Валянтэры міжнароднае супольнасьці InformNapalm працягваюць сэрыю ультыматыўных публікацыяў, якія закліканыя спыніць злачынствы расейскіх тэрарыстычных сілаў ва Украіне і за ейнымі межамі. Згодна з агучаным ультыматумам, у адказ на кожнае парушэньне аб’яднанымі расейска-сэпаратысцкімі сіламі (АРСС) рэжыму спыненьня вагню на Данбасе, будзе апублікаванаеі чарговае OSINT-расьледаваньне з пазначэньнем імёнаў, прозьвішчаў, фатаздымкаў, бартавых і рэгістрацыйных нумароў, а таксама іншых падрабязнасьцяў і фактаў, зьвязаных з злачынствамі расейскіх пілётаў падчас вайсковай апэрацыі ў Сірыі.

У адказ на нядаўняе парушэньне рэжыму спыненьня вагню з боку АРСС у раёне Аўдзееўкі (Данецкая вобласьць, Украіна) мы публікуем дадзеныя расейскага пілёту Су-24М гвардыі маёра Румянцава Сяргея Аляксандравіча (архіў сацыяльнага профілю: https://archive.is/DwySx).
Ён зьяўляецца пілётам Су-24М з заводзкім нумарам 0715323 (архіў фатаздымку: https://archive.is/QoL5f) 6980-й гвардзейскай авіяцыйнай базы 1-га разраду, вайсковай часткі 69806 (Чалябінск), авіягрупа базуецца на аэрадроме Шагол.

фота: Срыншот галоўнай старонкі сацыяльнага профілю маёра Румянцава | VK

Характэрна, што астатняга разу маёр Румянцаў наведваў сацсеціва VK 20 верасьня 2015 а 01:16 уначы. Гэтая дата супадае з часовым пэрыядам перакідваньня авіяцыйнай тэхнікі РФ у Сірыю, якая была пасьля легалізаваная 30 верасьня 2015 году праз дазвол Савета Фэдэрацыі РФ на выкарыстаньне расейскай арміі за мяжою. Пры гэтым сьпікер Валянтына Мацьвіенка не ўдакладніла, у якім менавіта рэгіёне могуць быць выкарыстаныя расейскія збройныя сілы. Нагадаем, што падобная сытуацыя фармальнай легалізацыі ўдзелу расейскіх збройных сілаў у апэрацыях за межамі РФ была ў сакавіку 2014 году. Тады Савет Фэдэрацыі даў згоду на выкарыстаньне арміі Расеі на тэрыторыі Украіны. Пасьля Расея анэксавала Крым, і ўлетку 2014 году дазвол быў адкліканы. Гэта азначае, што чарговы дазвол на агрэсыўныя дзеяньні за межамі Расеі ня толькі легалізуе прысутнасьць авіяцыі ў Сірыі, але і зьяўляецца складоваю часткаю ў  глябальнай апэрацыі ў абароне “рускамоўнага насельніцтва” у любой іншай краіне сьвету.

Нагадаем, што 22 верасьня, замежныя СМІ з спасылкай на спадарожнікавыя здымкі, якія апублікавала амэрыканская прыватная выведвальная кампанія Stratfor, прадэманстравалі значнае нарошчваньне Расеяй вайсковае прысутнасьці ў Сірыі. У сваю чаргу валянтэры міжнароднае дасьледніцкае групы InformNapalm зьдзейсьнілі ўласны аналіз сірыйскіх фатаздымкаў расейскай авіяцыі і зрабілі выснову, што на мейсцы падзеяў зафіксаваны Су-30СМ, бартавы нумар – “чырвоны” 24 (RF-95003), заводзкі нумар 10МК5 10МК5 1105. Было вызначанае, што лятак знаходзіцца ва ўзбраеньні 120-га зьмяшанага авіяцыйнага палку 303-й гвардзейскай зьмяшанай авіяцыйнай дывізыі 3-га Камандаваньня ВПС і СПА Усходняе вайсковае акругі на аэрадроме Домна (Забайкальскі край).

Раней, 15 верасьня, валянтэрская група InformNapalm зьдзейсьніла статыстычны аналіз вайсковых выправаў расейскіх вялікіх дэсантных караблёў у сірыйскі порт Тартус і выявіла значнае павялічэньне дынамікі перакідваньня сілаў і сродкаў у Сірыю за час з 2013 па верасень 2015 году. Статыстыка і інфаграфіка дадзеных даступныя ў спасылцы.

Таксама, напярэдадні рашэньня Савета Фэдэрацыі на адкрытае выкарыстаньне арміі за межамі Расеі, валянтэры “ІнфармНапалм” падчас зьдзяйсьненьня выведкі сацыяльных профіляў расейскіх вайскоўцаў выявілі шэраг фактаў, якія дэманструюць падрыхтоўку ВПС РФ да магчымага выкарыстаньня ўдарнае авіяцыі, а таксама зафіксавалі, зь якога менавіта аэрадрому адбывалася перакідваньне ўзбраення ў Сірыю напрыканцы верасьня 2015 году.

