У выніку чарговага OSINT-расьледаваньня міжнародная валянтэрская група InformNapalm падае новыя факты ўдзелу падразьдзяленьняў Збройных сілаў Расеі ў баявых дзеяньнях на Данбасе (з найбуйнейшай базай дадзеных расьледаваньняў можна азнаёміцца ​​ў табліцы ў спасылцы). У гэтым матар’яле сабраная інфармацыя што да “украінскай камандыроўкі” падразьдзяленьня 18-й асобнай матастралковай брыгады (в/ч 27777, мейсца дысьлякацыі – Чачэнія, Ханкала і Калінаўская) 58-й агульнавайсковай арміі Паўднёвае вайсковае акругі ЗС РФ, у прыватнасьці, сьведчаньні пра тры данбаскія камандыроўкі аднаго з вайскоўцаў названага вайсковага злучэньня, якое ўжо неаднойчы трапляла ў поле нашага зроку.

Раман Леанідавіч Рэвэр, у сацыяльным сеціве “VK” зарэгістраваны як Раман Рэвэра (архіў профілю, архіў фотаальбому, архіў кантактаў), пазьней у Instagram – revejra (архіў), паводле запісаў і фатаздымаў, 18.04.1991 г.н., Паўночная Асэтыя, г.Уладзікаўказ. Праходзіў службу ва Унутраных войсках МУС РФ.

Р.Рэвэр з 2014 году зьяўляецца вайскоўцам 18-й АМСБр, дысьлякаванай у Чачэніі. У 2014 годзе ён быў у складзе гаўбічнага самаходнага артылерыйскага дывіыіёну 2С3 “Акацыя”. З 2015 году – у складзе батальёну выведкі гэтай жа брыгады. Вядома, што вакансыяў у выведбата 18-й дастаткова: шматлікія кантрактнікі пасьля вяртаньня з Данбаса скасоўваюць дамовы, а забітых ва Украіне не вызнаюць за сваіх, як гэта было з Дзянісам Хусаінавым, якога мінулай датай сьпісалі як баявіка «ЛНР», пра што мы падрабязна распавядалі ў ліпеньскім матар’яле InformNapalm “11 сяброў Пуціна”: сэлфі-выведнікі 18-й АМСБр на Данбасе“.

Першая камандыроўка Рамана Рэвэра адбылася ўлетку-ўвосень 2014 году, у пік абвастрэньня баявых дзеяньняў на Данбасе, калі расейская вайскоўшчына, зразумеўшы, што ўкраінскія сілавікі пераламалі сытуацыю, а марыянэткі Расеі пачалі здаваць свае пазыцыі, зьдзейсьніла акт наўпроставай агрэсыі: падразьдзяленьні ЗСУ, якія выйшлі на пазыцыі ўздоўж дзяржаўнае мяжы, зазналі артылерыйскі абстрэл з тэрыторыі Расеі, а на Данбас былі ўведзеныя шматлікія тактычныя групы ЗС РФ.

Заўвага. Сярод вышэйпададзеных фатаздымкаў варта вылучыць фота, у якім зафіксаваная калёна САУ 2С3 “Акацыя” на маршы, у прыватнасьці з бартавым нумарам “623” (чырвоны). Нагадваем, што ў ліпеньскім матар’яле 2015 году “11 сяброў Пуціна”: сэлфі-выведнікі 18-й АМСБр на Данбасе” InformNapalm прадэманстраваў танкі 18-й АМСБр Т-72Б з чырвонымі бартавымі нумарамі. Чырвоныя трохзначныя бартавыя нумары на танках, а таксама САУ і іншай баявой тэхніцы да нядаўняга часу выкарыстоўваліся ў 18-й брыгадзе. Дзеля пацьверджаньня гэтага падаем фатаздымкі з расейскага блёгу «twower» з 14 кастрычніка 2011 году – там можна пабачыць багата фатаздымкаў тэхнікі гэтага вайсковага злучэньня з чырвонымі трохзначнымі нумарамі. Паводле нашых дадзеных, танкі Т-72Б і частка САУ 2С3 у працэсе пераўзбраеньня 18-й брыгады на Т-72 Б-3 і САУ 2С19 “Мста” былі перавезеныя на базы захоўваньня ў Краснадарскі край у 2014 годзе. З улікам вышэйпададзенага можна выказаць здагадку, што «зьнятыя з узбраеньня» абкатаныя танкі і САУ наўмысна і загадзя былі перакінутыя бліжэй да Украіны, каб пасьля іх можна было выкарыстоўваць на Данбасе.

Другая камандыроўка Рамана Рэвэра адбылася пасьля пяцімесяцовае паўзы, якая доўжылася з лістапада 2014 году па сакавік 2015 году. Мабыць, Рэвэру надакучылі строі і жыцьцё ў закрытым чачэнскім гарнізоне, да таго ж зьявіўся шанец атрымліваць патройны аклад у новым статусе выведніка-“дабраахвотніка” у пік чарговага абвастрэньня канфлікту на Данбасе пад Дэбальцава, калі расейскае вайсковае камандаваньне дзеля пералому сытуацыі задзейнічала тактычныя групы, перакінутыя з Растоўскай вобласьці РФ. У выніку другой камандыроўкі Р.Рэвэр на падставе загаду камандыра 18-й МСБр з 17 лютага 2015 году быў узнагароджаны суцяшальнай мэдалькай Маршала Жукава.

