У папярэднім матар’яле InformNapalm, прысьвечаным ідэнтыфікацыі расейскіх танкістаў, якія ўвосень 2014 году прайшлі праз «украінскую камандыроўку», былі раскрытыя 10 танкістаў 136-й асобнай мотастралковай брыгады (в/ч 63354, Буйнакск, Дагестан) Паўднёвае вайсковае акругі ЗС РФ. У публікацыі было падкрэсьленае, што калі раней асноўны акцэнт у OSINT-расьледаваньнях (выведка адкрытых крыніцаў) надаваўся выяўленьню й ідэнтыфікацыі падразьдзяленьняў, тыпу ўзбраеньня й геаграфіі падзеяў, то зараз надыйшоў час раскрыць асобы расейскіх вайсковых злачынцаў. У новым матар’яле гаворка пойдзе пра артылерыстаў гэтай жа брыгады, якія маюць дачыненьне да абстрэлу ўкраінскіх вёсак і гарадоў.

Варта зазначыць, што як і ў выпадку з выяўленьнем танкістаў 136-й АМСБр, InformNapalm быў першым рэсурсам, які ў верасьні 2014 году ідэнтыфікаваў расейскія артылерыйскія падразьдзяленьні, прыцягнутыя вайсковым камандаваньнем РФ для вядзення подлай, неканвэнцыйнай вайны на Данбасе. Сярод іх пазначаная 291-я артылерыйская брыгада (якая фігуруе ўжо ў 12-ці эпізодах нашых расьледаваньняў). Таксама падразьдзяленьне гаўбічнага самаходнага дывізыёну 152-мм САУ «Акацыя» 136-й АМСБр з Дагестана, што падмацаванае сэрыяй фатаздымкаў, якія адлюстроўваюць баявыя будні «ўкраінскае камандыроўкі».

Гэтую тэму ўвосень 2015 году больш дэталёва раскрыў украінскі блёгер sled_vzayt, у выніку расьледаваньня былі названыя імёны шасьці артылерыстаў – вайсковых злачынцаў. Але Інтэрнэт усё яшчэ захоўвае вялізны масыў інфармацыі ў выглядзе фатаздымкаў і цынічных камэнтароў, якія сьведчаць пра ўдзел Расеі ў вайне на Данбасе.

Яскравым прыкладам зьяўляюцца профілі сацсетак, на першы погляд прыстойных сямейнікаў, колішніх вайскоўцаў 136-й АМСБр Сяргея Шахаўцова з фотаальбомам «Украіна, жнівень 2014» і Ягора Вінклера з сэрыяй фота, зробленых падчас «растоўска-ўкраінскай камандыроўкі». Сярод гэтых фатаздымкаў шмат ужо знаёмых фота зь лета-восені 2014 году, якія раней публікавалі OSINT-дасьледнікі, але ёсьць і новыя.

Фігурант №1

Ідэнтыфікацыйныя дадзеныя: Сяргей Шахаўцоў, 17.03.1990 г.н., родам зь вёскі Ізмалкава Ліпецкае вобласьці. У сацсетках: «ОК» (архіў профілю, кантактаў), «VK» (архіў профілю, фотаальбому, кантактаў). Згодна з запісам на старонцы профілю, працуе ахоўнікам “ЧОП” у Маскве. Паводле іншых дадзеных працуе ў МНС Ліпецкае вобласьці (гл. подпіс да фота аварыі, таксама той жа фатаздымак ёсьць на ягонай старонцы). Тэрміновую вайсковую службу праходзіў ва УВ МУС РФ в/ч 3660. Падпісаў кантракт з МА РФ на службу ў 136-й АМСБр.

Зь ягоных фатаздымкаў найбольш характэрнымі ёсьць наступныя:

• фатаздымак С. Шахаўцова з двума таварышамі ў службе, якія «рэклямуюць» майку «Аэрапорт Луганск», з камэнтарамі. Фота было выкладзенае ў сьнежні 2014 году;

• фатаздымкі 1, 2, 3, выкладзеныя 6 верасьня 2014 г., якія зафіксавалі маршрут руху калёны на Данбасе, у раёне н/п Навасьветлаўка Луганскае вобласьці Украіны.

Заўвага: Відэа й фота з гэтай жа геалякацыяй да гэтага часу знаходзіцца на старонцы ўдзельніка «данбаскага паходу» 136-й АМСБр Дзьмітрыя Кірылава. Копія відэа на youtube:

• Сэрыя супольных фота – 1, 2, 3 буйнакскіх артылерыстаў з Данбаса, выкладзеных 6 верасьня 2016 г.

Фігурант №2

Ідэнтыфікацыйныя дадзеныя: Ягор Вінклер. Меркавана, родам з Казахстана, мае падвойнае, казахскае і расейскае грамадзянства. Жыве разам зь нейкай Яўгеніяй Такмаковай. У сацсетках: «VK» (архіў профілю, фотаальбому, кантактаў 1, 2), facebook. У 136-й АМСБр служыў паводле кантракту, які скасаваў да заканчэньня тэрміну (гл. у камэнтарох).

• фотасьведчаньні «прыгодаў» артылерыстаў 136-й АМСБр: Дагестан – Растоўская вобласьць – Данбас.

У выніку гэтага расьледаваньня ў «скарбонку» расейскіх вайсковых злачынцаў былі дададзеныя яшчэ два вайскоўцы 136-й АМСБр. Гэта восьмы «засьвет» 136-й АМСБр у кантэксьце «ўкраінскіх камандыровак», глядзіце ранейшыя публікацыі нашае валянтэрскае супольнасьці:

• Танкі Т-90 і САУ «Акацыя» 136-й АМСБр з Дагестана на мяжы з Украінай
• Фотасэсіі расейскіх танкістаў 136-й МСБР з «камандыроўкі»
• Расейскія танкі Т-90 136-й мотастралковай брыгады ў Луганскае вобласьці – фотафакт
• LifeNews “засьвяціў” 136-ю асобную мотастралковую брыгаду ў Дэбальцава
• Відэа пра ўдзел 136-й асобнай мотастралковай брыгады РФ у вайне на Данбасе (глядзець з пераходам на youtube)
• Па сьлядох «украінскай камандыроўкі» выведніка 136-й АМСБр
• Фотапаляваньне: расейскія «Тыгры» выведроты 136-й АМСБр злоўленыя на Данбасе
• Ідэнтыфікаваныя танкісты 136-й АМСБр, якія ваявалі ва Украіне

Працяг будзе…

Матар’ял да публікацыі падрыхтаваў на падставе ўласнага OSINT-расьледаваньня Іраклі Камахідзэ.

Пераклаў на беларускую мову Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.