У выніку новага OSINT-расьледаваньня, каманда InformNapalm.org падрыхтавала чарговы матар’ял, які паказвае, як штатная расейская вайсковая тэхніка ўліваецца ў шэрагі т.зв. народнай міліцыі “ЛНР”, а расейскія вайскоўцы атрымліваюць статус “ветэранаў” у выніку камандыровак на Данбас.

На сайце расейскага “Першага канала” можна знайсьці тэлерэпартаж зь 1 лютага 2013 году “У Чачэнскай рэспубліцы адбываюцца вышкалы адзінай горнай матастралковай брыгады”, у якім распавядаецца пра 8-ю горную АМСБр (в/ч 16544, мейсца дысьлякацыі Чачэнія, с.Барзой) Паўднёвае вайсковае акругі ЗС РФ і вышкалы на палігоне “Дар’ял” у Паўночнай Асэтыі. У рэпартажы фігуруюць МЦЛБ (шматмэтавы цягач зь лёгкаю бранёю). У гэтым відэароліку з хранамэтражу 01:58 хв. можна пабачыць МЦЛБ з тактычнымі знакамі 8-й АМСБр горнай – белае кола, якое знаходзіцца ў квадраце (копія ў архіве https://archive.is/SY35B).

На відэапартале youtube ёсьць відэаролік з 15 сакавіка 2015 году, з назовам “У Навапаўлаўску праведзеныя заняткі з асабістым складам 2 матастралковага батальёну НМ ЛНР” ад т.зв. інфармацыйна-аналітычнае агенцыі “Юго-Восток” (рас.), у хронаметражы з 07:02 і 07:36 хв. можна пабачыць мадэрнізаваны МЦЛБ з НСВ “Утёс” (рас.) з тактычнымі знакамі вышэйзгаданай 8-й АМСБр. (копія ў архіве https://youtu.be/JMfUzCznP74, https://archive.is/ibbCY).

На відэа з вышкалаў “НМ ЛНР” ёсьць і іншая расейская вайсковая тэхніка, у тым ліку БМП з зафарбаванымі бартавымі нумарамі.

Каб яшчэ аднаго разу пацьвердзіць тактычны знак 8-й АМСБр, мы дасьледавалі некалькі профіляў сацсеціва “Укантакце” вайскоўцаў гэтага вайсковага злучэньня з Чачэніі, у якіх была выяўленая тэхніка з падобнымі знакамі. Нягледзячы на ​​тое, што ў профілі вайскоўца 8-й горнай брыгады Сяргея Чайнікава (архіў https://archive.is/94Plc) не фігуруюць адкрытыя фатаздымкі з Данбаса, ёсьць шэраг слайдаў, выкладзеных 4-5 катрычніка 2014 году зь відавочнымі азнакамі таго, што фатаздымкі зробленыя не ў Чачэніі, але маюць дачыненьне да сэрыі “растоўска-ўкраінскіх камандыровак” (закрыты твар, скопішча тэхнікі-ўзбраеньне, не каўказскі краявід і палявыя ўмовы, нестатутная форма адзеньня і г.д.).

Былі выяўленыя іншыя цікавая фатаздымкі, у тым ліку копіі некаторых дакумэнтаў і камэнтары да іх. Больш за ўсіх прыцягнуў увагу слайд “ветэранскага пасьведчаньня”, выкладзены 6 траўня 2015 году. Пасьведчаньне мае нумар 0389711, выдадзенае МА РФ 24 лістапада 2014 году, з подпісам начальніка кадраў Паўднёвае вайсковае акругі генэрал-маёру С.Панеўчыка. Цікавы і камэнтар Чайнікава пра тое, што ён нядаўна вярнуўся з “БЗ” – баявога заданьня і раней “ветэранствам” пахваліцца ня мог.

Іншы цікавы дакумэнт, гэта слайд з рапартам С.Чайнікава, выкладзены 8-га лістапада 2014 году, пра прадстаўленьне чарговага водпуску за 2014 год. З гэтага рапарту вынікае, што С.Чайнікаў зьяўляецца шараговым кантрактнікам з 25 кастрычніка 2013 году, пасада – гранатамётчык 3-га аддзяленьня 1-га ўзводу 3-й роты 2-га батальёна в/ч 16544. Яго непасрэдныя камандыры – кам. аддзяленьня гв. старэйшы сяржант Агамірзоеў, камандыр узводу старэйшы лейтэнант Галаеў, камандыр роты капітан Чыгасаў, камандыр батальёну падпалкоўнік Амірханян.

З улікам вышэйпададзенага і раней здабытай інфармацыі адносна ўдзелу 8-й брыгады ў баёх на Данбасе, можна сьмела выказаць здагадку, што расейская вайсковая тэхніка і, ў прыватнасці, МЦЛБ 8-й АМСБр ЗС РФ, ёсьць ва ўзбраеньні т.зв. 2 матастралковага батальёну НМ “ЛНР”, а расейскі кантрактнік гэтай жа брыгады С.Чайнікаў зьяўляецца “ветэранам” расейскай вайсковай авантуры ва Украіне.

Тэма расійскай бранетэхнікі, якая была заўважаная ва Украіне, досыць добра раскрытая блёгерам-дасьледчыкам “sled-vzayt”, адзін з апошніх запісаў прысьвечаны менавіта МЦЛБ у варыянце з буйнакаліберным кулямётам “Утёс” (рас.) – МЦЛБ ВМ, альбо “Корд” МЦЛБ ВМК.

8-я АМСБр горную мы ўжо шмат разоў фіксавалі ў кантэксьце “растоўска-ўкраінскіх камандыровак”, гл. тэматычныя спасылкі:

– 8-я горная матастралковая брыгада РФ ва Украіне September 22, 2014

– Выведпадразьдзяленьне 8-й МСБР горнай на мяжы з Украінай October 8, 2014

– “Show Must Go On”, або, “папярэднія ласкі” October 30, 2014

– Мэдаль “За адвагу” December 9, 2014

InformNapalm.org неаднойчы адзначаў, што большая частка публікацыяў заснаваная на інфармацыі, прадстаўленай нашымі чытачамі і сябрамі, якія самастойна зьдзяйсьняюць OSINT-выведку. Прадстаўлены матар’ял быў назьбіраны на падставе назіраньняў Міхаіл Нет, які і вызначыў тэхніку 8-й АМСБр на Данбасе.

Матар’ял да публікацыі падрыхтаваў Іраклі Камахідзэ

(с) Інфармацыя падрыхтаваная адмыслова для сайта InformNapalm, падчас перадруку й выкарыстаньня матар’ялу спасылка на наш праэкт абавязковая.

Пераклад Дзяніса Івашына