Падчас збору інфармацыі па расейскіх вайсковых злачынцах, удзельніках неабвешчанай вайны супраць Украіны, выяўленыя чарговыя ўзнагароджаныя з складу БТГр (батальёна-тактычная група) 7-й расейскай акупацыйнай вайсковай базы (в/ч 09332 Гудаута, Абхазыя, Грузыя), якія прайшлі праз “растоўска-ўкраінскую камандыроўку”:

– Гайдукоў Вячаслаў Аляксандравіч, вайсковец-кантрактнік з пасадаю намесьніка камандыра ўзводу выведпадразьдзяленьня 7-й в/базы. Узнагароджаны “мэдалём Жукава”. Узнагародны ліст з нумарам №0541 з 22 студзеня 2015 году падпісаны вярхоўным галоўнакамандуючым – прэзыдэнтам Расеі Пуціным.

Заўвага: “мэдаль Жукава” – дзяржаўная ўзнагарода РФ, прызначаная для ўзнагароджаньня вайскоўцаў Міністэрства абароны й іншых ведамстваў, за мужнасьць і адвагу, праяўленыя ў баявых дзеяньнях падчас абароны Айчыны і дзяржаўных інтарэсаў Расейскай Фэдэрацыі..

– Аляксандр Дзям’яноўскі, вайсковец-кантрактнік танкавага падразьдзяленьня 7-й в/базы. Згодна з ягоным уласным камэнтаром, узнагароджаны “за баявыя заслугі” (дакладна ідэнтыфікаваць тып мэдалю не атрымалася).

Тое што Гайдукоў і Дзям’яноўскі ўзнагароджаныя за расейскую авантуру ва Украіне пацверджвае шэраг фатасьведчаньняў і камэнтароў.

Мяркуючы па ўсім, у Гайдукова гэта ня першая ўкраінская камандыроўка. У ягоным альбоме ёсьць фатаздымак, заладаваны ў кастрычніку 2014 году, дзе ён пазуе разам з “баявымі таварышамі” у характэрным для баявікоў “наваросіі” выглядзе. На іншым фота ён пазуе на тле таблічкі чыгуначнае плятформы ў Пэрсыянаўцы – пасёлак у Кастрычніцкім раёне Растоўскае вобласьці (непадалёк ад палігону Кадамаўскі, дзе разгорнуты адзін з базавых лягероў растоўскае групоўкі расейскіх сілаў уварваньня). Сярод фатаздымкаў Гайдукова, заладаваных у красавіку-траўні 2015 году, фігуруюць слайды з раёну згаданага вышэй палігону Кадамаўскі, у тым ліку на тле тушэньня пажару лятаком “Іл-76” пасьля надзвычайнага здарэньня (пажару й сэрыі выбухаў) 28 красавіка.

Альбом Дзям’яноўскага больш сьціплы і менш зьмястоўны, затое ён багаты на камэнтары, зь якіх  можна даведацца, што ён рыхтуецца да другой ўкраінскай камандыроўкі. У адным з слайдаў “вечная памяць”, заладаваным 27 кастрычніка 2014 году, ён ушаноўвае памяць загінулых вайскоўцаў 2-га МСБ (матастралковага батальёну) 7-й вайсковай базы. На слайдзе з 31 студзеня 2015 году ён хваліцца мэдалём, атрыманым “за баявыя заслугі”, якія камбрыг уручаў 2-му МСБ/БТГр (атрымліваецца, што БТГр 7-й в/базы была ўкамплектаваная збольшага вайскоўцамі     2-га батальёну з адпаведным узмацненьнем). Да гэтага ж фота ёсьць ягоны камэнтар зь 1-га лютага 2015 году пра гатоўнасьць да новай паездкі ў Кадамаўку (палігон Кадамаўскі Растоўская вобласьць).   

Пра “растоўска-ўкраінскія камандыроўкі” вайскоўцаў 7-й расейскай вайсковай базы з акупаванай Абхазыі (Грузыя) і пра іхныя страты, СМІ, а таксама “ІнформНапалм” паведамлялі й раней. Яшчэ напачатку кастрычніка 2014 году ў Мацьвеева-Курганскім раёне Растоўскае вобласьці была зафіксаваная самаходная артылерыя гудауцкай базы гл. “Баявыя разьлікі САУ “Акацыя” 7-й вайсковай базы, якія “партызаняць” у лясох уздоўж мяжы з Украінай”. У сьнежні ў Куйбышаўскім раёне Растоўскае вобласьці была выяўленая рэактыўная артылерыя – “Рэактыўная артылерыя 7-й расейскай акупацыйнай базы з Абхазыі на мяжы з Данбасам”. У лютым-сакавіку 2015 году “ІнформНапалм” паведамляў пра сытуацыю на 7-й в/базе што да “растоўска-ўкраінскай камандыроўкі” і падрыхтоўкі чарговай БТГр да адпраўкі – “З мандарынавага раю ва ўкраінскае пекла: як расейскіх кантрактнікаў дабраахвотна-прымусовым чынам пасылаюць забіваць украінцаў” і ”Тэрміноўцаў  7-й вайсковай базы РФ масава вэрбуюць у кантрактнікі для “украінскіх камандыровак”. У сакавіку гэтага году сьвежая БТГр з Абхазыі ўжо фіксавалася ў Кастрычніцкім раёне Растоўскае вобласьці – “Войскі растоўскае групоўкі зьдзяйсьняюць інтэнсыўную баявую падрыхтоўку і зладжваньне ў памежных з Украінай стэпах.”

Гэта першы выяўлены факт ўзнагароджаньня расейскага інтэрвэнта “мэдалём Жукава”. Згодна з інфармацыяй, атрыманай раней, расейскіх вайсковых злачынцаў (у тым ліку двойчы акупантаў з    7-й в/базы) узнагароджвалі іншымі мэдалькамі – дзяржаўнымі “За адвагу”, “мэдалём Суворава” і ведамаснымі “За воінскую доблесьць”, глядзіце спасылкі:

– “Мэдаль “За адвагу”” (узнагароджаны Анатоль Осіпаў з 8-й горнай)” 

– “Кавалер мэдалю “За адвагу”” – дэсантнік 106-й ПДД “Жэка-канспіратар”

– “Міхос “адважны” – выведчык 7-й в/базы, кавалер мэдалю “За адвагу””

– “Буратаў 5-й танкавай брыгады ўзнагароджваюць мэдалямі “За воінскую доблесьць””

– “Чарговы кавалер мэдалю “За воінскую доблесьць” з 5-й танкавай брыгады”

– “Вайскоўцаў 7-й вайсковай базы РФ з Абхазыі за ўдзел у баях на Данбасе ўзнагароджваюць мэдалямі”

– “Мэдаль Суворава як сродак заахвочваньня вайсковых злачынцаў”

Матар’ял да публікацыі падрыхтавалі: Іраклі Камахідзэ і krmvictory. Чарговых узнагароджаных з   7-й в/базы вылічыў “askai707”.

 (с) Інфармацыя падрыхтаваная адмыслова для сайта InformNapalm, падчас перадруку й выкарыстаньня матар’ялу спасылка на наш праэкт абавязковая.

Пераклад Дзяніса Івашына