Скрыншот публікацыі з заявай прэм’ера Турцыі

Зь 5 кастрычніка, пасьля таго як стала вядома, што ахвярамі расейскіх ракетна-бомбавых удараў сталі мірныя сірыйскія жыхары, сярод якіх былі дзеці, InformNapalm распачаў ультыматыўную акцыю ў выяўленьні і публікацыі дадзеных расейскіх вайсковых пілётаў, якія зьдзяйсьняюць вайсковыя злачынства ў Сірыі.

Нашы высновы былі таксама пацьверджаныя праз заявы шэрагу афіцыйных асобаў, напрыклад, 7 кастрычніка прэм’ер-міністр Турцыі Ахмет Давутаглу падкрэсьліў, што толькі два з 57 удараў расейскай вайсковай авіяцыі ў Сірыі былі зьдзейсьненыя па пазыцыях баявікоў “Ісламскае Дзяржавы”.
Нагадаем, што Рэлігійныя лідэры Савудаўскае Арабіі, а таксама ўсе паўстанцкія групы Сірыі абвесьцілі Джыхад Расеі і заклікалі ўсіх мусульманаў далучыцца да яго. У гэты ж час спэкулятыўныя заявы вайсковага кіраўніцтва Расеі, што тыя, хто выступае супроць расейскай апэрацыі-прыкрыцьця, якая задэкляраваная як барацьба з баявікамі “Ісламскае Дзяржавы”, зьяўляюцца прыхільнікамі тэрарыстаў, – не вытрымлівае аніякае крытыкі.

Напрыклад, савудаўская авіяцыя таксама ўдзельнічае ў барацьбе супроць “Ісламскае Дзяржавы” (ІД) і, паводле савудаўскіх законаў, любы, хто падтрымлівае ІД можа быць засуджаны на працяглы тэрмін увязьненьня.

Цікава тое, што, як паведамляе MK.ru, на ультыматум InformNapalm адрэагаваў прэс-сакратар прэзыдэнта Расеі Дзьмітры Пяскоў, які назваў “варожай пазыцыяй” у адносінах да Расеі і да расейскіх вайскоўцаў зьяўленьне ўкраінскіх сайтаў з дадзенымі на пілётаў Паветрана-касьмічных сілаў РФ, якія ўдзельнічаюць у апэрацыі ў Сірыі. Паводле словаў Пяскова, “расейскія спэцслужбы ўсё гэта адсочваюць і будуць прымаць усе неабходныя захады для забесьпячэньня бясьпекі расейскіх вайскоўцаў”.

Як адсочваюць публікацыі нашае валянтэрскае групы расейскія спэцслужбы, мы назіраем паводле запытаў да сэрвэраў InformNapalm.org. Напрыклад, ФСБ РФ зьдзяйсьняе сталае  пінгаваньне RSS-абнаўленьняў нашага сайту, таксама, час ад часу, наведвае публікацыі рэсурсу на замежных мовах, уключаючы і арабскую.

Поўны скрыншот зваротаў ФСБ РФ да сайту informnapalm.org за астатні тыдзень глядзіце ў спасылцы.

Зазначым, што пагрозы на адрэсу групы InformNapalm, а таксама заявы расейскіх камэнтатараў, нібы публікацыя прозьвішчаў і дадзеных вайсковых пілётаў – гэта “дапамога ІД”, зьяўляюцца  спробаю дыскрэдытацыі валянтэрскае супольнасьці. На цяперашні момант InformNapalm публікуе досыць вялікі абсяг дадзеных што да палётаў баявое авіяцыі РФ у Сірыі, якія атрыманыя як з адкрытых крыніцаў, гэтак і праз інсайдэраў, у тым ліку і ад расейскіх карэспандэнтаў.

Валянтэры InformNapalm правялі шэраг кансультатыўных сустрэчаў з замежнымі экспэртамі Савудаўскае Арабіі і краінаў ЭЗ, на якіх прынятае рашэньне не надаваць агалоску пра дадзеныя пілётаў, якія насамрэч зьдзяйсьняюць удары па групоўках “Ісламскае Дзяржавы”, але дадзеныя вайсковых злачынцаў, якія бамбуюць мірных сірыйскіх жыхароў і ўмераную сірыйскую апазыцыю будуць апублікаваныя паўсюдна.

Напрыклад, мы працягваем захоўваць дадзеныя экіпажу Су-34 бартавы нумар 22 (чырвоны) 47-га зьмяшанага авіяцыйнага палку, які сапраўды зьдзяйсьняў удары карэктаванымі бомбамі КАБ-500С па групоўках “ІД” у раёне гораду Рака (відэарэпартаж RT). Але, як толькі гэты экіпаж будзе заўважаны ў вайсковых злачынствах супроць сірыйскага народу, мы выкладзем іхныя дадзеныя ў Сеціве.

Пераклаў на беларускую мову – Дзяніс Івашын

(с) Матар’ял падрыхтавала міжнародная валянтэрская каманда InformNapalm.