Варта абароны Курапатаў у межах выкананьня патрабаваньняў Прадстаўленьня Генэральнай пракуратуры РБ № 0703-05д-1745 з 17.11.2012 г., а таксама Прадпісаньня Міністэрства Культуры РБ № 11-02-02/018 з 30.10.2012 г. зьдзяйсьняе рэгістрацыю ўсіх транспартных сродкаў парушальнікаў, а менавіта: наведнікаў, пастаўнікоў, пэрсаналу й абслугі незаконна збудаванага рэстарацыйна-забаўляльнага комплексу «Поедем Поедим» (колішні «Бульбашъ-холл») у ахоўнай зоне мэмарыялу Курапаты. На падставе атрыманай інфармацыі публікуем сфармаваную Базу дадзеных.

Урочышча Курапаты – адное з цэнтральных мейсцау у Беларусі, дзе савецкія карныя ворганы НКВД зьдзяйсьнялі масавыя расстрэлы мясцовага насельніцтва. Паводле розных ацэнак колькасьць забітых тут можа сягаць ад 30 да 250 тысячаў чалавек. Гэта, без перабольшваньня – найвялікшае мэмарыялізаванае сьведчаньне генацыду беларускага народу і наяўны доказ аднаго з самых жахлівых злачынстваў таталітарных рэжымаў у гісторыі чалавецтва.

11 кастрычніка 2018 г. падчас прэс-канфэрэнцыі ў офісе Сацыял-дэмакратычнай партыі Беларусі (Грамады) лідэра Варты абароны Курапатаў Паўла Севярынца й рэдактара беларускае службы InformNapalm, Дзяніса Івашына, прысьвечанай прэзэнтацыі створанай Базы дадзеных, было афіцыйна заяўленае пра намеры апублікаваць і надаць ёй статус адкрытага доступу. Апроч гэтага, было паведамленае, што актывісты Варты абароны пакідаюць за сабой права апублікаваць і пэрсанальныя дадзеныя ўдзельнікаў кампаніі дыскрэдытацыі Народнага мэмарыялу Курапаты.

Прэс-канфэрэнцыя Варты абароны Курапатаў, 11 кастрычніка 2018 г.

База дадзеных створаная на падставе фота- й відэафіксацыі ўдзельнікамі Варты абароны Курапатаў транспартных сродкаў усіх наведнікаў, пастаўнікоў, пэрсаналу й абслугі забаўляльняга комплексу “Поедем Поедим”. Маніторынг дзейнасьці рэстарацыі зьдзяйсьняецца ўжо цягам больш за 140 дзён – практычна з моманту адкрыцьця забаўляльнай установы й пачатку дзеяньня сёлетняй Варты абароны Курапатаў. Базу дадзеных распачынае запіс паводле фіксацыі, зробленай яшчэ 1 чэрвеня 2018 г. Рэгіструюцца аўтамабільныя нумары, маркі й мадэлі аўто, колер і тып кузаву. Апроч гэтага, у Базу патрапляюць усе аўтамашыны службаў таксі, якія зьдзяйсьняюць падвоз або забіраюць наведнікаў ці працаўнікоў комплексу.

Уся атрыманая інфармацыя апрацоўваецца, вэрыфікуецца й аналізуецца. З дапамогаю выведкі крыніцаў адрытага доступу (OSINT) зьдзяйсьняецца выяўленьне й ідэнтыфікацыя, адпаведная інфармацыя зводзіцца ў закрытую частку Базы дадзеных. Разглядаецца мэтазгоднасьць публікацыі й пашырэньня закрытай інфармацыі для грамадзянскай супольнасьці Беларусі.

Усе наведнікі, усе пастаўнікі, абслуга й пэрсанал – заносяцца ў Базу дадзеных. Усе, хто сьвядома туды ідзе, а трэба зазначыць, што абаронцы надаюць людзям інфармацыйную падтрымку, тлумачаць, што гэта за мейсца, што тут адбываліся расстрэлы людзей, што тут расстрэльныя яміны. Людзі йдуць сьвядома, пасьля гэтага патрапляюць у Базу дадзеных. Трэба зазначыць, што досыць шмат людзей, калі чуе, што чалавек будзе зафіксаваны і патрапіць у гэтую Базу дадзеных, разварочваюцца і сыходзяць, – падкрэсьліў Дзяніс Івашын.

