Лякальная Антытэрарыстычная апэрацыя на Усходзе Украіны магла скончыцца яшчэ паўтара году таму, калі ўкраінскія вайскоўцы разьвілі пасьпяховы наступ на сілы бандфармаваньняў і практычна замыкалі кола атачэньня на дзялянцы дзяржаўнае мяжы Украіны з РФ у Луганскае вобласьці. Разумеючы, што сіламі баявікоў Расея не дасягне посьпеху, збройныя сілы РФ пачалі выкарыстоўваць подлую тактыку зьдзяйсьненьня ракетна-артылерыйскіх удараў з памежных з Украінаю раёнаў Растоўскае вобласьці. Адразу пасьля гэтага яны ўварваліся сіламі тактычных групаў, якія былі засяроджаныя ўздоўж мяжы. Ёсьць шмат доказаў, якія апісваюць падзеі тых дзён, і нягледзячы на ​​тое, што расейскія спэцслужбы ўсяляк спрабуюць зачысьціць любую ўцечку інфармацыі з боку вайскоўцаў, у Сеціве застаюцца сьляды канкрэтных фактаў уварваньня. Міжнародная валянтэрская супольнасьць InformNapalm вырашыла падаць сэрыю расьледаваньняў, якія прадэманструюць дадатковыя доказы ўдзелу расейскай артылерыі ў вайне на Данбасе, у тым ліку раскрыюць інфармацыю пра канкрэтныя падразьдзяленьні і пра расейскіх вайсковых злачынцаў, якія прымалі ўдзел у абстрэлах з-за “парэбрыка”.

Яшчэ ў верасьні 2014 году InformNapalm выявіў і падаў зводныя дадзеныя што да групоўкі сілаў уварваньня ЗС РФ, якія былі сканцэнтраваныя ўздоўж мяжы Украіны ў Растоўскае вобласьці РФ. Крыху пазьней мы падалі інфармацыю пра артылерыйскі складнік расейскай групоўкі, што ў выніку было адлюстраванае ў публікацыях з доказамі пра прысутнасьць таго ці іншага падразьдзяленьня зь яе складу, у тым ліку пра 291-й АБ (1, 2, 3). Інфармацыя пра ўсе факты ўварваньня адлюстраваная ў матар’яле “Прафэсыйная расейская армія ва Украіне. Дасьледаваньне і Інфаграфіка”.

Першым артылерыйскім падразьдзяленьнем у нашым сьпісе што да артылерыі фігуравала 291-я асобная артылерыйская брыгада (в/ч 64670, Інгушэтыя, станіца Троіцкая, у складзе 58-й агульнавайсковай арміі ПВА ЗС РФ), якая потым неаднаразова была зафіксаваная ў кантэксьце “растоўска-ўкраінскіх” камандыровак. Больш за тое, у кастрычніку 2015 году, мы выказалі здагадку, што зафіксаваныя ў Сірыі цягачы і буксаваныя гарматы належаць 291-й артбрыгадзе, што празь месяц было пацьверджанае ў выніку нашага ж OSINT (выведка адкрытых крыніцаў).

У гэтай публікацыі мы падаем новыя падрабязнасьці што да фактаў удзелу артылерыстаў 291-й артбрыгады ў вайне на Данбасе, якая зьяўляецца першай з запісаў новай сэрыі, у якіх мы маем намер раскрыць інфармацыю як пра падразьдзяленьні, гэтак і пра асобных расейскіх вайсковых злачынцаў, якія выконвалі злачынныя загады.

Ільнур Ілсуравіч Афлятунаў, 20.07.1990 г.н., пражывае ў г.Казань. Архівы на профіль, на фотаальбом 1, 2, 3, на кантакты. Маці – Нурыя Афлятунава,  сястра – Наіля Галіахметава.

І.Афлятунаў на вайсковую службу быў рэкрутаваны напрыканцы 2013 году, паводле разьмеркаваньня трапіў на Паўночны Каўказ у дысьлякаваную ў Інгушэтыі 291-ю асобную артылерыйскую брыгаду ў склад цяжкога гаўбічнага артылерыйскага дывізыёну, які мае ва ўбраеньні 152-мм гаўбіцы 2А65 “Мста-Б”. У сярэдзіне лета 2014 году, да моманту абвастрэньня баявых дзеяньняў на Данбасе, малодшы сяржант Афлятунаў у складзе сваёй гаўбічнай батарэі быў выпраўлены ў “растоўска-ўкраінскую камандыроўку” у памежны з Украінай Каменскі раён Растоўскае вобласьці, дзе прабыў да сярэдзіны восені. Пасьля вяртаньня ў мейсца дысьлякацыі ў станіцу Троіцкую, празь некалькі месяцаў, а менавіта напрыканцы 2014 г., Афлятунаў звольніўся ў запас з тэрміновае службы. Ягоная вайсковая кар’ера ня скончылася – адразу ж па звальненьню Афлятунаў працягнуў вайсковую службу і падпісаў 3-х гадовы кантракт з МА РФ у той жа 291-й артылерыйскай брыгадзе. Паводле адпускнога квітку, выдадзенага на ягонае імя ў в/ч 64670, з 24 сьнежня 2014 году па 23 студзеня 2015 году, Афлятунаў быў у адпачынку, пасьля чаго вярнуўся ў мейсца дысьлякацыі.

