ашулук праходзіць перадкамандыровачную падрыхтоўку;

– напрыканцы ліпеня 2014 году (30 ліпеня) у Растове-на-Доне зафіксаваныя САУ “Мста-С” гэтага падразьдзяленьня, якія перавозіліся на цягачах (гл. скрыншот з відэароліку “Мста-С цыркулююць на цягачах. Растоў-на-Доне. 30.07.2014”);

– у гэты ж дзень (30.07.2014) тыя ж САУ “Мста-С” на цягачох былі заўважаныя на Таганрожскай шашы (гл. скрыншот з відэароліку “Растоў, “Ваенвед”. Бранетэхніка на Таганрожскай шашы”)

Заўвага: Для таго, каб пераканацца ў тым, што гэта тэхніка сапраўды САУ 17-й АМСБр, дастаткова параўнаць іхны камуфляж на прадстаўленых відэароліках з фатаздымкам з альбому нашага фігуранту, вайскоўца 17-й брыгады К. Нв-Пашыніна, – камуфляжы САУ ідэнтычныя. Таксама ў выніку аналізу відэаматар’ялу вызначанае, што адная САУ мае бартавыя нумары, якія зафарбаваныя дзьвюма фарбамі: зялёнай і жоўтай. Характэрна, што на фатаздымку ў альбоме можна пабачыць САУ з бартавым нумарам “524”, дзе лічбы “52” знаходзяцца на зялёным фоне, а лічба “4” – на жоўтым.

– 4 верасня 2014 году зафіксаваная САУ з ідэнтычным камуфляжам у Наваазоўску, сюжэт “Al Jazeera” – “Ukraine rebels advance towards Mariupol”, у якім можна пабачыць, што тыповае мейсца знаходжаньня бартавога нумару зафарбаванае сьветлай фарбай. Тут могуць быць два варыянты: альбо гэта не 524 машына, альбо дзеля кансьпірацыі нумары былі зафарбаваныя яшчэ адным варствам фарбы.

Заўвага: у выніку аналізу гэтага відэасюжэту сьлед вылучыць некалькі дэталяў – гэта белыя сьцяжкі, якія прывязаныя да антэнаў самаходных установак (хранамэтраж 0.12-0.20 хв.), якія таксама можна заўважыць на фатаздымках К. Нв-Пашыніна, і белыя ідэнтыфікацыйныя колы, якія нанесеныя на кабіны аўтатранспарту забесьпячэньня артылерыйскага падразьдзяленьня (гл. відэа бэнзавоз “Урал”, хранамэтраж 0.10 хв.)

– ну і нарэшце, 24 верасня 2014 году наш “герой Гаагі” К. Нв-Пашынін выкладвае на сваёй старонцы фатаздымкі САУ “Мста-С” на тле ветранога поля Навазоўскае ВЭС. Здымкі, як мяркуецца, былі зробленыя напрыканцы жніўня – пачатку верасьня. Дзякуючы гэтым аб’ектам атрымалася вызначыць дакладнае мейсца здымкі з геалякацыяй мясцовасьці ў раёне ВЭС на тле ветранога поля.

Сярод кантактаў К. Нв-Пашыніна (архіў: https://archive.is/gC0zH) можна знайсьці і іншых артылерыстаў 17-й АМСБр, якія пабывалі ў “растоўска-ўкраінскай камандыроўцы”. Напрыклад, нейкі Павал Краўчанка (“Укантакце”: ID 252322040, архіў: https://archive.is/1BHZk). Нягледзячы на ​​яго сьціплы фатаальбом, усё ж, удалося выявіць шэраг фатаздымкаў з той жа сэрыі, што мае і  першы фігурант: “мангал” на гільзах і мэдальчык “За Доблесьць”, якім шчодра адорвае МА РФ “ветэранаў Данбаса”.

Нагадваем, што падраздзяленьні 17-й АМСБр ПВА з Чачэніі ў кантэксьце “украінскіх камандыровак” мы неаднаразова фіксавалі раней. Глядзіце тэматычныя спасылкі:

– 17-я АМСБр ПВА ва Украіне

– “Танкіст” – расейскі афіцэр 17-й АМСБр, удзельнік летніх баёў на Данбасе

– “Бясслаўныя вырадкі”: помнік вайскоўцам 17-й матастралковай брыгады у Шалі

– Фотасьведчаньне: 17-я АМСБр на Данбасе, лета 2014 году

– Афіцэр 17-й АМСБр ЗС РФ узнагароджаны “Ордэнам Мужнасьці” за вайну на Данбасе

Аўтар матар’ялу Міхаіл Нет адмыслова для InformNapalm.org.

(с) Інфармацыя падрыхтаваная адмыслова для сайта InformNapalm.org, падчас перадруку й выкарыстаньня матар’ялу спасылка на наш праэкт абавязковая.

Пераклад на беларускую мову Дзяніс Івашын