Міжнародная валянтэрская супольнасьць InformNapalm падчас маніторынгу памежных з Украінаю раёнаў Расейскай Фэдэрацыі выявіла актыўнае разгортваньне новай вайсковай інфраструктуры ля самай мяжы з Украінай адразу ў некалькіх раёнах. У зьвязку з гэтым мы пачынаем цыкл публікацыяў што да раскрыцьця інфармацыі пра новыя вайсковыя аб’екты, якія могуць стаць пляцдармам у выпадку далейшай эскаляцыі агрэсыўных дзеяньняў з боку РФ. У першай частцы нашага цыклу гаворка пойдзе пра будаўніцтва базаў у горадзе Клінцы (Бранская вобласьць, РФ). Апэратыўнае будаўніцтва вайсковых аб’ектаў зьдзяйсьняецца ў мясьцінах, што знаходзяцца на аднолькавай адлегласьці (ля 45 км) ад мяжы РФ зь Беларусьсю (Гомельская вобл.) і Украінай (Чарнігаўская вобл.)  у зоне з падвышаным узроўнем радыяцыі праз аварыю на ЧАЭС.

Паводле паведамленьняў рэгіянальных СМІ Бранскае вобласьці, будуюцца два новыя вайсковыя аб’екты непадалёк мяжы зь  Беларусьсю і Украінай. Гэтак, у мясцовай газэце г. Клінцы «Ваше дело» (рас.) у матар’яле з 14 красавіка 2016 г. з гучным назовам «Рашэньне прынятае» вядзецца пра тое, што 25 сакавіка адбыліся публічныя слуханьні што да сьцьвярджэньня праэктаў плянаваньня вайсковых аб’ектаў у горадзе. Вядома, што адзін зь іх будзе знаходзіцца на вуліцы Паркавай, у раёне стадыёну «Труд», а другі ў Займішчы, на завулку Калініна, непадалёк жылой забудовы.

Рашэньне пра будаўніцтва прымалася падчас візыту прадстаўнікоў міністэрства абароны РФ у лютым 2016 году. Мэтай іхнага прыезду сталася дамоўленасьць пра будаўніцтва на тэрыторыі другога паводле велічыні гораду Бранскае вобласьці двух вайсковых аб’ектаў. Яшчэ ў той час на мясцовых форумах пачалі абмяркоўваць мажлівае аднаўленьне закінутых трох вайсковых гарадкоў в/ч 10876, перададзеных ў 2012 годзе муніцыпалітэту Клінцоў.

Паведамляецца, што зь 1 красавіка 2016 г. пачалася падрыхтоўка тэрыторыі да пабудовы казармаў, службовага жыльля, а таксама іншай інфраструктуры – спарткомплексаў з басэйнамі, крамаў і г.д. На верасень 2016 г. заплянаванае прыбыцьцё вайскоўцаў.

На гэтым фоне, у сваіх «пабліках» сацсеціва “VK” вайскоўцы 28-й мотастралковай брыгады (в/ч 61423, мейсца сталай дысьлякацыі Екатэрынбург, Цэнтральная вайсковая акруга ЗС РФ) пачалі актыўна цікавіцца станам закінутай вайсковай часткі і пэрспэктывамі арэнды жыльля ў Клінцах.

З аналізу камэнтароў пад пастамі вынікае, што першыя эшалёны зь Екатэрынбурга маюць прыйсьці ўжо ў сярэдзіне траўня 2016 году. Цалкам мажліва, што ўлетку вайскоўцы 28-й брыгады будуць жыць у палявых умовах у намётах, пакуль ня будзе збудаваны модульны лягер тыпу АПЛ-500, які выкарыстоўвае МА РФ для хуткага разгортваньня вайсковых падразьдзяленьняў. Падобнага кшталту модулі мы ўжо фіксавалі на тэрыторыі аэрадрому гораду Валуйкі, Белгарадзкай вобласьці РФ, дзе дысьлякуецца 23-я мотастралковая брыгада з Самары.

Лягер у Валуйках, Белгарадзкая вобласьць

Вайсковыя часткі, што будуюць у Клінцах, будуць знаходзіцца, як і ў Валуйках, непадалёк чыгуначнай станцыі і паблізу мяжы зь Беларусьсю і Украінай. Цалкам мажліва, яны будуць уваходзіць у новую 20-й агульнавайсковую армію Заходняе вайсковае акругі Расеі.

Такім чынам, можна канстатаваць, што Расея сьпешна арганізоўвае наступальную лінію ўздоўж мяжы зь Беларусьсю і Украінай, перакідваючы баяздольныя падразьдзяленьні з глыбіні краіны і паступова разьмяшчаючы іх ня толькі ў палявых лягерох растоўскае групоўкі сілаў уварваньня, але і ў іншых раёнах, якія мяжуюць з Гомельскай вобласьцю Беларусі і Чарнігаўскай і Харкаўскай абласьцямі Украіны.

Новая вайсковая база ў Клінцах, якае будзе знаходзіцца ўсяго за 90 км ад Гомеля, мае патэнцыйную пагрозу для Беларусі. На ёй будуць дысьлякаваныя падразьдзяленьні 28-й мотастралковай брыгады зь Екатэрынбурга, якія атрымалі значны баявы досьвед у выніку расейскай вайсковай агрэсіі супроць Украіны і Сірыі. Падчас мажлівай рэалізацыі крымскага сцэнару ў Беларусі, вайскоўцы брыгады пад прыкрыцьцём так званае “самаабароны” будуць забясьпечваць ахову і кантроль адміністратыўных установаў і блякаваньне вайсковых частак на тэрыторыі Гомельскае вобласьці.

(с) columbian.com

Міжнародная валянтэрская супольнасьць InformNapalm працягне маніторынг разгортваньня новых расейскіх вайсковых аб’ектаў і патэнцыйных сілаў уварваньня ля мяжы зь Беларусьсю і Украінай. Сачыце за абнаўленьнямі.

Чытайце таксама нашыя матар’ялы што да ўдзелу 28 АМСБр ЗС РФ у баявых дзеяньнях на тэрыторыі Украіны і Сірыі:

• Сьведчаньні ўкраінскае «камандыроўкі» выведроты 28-й брыгады зь Екатэрынбурга.
• Афіцэр рэактыўнага дывізыёну 28-й АМСБр атрымаў мэдаль за забойствы ўкраінцаў.
• Вяртаньне ў Растоўскую вобласьць у склад групоўкі сілаў уварваньня 28-й асобнай мотастралковай брыгады зь Екатэрынбурга.
• У сірыйскую камандыроўку толькі з службовым пашпартам. 28-я АМСБр ЗС РФ у Сірыі.

Матар’ял падрыхтавалі валянтэры міжнароднае супольнасьці InformNapalm Victory Krm і Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Падзяліцеся публікацыяй у сацсеціве! Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём. Разам пераможам!