Міжнародная валянтэрская група InformNapalm падчас зьдзяйсьненьня выведкі сацыяльных профіляў расейскіх тэрарыстаў выявіла доказы прысутнасьці баявікоў на тэрыторыі Наваазоўскага ветрапарку, а таксама зьдзейсьніла маніторынг дзейнасьці ветрапаркаў на акупаваных тэрыторыях Украіны.

З 2008 году ва Украіне дзейнічае зялёны тарыф, паводле якога кампаніі, што гэнэруюць ток з аднаўляльных крыніцаў (сонца, вецер, энэргія вады, паліва з адкідаў), атрымліваюць за яго значна болей, чымся за ток традыцыйных гэнэрацыяў – цеплавой і атамнай. Падтрымка зялёнае гэнэрацыі практыкуецца ва ўсім сьвеце. Для разьвітых краінаў гэта стратэгічныя інвэстыцыі і абарона экалёгіі. Ва Украіне зялёны тарыф з моманту свайго зьяўленьня ў першую чаргу стаў сродкам узбагачэньня для Андрэя Клюева, які ўсталяваў сонечныя батарэі “Active Solar”. Пасля таго як Activе Solar з-за анэксыі Крыма страціў лідэрства, наперад высунуліся апэратары ветраных станцыяў.

Адным з найбуйнейшых холдынгаў ў сэктары ветраэнэргетыкі Украіны зьяўляецца ТАА «Кіруючая кампанія «Ветраныя паркі Украіны» (далей – ТАА «КК «ВПУ»). У структуру холдынгу ўваходзяць прадпрыемствы ў вытворчасьці сучасных ветраэнэргетычных установак ТАА «Фурлэндэр Віндтэхноладжы», якое было створанае у Краматорску ў ліпені 2010 году, група ветраэнэргетычных паркаў, якія ўжо гэнэруюць электраэнергію альбо знаходзяцца на стадыі будаўніцтва/праэктаваньня.

Большая частка працуючых ветраных электрастанцыяў (далей – ВЭС): ветраныя паркі «Наваазоўскі», «Краснадонскі», «Лутугінскі» – знаходзяцца на акупаванай тэрыторыі Луганскае і Данецкае абласьцей. У 2014 годзе гэтыя прадпрыемствы зьмянілі прапіску і, згодна з ЕГРПОУ, перарэгістраваліся з адной супольнай адрэсаю: 01021, м.Кіеў, Клоўскі спуск, 7.

Не зусім зразумела, што зь ветраным паркам «Керчанскі», бо, паводле дадзеных украінскага дзяржрэестру, гэтае прадпрыемства зарэгістраванае ў АРК, Ленінскім раёне, сяле Навамікалаеўцы, вул. Кастрычніцкая, 18а. Паводле расейскага рэестру ВЭС, якія знаходзяцца ў акупаваным Крыме, ён, усё ж, перарэгістраваўся ў Расеі. ТАА “Ветраны парк “Керчанскі” прайшоў рэгістрацыю ў Расеі 28.11.2014 г., дырэктарам прадпрыемства згодна з абодвума рэестрамі – ўкраінскім і расейскім – зьяўляецца Бала Г.Э.

У артыкуле, апублікаваным у “Расейскай газэце” (rg.ru), было зазначанае, што крымскія ветраныя паркі адыйшлі ад украінскай мацярынскай кампаніі. «Мы зарэгістравалі ў Крыме чатыры юрыдычныя асобы, – распавядае дырэктар крымскіх ветрапаркаў Генадзь Бала. – Керчанскі ветрапарк ужо дзейнічае. Што да парку “Прысівашскі”, мы атрымалі ад “Крымэнэрга” тэхнічныя ўмовы на далучэньне да іхнае падстанцыі. На чарзе – паркі “Сацкі” і “Стэпавы”».

Зазначым, што ветраныя паркі «Наваазоўскі», «Краснадонскі», «Лутугінскі», «Антрацытаўскі» маюць ідэнтычны склад заснавальнікаў:

– ТАА «КК ВПУ», г. Краматорск;

– ТАА «Кампанія ў кіраваньні актывамі і адміністраваньнем пэнсыйных фондаў Укрмашінвэст», г.Краматорск;

– DEWOTT HOLDINGS LIMITED, Кіпр;

– ПАТ “Зачынены недывэрсіфікаваны вэнчурны карпаратыўны інвэстыцыйны фонд “М-КАПІТАЛ”, г.Данецк.

Канчатковым бэнэфіцыярным уласьнікам ветрапаркаў зьяўляецца Мкртчан Алег Артушавіч, вядомы ў шырокіх колах як гэнэральны дырэктар і саўладальнік «Індустрыяльнага Саюза Данбаса». Канчатковым бэнэфіцыярным уласьнікам ТАА «КК «ВПУ» зьяўляецца Блызьнюк Алена Уладзімераўна – жонка сына экс-губэрнатару Данецкае вобласьці і экс-міністра рэгіянальнага разьвіцьця, будаўніцтва і ЖКГ Анатоля Міхайлавіча Блызьнюка. Канчатковым бэнэфіцыярным уласьнікам вытворчага складніка ветраэнэргетыкі холдынгу ТАА «Фурлэндэр Віндтэхноладжы» зьяўляецца Максім Віктаравіч Яфімаў.