На гэты момант у Базе зьведзеная інфармацыя пра звыш за 1100 фіксацыяў, фігуруць больш за 650 адзінак  аўтатранспартных сродкаў. Сярэдняя колькасьць наведваньня рэстарацыі складае – 9 машынаў кліентаў на дзень. База дазеных знаходзіцца ў рэжыме насычэньня зьвесткамі за папярэдні пэрыяд і актуалізацыі новай апэратыўнай інфармацыяй.

Незаконна збудаваны у ахоўнай зоне Курапатаў рэстарацыйна-забаўляльны комплекс “Поедем Поедим” зьяўляецца ня толькі ключавым элемэнтам кампаніі дыскрэдытацыі й дэсакралізацыі Народнага мэмарыялу, але паступова ператвараецца на ўстанову клюбнага тыпу для актыўных носьбітаў і праваднікоў дэструктыўнай ідэалёгіі «русскаго міра».

– Мы выяўляем тых людзей, якія з радасьцю будуць вітаць расейскую агрэсію, мы фіксуем дзясяткі людзей у майках з Пуціным альбо прыхільнікаў “русскаго міра”. Курапаты – гэта надзвычай важная, можа зараз нават ключавая кампанія, – зазначае Павал Севярынец.

Чытайце таксама: Комплекс “Поедем Поедим” наведаў расейскі чарнасоценны прапагандыст і прыхільнік ваеннай агрэсіі РФ

Кожны, хто сьведама або нясьведама карыстаецца паслугамі, зьдзяйсьняе пастаўку прадуктаў, працуе ці абслугоўвае незаконны забаўляльна-рэстарацыйны комплекс «Поедем Поедим», мае выразна й дакладна разумець, што ўдзельнічае ў арганізаванай кампаніі дыскрэдытацыі й дэсакралізацыі Народнага мэмарыялу Курапаты. Таксама мае ўсьведамляць, што выключна праз свае дзеяньні ён будзе падлягаць грамадзкай кампаніі астракізму. У выпадку, калі гэта прадстаўнік бізнэс-колаў, на ягоныя актывы будуць пашыраныя дзеяньні ўсеагульнага байкоту, што непазьбежна адаб’ецца на дзелавой рэпутацыі.

Для азнаямленьня зь інфармацыяй у Базе дадзеных націсьніце на яе і выкарыстоўвайце скролінг мышы. Для пошуку неабходна задзейнічаць камбінацыю клявішаў ctlr+F.

Уся інфармацыя, атрыманыя падчас фіксацыі, выяўленьня й ідэнтыфікацыі, патрапляе й застаецца ў Базе навечна. Ні для кога няма й ня будзе аніякіх выключэньняў. Кожны, хто жадае стаць кліентам гэтага забаўляльнага комплексу й удзельнікам кампаніі дыскрэдытацыі аднаго з самых вялікіх мэмарыялізаваных сьведчаньняў генацыду беларускага народу мае ўсьведамляць, што праз свае дзеяньні ён можа зганьбіць ня толькі ўласнае імя й рэпутацыю, але й імя сваіх родных і блізкіх, а таксама рэпутацыю сваіх дзелавых партнэраў.

Актывісты Варты абароны Курапатаў заклікаюць патрыётаў Беларусі далучацца штодня з 12.00 да 24.00 і дапамагаць фіксаваць удзельнікаў кампаніі дыскрэдытацыі нацыянальнага нэкропалю й дамагацца закрыцьця рэстарацыйна-забаўляльнага комплексу “Поедем Поедим” ля расстрэльных ямінаў ахвяраў НКВД, а таксама зьдзяйсьняць грамадзкі кантроль за спробамі зьнішчыць манумантальную кампазыцыю Народнага мэмарыялу.

Зьвяртаемся з просьбаю да нашых чытачоў максымальна пашырыць гэты матар’ял у беларускай інфапрасторы!

Матар’ял да публікацыі падрыхтаваны адмыслова для беларускае службы міжнароднае выведвальнае супольнасьці InformNapalm.

Падчас выкарыстаньня інфармацыі актыўная спасылка на крыніцу абавязковая.
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.