У траўні 2015 году Р.Рэвэр вярнуўся з Данбаса, пасьля чаго выправіўся ў адпачынак на мора і ў родны Уладзікаўказ. Пасьля адпачынку вярнуўся да гарнізоннага жыцьця ў 18-й АМСБр ў Чачэніі, якое доўжылася нядоўга, усяго каля двух месяцаў.

Трэйцяя камандыроўка Рамана Рэвэра пачалася ў жніўні 2015 году, калі чарговы зводны атрад 18-й брыгады высунуўся на Данбас і неўзабаве лёгкім рухам рукі з штатнага армейскага падразьдзяленьня ператварыўся на “апалчэньне наваросіі”. Апошнія фатаздымкі ў Instagram выкладзеныя з геатэгам “Красналуцкі гарадзкі аддзел МУС ЛНР” і “Горлаўская мэдвучэльня”.

Зь іншых цікавых фатаздымкаў і кантактаў расейскага кантрактніка 18-й АМСбр Р.Рэвэра варта вылучыць:

• фота з пазашляхавіком Mitsubishi L200 з буйнакаліберным кулямётам “Уцёс”, які ў нашых матар’ялах фігураваў і раней, у тым ліку ў ліпеньскім матар’яле 2015 году “Як Павал Губараў засьвяціў 18-ю гв. АМСБр ЗС РФ“;

• таксама варта адзначыць баявога таварыша Р.Рэвэра, асэтына Ацамаза Саўлохава, які часта фігуруе ў пазнаках на “Instagram” нашага фігуранту, у тым ліку на фота часоў другой данбаскай камандыроўкі і на фота з “джыпам Губарава”. А.Саўлохаву, у адрозненьне ад Рэвэра, не пашанцавала, бо ягоны апошні ваяж на Данбас зрабіў яго нікому непатрэбным калекай, пра што сьведчыць запіс на старонцы іншага асэтынскага тэрарыста і баявіка групоўкі “Суть времени” (рас.) Алана Маміева.

Рэзюмуючы гэтае расьледаваньне, хочам зазначыць, што ў Р.Рэвэра зьявілася пасыя ў Данецку, Ілона Сэндэр, што дадаткова пацьверджвае ягонае мейсцазнаходжаньне.

Даведка: 18-я АМСБр сфармаваная напрыканцы 2008 году ў выніку рэфармаваньня ЗС РФ і праграмы пераходу на новыя стандарты з падразьдзяленьняў колішняй 42-й матастралковай дывізыі, якая дысьлякавалася ў Чачэніі, у н.п. Ханкале і Калінаўскай. Гэтае вайсковае злучэньне зьяўляецца адным з найбольш баяздольных у складзе сухапутных войскаў ЗС РФ. Брыгада цалкам пераабсталяваная і пераўзброеная на новыя і мадэрнізаваныя адзінкі тэхнікі і ўзбраеньня. У 18-й брыгадзе таксама ёсць т.зв. нацыянальны батальён, укамплектаваны вайскоўцамі з Паўночнага Каўказа, збольшага – колішнімі баявікамі, якія трапілі пад амністыю і пазьней служылі ў падразьдзяленьнях Кадырава і Ямадаева. Падразьдзяленьні брыгады (дывізыі) удзельнічалі ў расейскай агрэсыі супроць Грузыі ў жніўні 2008 году. 18-я АМСБр, у тым ліку ейны «чачэнскі батальён», неаднойчы фігуравалі ў кантэксьце «украінскіх камандыровак», у тым ліку ў матар’ялах InformNapalm.org, гл. спасылкі:

 – Нацыянальныя батальёны з складу Паўднёвае вайсковае акругі ў баявых дзеяньнях ва Украіне

– Пра расейскі сьлед і “ГРАД” зь яснага неба…

– Танкі 18-й асобнай матастралковай брыгады з Чачэніі ва Украіне

– Як Павал Губараў “засьвяціў” 18-ю гв. АМСБр ЗС РФ

– “11 сяброў Пуціна”: “сэлфі”-выведнікі 18-й АМСБр на Данбасе
Матар’ял да публікацыі падрыхтаваны на падставе ўласнага OSINT-расьледаваньня міжнароднай валянтэрскай групай InformNapalm. Аўтары матар’ялу Victory Krm і Іраклі Камахідзэ.

(с) Інфармацыя падрыхтаваная адмыслова для сайту InformNapalm.org, падчас перадруку й выкарыстаньня матар’ялу актыўная спасылка на аўтараў і наш праэкт абавязковая.

Пераклаў на беларускую мову – Дзяніс Івашын