Міжнародная валянтэрская супольнасьць InformNapalm працягвае ідэнтыфікацыю ўнікальных адзінак зброі й тэхнікі з арсэналу аб’яднаных расейска-тэрарыстычных сілаў, зафіксаванай на Данбасе. Праца ў гэтым напрамку зьяўляецца важным аспэктам у зборы доказавай факталягічнай базы расейскай гібрыднай агрэсіі супроць Украіны. Наконадні выведнікі InformNapalm прадэманстравалі, як «Сэлфі з Т-90А на Данбасе вандруе з профіляў расейскіх танкістаў у профілі тэрарыстаў». Падчас расьледаваньня была зьдзейсьненая ідэнтыфікацыя танку 136-й АМСБр ЗС РФ з Дагестана. У межах гэтага расьледаваньня будзе зроблены аналіз бронеаўтамабілю «Тыгр-М» выведроты той жа 136-й мотастралковай брыгады. Гэтая тэхніка таксама зафіксаваная ва ўзбраеньні расейска-тэрарыстычных сілаў на Данбасе.

Новыя доказы былі выяўленыя ў фотаальбоме 43-гадовага расейскага найміта Алега Рахімава (архіў профілю, фотоальбому, кантактаў), які прыбыў будаваць «рускі мір» на Данбасе з Алтайскага краю РФ. Ён выклаў у сваім профілі масу цікавых фота з сучасным расейскім узбраеньнем і тэхнікай, якія перакінутыя на Данбас. У ягоных фота маецца і фатаздымак (архіў) з браняваным аўтамабілем «Тыгр-М” (ГАЗ-2330), выкладзены 16 сакавіка 2016 г. Характэрна, што на дзьвярох сфатаграфаванага «Тыгра» маецца тактычны знак, знаёмы OSINT-выведнікам яшчэ з 2014 году, – гэта эмблема 136-й асобнай мотастралковай брыгады (в/ч 63354, г. Буйнакск і с. Ботліх, Дагестан) 58-й агульнавайсковай арміі Паўднёвае вайсковае акругі ЗС РФ.

Падобныя бронеаўтамабілі з тактычным знакам 136-й АМСБр фігуравалі ў расьледаваньнях InformNapalm і раней. У лютым 2015 году мы апублікавалі матар’ял «Па сьлядох «украінскай камандыроўкі» выведніка 136-й АМСБр», у якім таксама пададзенае фота, якое сьведчыць пра «украінскую камандыроўку» зводнага выведпадразьдзяленьня 136-й мотастралковай брыгады з Дагестана з такімі ж «Тыграмі» і тактычнымі знакамі.

«Тыгры» дагестанскага мотастралковага злучэньня фігуравалі і ў іншых публікацыях, у тым ліку ў матар’яле «Ідэнтыфікаваныя супрацоўнікі МУС РФ Чачэніі, якія прайшлі праз «украінскую камандыроўку»». У гэтым матар’яле пададзенае фота пазуючых на тле бронеаўтамабілю чачэнскіх міліцыянтаў-кадыраўцаў, якія былі на Данбасе. Адметна тое, што прыбраўшы на фота рэгістрацыйны нумар машыны, яны забыліся схаваць тактычны знак 136-й АМСБр на ейных дьзвярох.

Нагадаем, што падчас акупацыі Крыма расейскія інтэрвэнты актыўна выкарыстоўвалі бронеаўтамабілі «Тыгр» для блякаваньня й штурмаў украінскіх вайсковых аб’ектаў. У відэа ніжэй – унікальныя кадры руху калёны «Тыграў» з бухты Казачай ў Сэвастопалі ў першыя дні сакавіка 2014 году.

Апроч «Тыгра» у фотаальбоме Рахімава ёсьць фота 1, 2 (архіў 1, 2) з найноўшым БТР-82, які маецца ва ўзбраеньні выключна Збройных сілаў Расейскай Фэдэрацыі. Новыя бронетранспартэры 82-й мадыфікацыі часта фіксаваліся на Данбасе, пра гэта пісалі нават расейскія блёгеры. Яны ня толькі добра выходзілі на фота, але й добра гарэлі праз удары ўкраінскіх жаўнераў.

Нагадваем, што міжнародная валянтэрская супольнасьць InformNapalm падчас зьдзяйсьненьня OSINT-расьледаваньняў задакумантавала каля 20 унікальных тыпаў узбраеньня й тэхнікі, якія былі перакінутыя на Данбас разам з вайсковымі адмыслоўцамі з Расейскай Фэдэрацыі. Гэта зьяўляецца наўпроставым доказам інтэрвэнцыі й агрэсіі з боку ўсходняга суседа. Таксама валянтэры супольнасьці задакумантавалі больш за 145 інцыдэнтаў з удзелам вайскоўцаў і/або тэхнікі з 72 вайсковых фармаваньняў Расейскай Фэдэрацыі (ЗС РФ, ГРУ ГШ РФ, ФСБ РФ, МУС РФ, ГУФСВП РФ). Гл. «Прафэсійная расейская армія ва Украіне. Дасьледаваньне й інфаграфіка» і ўкладку «Падразьдзяленьні» нашай базы дадзеных.

Толькі паводле нашых расьледаваньняў, 136-я АМСБр ЗС РФ фігуравала больш чымся у пяцёх эпізодах «украінскае камандыроўкі». То бок, камандаваньне і вайскоўцы брыгады маюць, як мінімум, паўстаць перад вайсковым трыбуналам у якасьці абвінавачаных і/або сьведак што да факту выкананьня вайсковых злачынстваў на тэрыторыі сувэрэннай суседняй дзяржавы. Расейскія й заходнія журналісты, якія хочуць адшукаць праўду, могуць ужо зараз задаваць няёмкія пытаньні камандаваньню вайсковых частак, пералічаных у базе дадзеных.

Матар’ял да публікацыі падрыхтаваны OSINT-экспэртамі міжнароднае валянтэрскае супольнасьці InformNapalm. Мы дзякуем карыстальніку з псэўданімам «Любо Пытный» за збор і публікацыю фатаздымкаў, якія дакумантуюць факты расейскай агрэсіі.

На беларускую мову пераклаў Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Падзяліцеся публікацыяй у сацсеціве! Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.

Таксама вы можаце падтрымаць працу нашага сайта і ахвяраваць на развіцьцё праэкту на старонцы Crowdfunding. Усе атрыманыя сродкі йдуць выключна на тэхнічную падтрымку рэсурсу InformNapalm.org. Разам пераможам!