Міжнародная валянтэрская супольнасьць InformNapalm працягвае сэрыю публікацыяў, якія адлюстроўваюць “баявы шлях” расейскіх вайсковых злучэньняў, што прымалі ўдзел у баявых дзеяньнях на Данбасе. Гэтая публікацыя напісаная паводле матываў «расейскіх народных казак» кіраўніка крамлёўскага злачыннага рэжыму Пуціна, які нядаўна заявіў: «Мы ніколі не казалі, што ў Данбасе няма людзей, якія займаюцца рашэньнем розных пытаньняў, у тым ліку, і ў вайсковай сфэры. Але там няма рэгулярных расейскіх войскаў».

Усаджваемся ўтульна, каманда InformNapalm пакажа чарговы прыклад шулерскай гульні хлусьлівага палітычнага і вайсковага кіраўніцтва Расеі на прыкладзе «ўкраінскай камандыроўкі» 8-й горнай брыгады ЗС РФ.

Новы матар’ял падаем у незвычайным фармаце: у выглядзе прэзэнтацыі з прыкладам падразьдзяленьня, якое ўжо неаднойчы ўдзельнічала ў баявых дзеяньнях ва Украіне – 8-й Асобнай матастралковай Брыгады (горная) в/ч 16544 з складу 58-й арміі Паўднёвае вайсковае акругі (ПВА) РФ, якая дысьлякуецца ў пас.Барзой, Чачэнія (на мейсцы колішняга 291-й палку 42-й МСД). Усё пералічаныя ніжэй фігуранты зьяўляюцца вайскоўцамі гэтага злучэньня.

Першы этап – падразьдзяленьне з вайсковай часткі 16544 разам з тэхнікай выпраўляецца ў памежную з Украінай вобласьць і разьмяшчаецца ў «палёх».

Дзякуючы кантрактніку Аляксандру Субоціну (спасылкі на архіў профілю, фотаальбому, сьпісу сяброў) змаглі адсачыць пагрузку тэхнікі – МТ-ЛБ 8-й АМСБр з адметным тактычным знакам брыгады (квадрат з кропкаю) на чыгуначныя плятформы (архівы фота 1, 2).

 

 

 

 

 

 

Аналягічныя фота мае і вайсковец, адкамандыраванай 8-й АМСБр, Барыс Ганін (спасылкі на архіў профілю, фотаальбому, сьпісу сяброў). У альбоме фігуруе фота прывалу пуцінскіх «ветлівых» людзей.

Казаць пра прымус вайскоўцаў да “растоўска-ўкраінскай камандыроўкі” не даводзіцца, бо самі ж кантрактнікі не супроць выканаць злачынныя загады свайго вярхоўнага галоўнакамандуючага. Пацьверджаньнем гэтаму ёсьць камэнтары да фота з “камандыроўкі” Андрэя Латуціна з той жа брыгады (спасылкі на архіў профілю, фотаальбому, сьпісу сяброў).

Іншы вайсковец Аляксандар Аркуша (спасылкі на архіў профілю, фотаальбому, сьпісу сяброў) прадэманстраваў палявыя ўмовы жыцьця адкамандыраваных ў памежныя з Украінаю раёны Растоўскае вобласьці ў верасьні 2014 году. На фота (1, 2) назіраем стаянку тэхнікі пад Таганрогам, а таксама разьмяшчэньне групоўкі ў палявым лягеры непадалёк хутару Наваальхоўскага, Куйбышаўскага раёну Растоўскае вобласьці (1, 2, 3).

Другі этап – ператварэньне расейскіх вайскоўцаў на «апалчэнцаў», а тэхнікі і ўзбраеньня на «трафеі». Зьнікаюць усе нашыўкі, якія дазваляюць ідэнтыфікаваць прыналежнасьць байца да ЗС РФ, на тэхніцы зьяўляюцца творы «выяўленчага мастацтва», сьцягі. Гэтак, Алег Сышчук (спасылкі на архіў профілю, фотаальбому, сьпісу сяброў) у сваім фотаальбоме выклаў фота, у якім зафіксаваны МТ-ЛБ з расейскім імпэрскім сьцягам. Ёсьць таксама фота разам з яшчэ адным таварышам у службе-удзельнікам камандыроўкі Ігарам Рубцовым (спасылкі на архіў профілю, фотаальбому, сьпісу сяброў), якое захаванае ў альбоме апошняга.