Фатаздымкі злачынных абстрэлаў тэрыторыі Украіны з Растоўскае вобласьці РФ улетку-ўвосень 2014 году, вайсковы злачынца І.Афлятунаў выклаў на сваю старонку сацсеціва “VK” у верасьні 2014 году (разьдзел “Захаваныя фатаздымкі Ільнура”). Нагадваем, што падобную сэрыю фатаздымкаў з Каменскага раёну Растоўскае вобласьці мы зафіксавалі і ў іншых артылерыстаў 291-й брыгады, што адлюстраванае ў папярэдніх публікацыях InformNapalm. Храналёгія, ландшафт мясцовасьці, маскаваньне тэхнікі і гарматаў, а таксама вонкавы нестатутны выгляд вайскоўцаў з прысмакам “наваросіі”, кажа сам за сябе.

2014 год (архівы на некаторыя фатаздымкі: 1, 2, 3, 4, 5, 6, 7, 8, 9, 10)

У фотападборцы сямейства Афлятунавых выяўленыя ўзнагароды – нагрудны знак “За службу на Каўказе”, выдадзены паводле загаду камандыра в/ч 64670 №888 з 01.10.2014 г.; памятна-юбілейны мэдаль “20 гадоў 58-й Арміі” і мэдаль “За баявую адзнаку” (архівы 1, 2, 3, 4), на падставе загаду МА РФ №677 з 02.10.2015 г., нумар мэдалю – 2266. Таксама сяржанцкія пагоны паводле загаду №4 з 11.06.2015 г. камандыра в/ч 64670 пра наданьне  званьня “сяржант” і адпускны дакумант №544 з 24.12.2014 г. з подпісам часова выконваючага абавязкі гэтай жа вайсковай часткі.

Заўвага: мэдаль «За баявыя адзнакі» – ведамасная ўзнагарода МА, якой ўзнагароджваюць вайскоўцаў Збройных Сілаў Расейскай Фэдэрацыі:

• за адзнаку, адвагу і самаадданасьць, праяўленыя падчас выканання задачаў у баявых умовах і падчас зьдзяйсьненьня спэцыяльных апэрацыяў ва ўмовах, спалучаных з рызыкай для жыцьця;
• за ўмелыя, ініцыятыўныя і рашучыя дзеяньні, якія спрыялі пасьпяховаму выкананьню баявых задачаў;
• за пасьпяховае кіраўніцтва дзеяньнямі падначаленых падчас выкананьня баявых задачаў.

2015 год (архівы на некаторыя фатаздымкі 1, 2, 3, 4, 5, 6, 7)

Характэрна, што зь лета 2015 году фігурант Афлятунаў выклаў у сваім профілі новыя фатаздымкі з вайсковай тэматыкай зь ягонай другой “украінскай камандыроўкі”. Гэта фота, зробленыя ў палявых умовах, дзе навасьпечаны і пасталеўшы сяржант пазуе паноўна ў палёх, у поўнай баявой выкладцы, у нестатутнай форме “горка”, з зброяй і радыёстанцыяй.

291-я артбрыгада – не адзінае падразьдзяленьне ЗС РФ, якое абстрэльвала тэрыторыю Украіны:

• У лістападзе 2014 году, былі апублікаваныя доказы пра “баявы шлях” рэактыўнага дывізіыну 200-й АМСбр Асаблівага прызначэньня Паўночнага флёту (РСЗВ “Град”, в/ч 08275, пас.Печанга Мурманскае вобласьці), у тым ліку і відэасьведчаньні абстрэлаў з памежных з Украінаю раёнаў Растоўскае вобласьці, а таксама непасрэдна з тэрыторыі Украіны, пад Краснодонам. Фота і відэа абстрэлаў былі ўзятыя з старонак сацсетак вайскоўцаў 200-й брыгады.

• У сьнежні 2014 году быў апублікаваны матар’ял пра выяўленае ў Куйбышаўскай раёне Растоўскае вобласьці рэактыўнае падразьдзяленьне з складу 7-й расейскай акупацыйнай базы (РСЗВ “Град”, г.Гудаута, акупаваная Абхазыя, Грузыя).

Глядзіце тэматычныя спасылкі што да 291-й Артбрыгады

• Войскі РФ, якія засьвяціліся ўздоўж мяжы з Украінай і на Данбасе, August 26, 2014
• Ідэнтыфікацыя сілаў уварваньня ЗС РФ. Падразьдзяленьні і іхныя страты на тэрыторыі Украіны, September 19, 2014
• Ідэнтыфікацыя частак і ўзбраеньня артылерыйскіх падразьдзяленьняў расейскіх сілаў уварваньня, September 30, 2014
• “Баявы шлях” 291-й артылерыйскай брыгады ад Крыму да Данбаса, November 12, 2014
• Расея. Фота пазыцыяў артылерыі ЗС РФ, якая абстрэльвала тэрыторыю Украіны ў 2014 годзе, April 5, 2015
• Кантракт у баявікі “наваросіі” аформлены ў Валгаградзкім ваенкамаце, October 7, 2015
• Расея пачала замаскаваную наземную апэрацыю ў Сірыі, October 29, 2015
• Усход – справа тонкая: 29 вайскоўцаў з 291-й артбрыгады ЗС РФ у Сірыі, December 7, 2015

Матар’ял да публікацыі падрыхтаваў Іраклі Камахідзэ 

На беларускую мову пераклаў Дзяніс Івашын

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Актыўны распаўсюд у сацсетках вітаецца!