Такім чынам, у будаўніцтва ветрапаркаў інвэставаныя грашовыя сродкі акцыянэраў ІСД, сям’і колішняга губэрнатару Данецкае вобласьці Анатоля Блызьнюка і Максіма Яфімава – народнага дэпутата ад БПП.

Як паведамляюць “Нашыя Грошы“, у 2011 годзе ГП «Энэргарынак» падпісала дамову з ТАА «Ветраны парк Наваазоўскі» адносна паставак электраэнергіі.

Адначасова ў сакавіку – красавіку 2015 году нацыянальная камісыя ў дзяржаўным рэгуляваньні ў сфэры энэргетыкі прыняла шэраг пастановаў, паводле якіх было прынятае рашэньне не пералічваць плацяжы вытворцам электрычнае энэргіі, абсталяваньне якіх знаходзіцца на непадкантрольнай Украіне тэрыторыі. Ветраны парк “Наваазоўскі” быў уключаны ў гэты сьпіс. У красавіку 2015 году ТАА «Ветраны парк “Наваазоўскі”» і ВЭА «Ветраэнэргапрам» дамагліся праз суд выключэньня іх зь пераліку электрастанцыяў, якія працуюць на непадкантрольнай Украіне тэрыторыі. Суд прыняў да ўвагі тое, што магутнасьці кампаніяў знаходзяцца на тэрыторыі Розаўскае сельрады Данецкае вобласьці (адмінцэнтар – сяло Роза Люксэмбург). У лістападзе 2014 году праз распараджэньне Кабміна да непадкантрольных украінскай уладзе населеных пунктаў у Наваазоўскім раёне былі залічаныя толькі с.Чырвонаармейскае, г.Наваазоўск, с.Прыморскае Старабешаўскага раёну. Доказы знаходжаньня магутнасьцяў кампаніяў на непадкантрольнай тэрыторыі суду не былі пададзеныя. 22.07.2015 г. суд прыняў рашэньне, што ГП «Энэргарынак» мае кампэнсаваць 52,7 млн грн. кампаніі ТАА «Ветраны парк Наваазоўскі».

Мы ня будзем разглядаць юрыдычныя нюансы гэтага працэсу, але, з свайго боку, зазначым: нягледзячы на ​​тое, што вытворчасьць электраэнергіі знаходзіцца на «спрэчнай» тэрыторыі, тым ня менш, прадстаўнікі расейскіх акупацыйных войскаў не пакінулі ветраны парк па-за сваёй увагай.

Калі раней фіксаваліся простыя фота “на памяць” на тле ветраных установак, то зараз каманда InformNapalm знайшла доказы, як вайсковыя злачынцы гаспадараць на тэрыторыі Наваазоўскага ветрапарку. Яны свабодна ўздымаюцца на вежы ветраных установак, зьдзяйсьняюць назіраньне. Усё гэта зафіксаваў на відэа баявік з Луганска Артур Щчаглакоў (VK: https://vk.com/id322848798, архіў: https://archive.is/ixuhE, https://archive.is/nr4gL).

Відэа: “Наваазоўскі ветрапарк: тэрарыст уяўляе сябе касманаўтам”

Разгледзім пазыцыі фільмаваньня на мапе. Здымка зьдзяйсьняецца зь ветраўстаноўкі тыпу FL-2500 вытворчасьці “Фурлэндэр Віндтэхноладжы”. Удалечыні на відэа можна пабачыць мора, леваруч – від на Саханку, праваруч – ветраўстаноўкі тыпу USW 56-100.

Гэтая геалякацыя сьведчыць пра тое, што відэа зробленае з тэрыторыі Наваазоўскага ветранога парку.

Што робяць баявікі на тэрыторыі ВЭС? Ці то ахоўваюць, ці то зьдзяйсьняюць назіраньне пазыцыяў, ці то выкарыстоўваюць ветракі як прыкрыцьцё для свайго лягеру. У профілі ёсьць яшчэ адное відэа з палявым лягерам, пазыцыі якога вызначыць не ўдалося.

У пацьверджаньне нашых словаў аэравыведка ППСМАП “Дняпро-1” выявіла скопішча тэхнікі ў н.п. Безыменнае. На фота аэравыведкі зафіксаваныя абарончыя рубяжы ля падножжа ветраной устаноўкі, зь якой рабіў здымку Артур Щчаглакоў.

Такім чынам, нягледзячы на ​​наяўнасьць або адсутнасьць населенага пункта ў сьпісе непадкантрольных, вытворчасьць электраэнергіі зьдзяйсьняецца пад асаблівым кантролем прадстаўнікоў расейскіх акупацыйных войскаў. Колькі каштуе гэтая “ахова” уласьнікам ветрапарку?

У будучыні каманда InformNapalm працягне назіраньне за працай ветраэлектрастанцыяў ня толькі ў раёне Наваазоўску, але і ў Лутугінскім, Краснадонскім, Антрацытаўскім раёнах.

Матар’ял да публікацыі падрыхтавала Victory Krm

Пераклаў на беларускую мову – Дзяніс Івашын

(с) Інфармацыя падрыхтаваная адмыслова для сайту InformNapalm.org, падчас перадруку й выкарыстаньня матар’ялу актыўная спасылка на аўтара і наш праэкт абавязковая.