Віктар Гарнастаеў (спасылкі на архіў профілю, фотаальбому, сьпісу сяброў) у альбоме з шматзначным назовам «Мая праца» выклаў фатаздымкі, у якіх зафіксаваная калёна тэхнікі ў маршы пад тымі ж сьцягамі (фота). На адным з фота на некаторых МТ-ЛБ можна пабачыць замаляваны зялёнаю фарбаю тактычны знак брыгады і саматужным спосабам нанесеныя новыя бартавыя нумары тэхнікі. Апроч МТ-ЛБ тактычныя знакі зафарбаваныя і на кабінах «КамАЗ»-аў (фота).

Аналягічную калёну ў маршы назіраем і на фота, выкладзеным у профілі Аляксандра Якаўлева (спасылкі на архіў профілю, фотаальбому, сьпісу сяброў, профіль у “Інстаграм”), які ў камэнтары зазначае, што ўдзельнічаў у «кукурузным канфлікце».

У афіцэра 8-й АМСБр Станіслава Бадрыева (спасылкі на архіў профілю, фотаальбому, сьпісу сяброў) у альбоме з назовам «Ёсць такая прафэсыя» назіраем МТ-ЛБ з намаляваным «ашчэрам». Таксама ёсьць фота прымеркі белай ідэнтыфікацыйнай павязкі адным з вайскоўцаў брыгады. На групавым фота зафіксаваныя ўжо знаёмыя нам Ігар Рубцоў і Алег Сышчук.

Ня ўсе вайскоўцы «гаваркія», бо, усё ж, выведка. Але наяўнасьць групавога фатаздымку ўсё адно раскрыла карты што да яшчэ аднаго кантрактніка з складу сілаў уварваньня – Мікалая Лісагора (спасылкі на архіў профілю, фотаальбому, сьпісу сяброў).

Тое ж фота з «зубастым» МТ-ЛБ і групавы фатаздымак мы фіксуем і ў альбоме Аляксея Самарава (спасылкі на архіў профілю, фотоальбому, сьпісу сяброў).

Гэты ж МТ-ЛБ зафіксаваны і ў фотаальбоме яшчэ аднаго вайскоўца 8-й АМСБр Баіра Дагбаева, які мае 2 профілі ў сеціве “VK” і “OK”.

 

Трэйці этап – «Добры дзень, Украіна, вось і прыйшлі твае «вызваліцелі»!». Падразьдзяленьне ЗС РФ урываецца ўглыб тэрыторыі Украіны, як сказаў Пуцін «для вырашэньня некаторых пытаньняў у вайсковай сфэры».

Гэтак, вайсковец з складу выведроты 8-й АМСБр Аляксей Феафілактаў (архіў), які мае другі профіль зь імем Fil Legion (спасылкі на архіў профілю, фотаальбому, сьпісу сяброў) сфатаграфаваўся на імправізаваным блёкпосьце. Побач з надпісам “stop” асадкаю намаляванае штосьці  падобнае на «навароскі сьцяг», ззаду можна пабачыць ужо знаёмы нам МТ-ЛБ зь імпэрскім сьцягам, у рукох Феафілактаў трымае сучасную радыёстанцыю Р-187П1, прынятую ва ўзбраеньне РФ зусім нядаўна.

На фота тое ж МТ-ЛБ, але зь іншага ракурсу. На ім можна пабачыць Віктара Гарнастаева, на  пярэднім пляне таксама зафіксаваны Ігар Рубцоў.

Аляксандар Аркуша, якога мы згадвалі на самым пачатку камандыроўкі 8-й АМСБр, дапамог зьдзейсьніць геалякацыю тэрыторыі Украіны, у якую ўварвалася гэтае падразьдзяленьне і вызначыць, што гэта мясцовасьць у раёне  Краснадона (фота 1, 2, 3, 4, 5). Пацьверджаньнем ёсьць ня толькі геатэгі на фатаздымках, але й ідэнтыфікацыя помніку ў Сухадольску, на тле якога зафіксаваныя вайскоўцы. Характэрна, што на фатаздымках фіксуюцца снайпэрскія вінтоўкі СВДС і ВСС «Вінтарэз», якія маюцца выключна ва ўзбраеньні РФ. Усё гэта сьведчыць пра тое, што 8-я АМСБр (горная) зьдзяйсьняла баявыя дзеяньні на тэрыторыі Украіны ў штатным складзе з выкарыстаньнем штатнага ўзбраеньня і тэхнікі.

Лёха Лебедзеў (спасылкі на архіў профілю, фотаальбому, сьпісу сяброў) нават пасьпеў дайсьці, не… не «Да Кіева», а усяго толькі да Данецка і сфатаграфавацца на цэнтральнай плошчы гораду на тле помніку Леніну (архіў).

Дадзеныя профіляў вайскоўцаў 8-й АМСБр сьведчаць пра тое, што іхныя камандыроўкі ў складзе ўдарных тактычных групаў пачыналіся зь ліпеня 2014 году і цягнуліся да лютага-сакавіка 2015 году, да захопу Дэбальцаўскага пляцдарму, што таксама пацьверджанае ў нашых ранейшых публікацыях. Ад 8-й горнай брыгады дзейнічалі некалькі тактычных групаў, але з моманту падпісаньня менскіх дамоўленасьцяў, камандаваньне ЗС РФ пачало сваіх вайскоўцаў расьсейваць і раствараць дробнымі групамі сярод падразьдзяленьняў НЗФ «наваросіі». І гэта ня толькі для маскаваньня, а для перадачы досьведу “братам меншым”, а таксама для забесьпячэньня кантролю над бандфармаваньнямі.

Чацьверты этап – ўзнагароджваньне. Ну і як жа ж без заахвочваньня за забойствы і спусташэньні, якія зьдзейсьнілі гэтыя вайсковыя злачынцы ва Украіне. Тут ня ўсе любяць выхваляцца, бо некаторыя вайсковыя задачы, якія ставіла камандаваньне МА РФ, непазьбежна прывядуць да міжнароднага трыбуналу за вайсковыя злачынствы. Задачаю каманды InformNapalm ёсьць  наданьне доказаў і выяўленьне фактаў, каб нічога не заставалася беспакараным.

Свае фатаздымкі з ўзнагародамі маюць Баір Дагбаеў (фота выкладзенае 4 красавіка 2015 г.) і  Аляксандр Якаўлеў (фота выкладзенае ў ягоным профілі “Інстаграм” 6 чэрвеня 2015 г.).

Нагадваем, што 8-я АМСБР (горная) ужо неаднойчы фігуравала ў матар’ялах InformNapalm у кантэксьце «ўкраінскіх камандыровак»:

8-я горная матастралковая брыгада РФ ва Украіне, September 22, 2014

Выведпадразьдзяленьне 8-й МСБР горнай на мяжы з Украінай, October 8, 2014

“Show Must Go On”, або, “папярэднія пяшчоты”, October 30, 2014

Мэдаль “За адвагу”, December 9, 2014

8-я АМСБр ЗС РФ у складзе “народнай міліцыі” ЛНР, July 17, 2015

Пасьля “камандыровак” на Данбас у 8-й АМСБр ЗС РФ застаюцца “200-я” і інваліды, September 11, 2015

Расея канцэнтруе сьвежыя сілы для перакідваньня на Данбас, November 21, 2015

Матар’ял да публікацыі падрыхтаваны на падставе ўласнага OSINT-расьледаваньня міжнароднай валянтэрскай групай InformNapalm. Аўтар расьледаваньня Victory Krm.

На беларускую мову пераклаў Дзяніс Івашын

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Актыўны распаўсюд у сацсетках вітаецца!