Міжнародная валянтэрская супольнасьць InformNapalm працягвае маніторынг мілітарызацыі Расеі й будаўніцтва ёю новых вайсковых аб’ектаў, а таксама стварэньня вайсковай групоўкі сілаў уздоўж мяжы з Украінай і Беларусьсю. 4 траўня 2016 г. міністар абароны РФ Сяргей Шайгу заявіў, што “тры новыя дывізыі будуць створаныя для супрацьдзеяньня нарошчваньню сілаў NATO ля расейскіх межаў”. Характэрна, што ані Украіна, ані Беларусь не зьяўляюцца чальцамі гэтага паўночнаатлянтычнага альянсу. Больш за тое, Украіна, у якой ужо больш за два гады працягваецца расейская вайсковая агрэсія і акупаванае каля 7% тэрыторыі краіны, зьдзяйсьняе ў вайсковай сфэры выключна абарончыя захады й выбудоўвае ўздоўж мяжы з агрэсарам лінію эшалёнаванае абароны. Беларусь жа зьвязаная з Расеяй усімі магчымымі  вайсковымі хаўрусамі й дамовамі, і нават уваходзіць зь ёю ў адзіную рэгіянальную групоўку войскаў і адзіную сыстэму супрацьпаветранае абароны. На гэтым фоне словы міністра абароны краіны-агрэсара гучаць вельмі недарэчна й цынічна.

У гэты момант адбываецца актыўнае будаўніцтва вайсковых базаў у г.Навачаркаску і п.Кадамаўскім Растоўскае вобласьці, дзе будзе разьмешчаная 159-я мотастралковая дывізыя; у г.Багучар Варонежскае вобласьці, дзе фармуецца 10-я танкавая дывізыя; у н.п.Валуйкі Белгарадзкае вобласьці практычна створаная вайсковая база 23-й мотастралковай брыгады; у г.Клінцы Бранскае вобласьці ствараецца вайсковая база, на якую перакідваюцца падразьдзяленьні 28-й мотастралковай брыгады. Мілітарысцкія падрыхтоўкі закранулі цяпер і г. Ельня Смаленскае вобласьці.

Паводле наяўных дадзеных, у Ельні аднаўляецца 144-я мотастралковая дывізыя, у якой да лета 2017 году мае быць больш за 6000 вайскоўцаў, сярод якіх прыблізна 3600 чалавек – афіцэры й кантрактнікі. У дывізію, меркавана, увойдуць тры мотастралковыя палкі, адзін танкавы, самаходны артылерыйскі й зэнітна-ракетны палкі, а таксама падразьдзяленьні забесьпячэньня.

13 ліпеня 2016 г. зафіксаванае прыбыцьцё першага эшалёну з вайсковай тэхнікай і падразьдзяленьнямі 28-й АМСБр зь Екатэрынбурга, вайскоўцы якой будуць займацца непасрэдным разгортваньнем новай вайсковай базы.

(с) 1-smol.ru

Паводле паведамленьня мясцовай раённай газэты «Знамя» (рас.), сёлета на мейсца дысьлякацыі прыбудуць два батальёны з 400 вайскоўцамі ў кожным. Характэрна, што падразьдзяленьні 28-й АМСБр перакідваюцца таксама і ў г.Клінцы Бранскае вобласьці.

У гэты момант вайскоўцы будуюць намётавае мястэчка й уладкоўваюць мейсца дысьлякацыі.

Вядома, што Ельнінская дывізыя ўвойдзе ў склад 1-й гвардзейскай танкавай арміі разам з Таманскай мотастралковай і Кантэміраўскай танкавай дывізыямі, якая ў выніку будзе мець значны ўдарны патэнцыял.

У 2017 г. у Ельню будуць перадысьлякаваныя два палкі, колькасьць вайскоўцаў якіх будзе 2200 і 2800 чалавек адпаведна. Для прыблізна 2500 жаўнераў тэрміновае службы заплянаваная пабудова 12 модульных казармаў і страўні. Тэрмін, які камандаваньне вызначыла для гэтага будаўніцтва, не перавышае 6 месяцаў. Таксама, непадалёк мейсца дысьлякацыі ў Ельні, прадугледжаная арганізацыя новага танкавага палігону.

Варта зазначыць, што новая дывізыя ў Ельні знаходзіцца на аднолькавай адлегласьці як ад Віцебска, гэтак і ад Магілева, усяго за 200 км.

(c) Google Maps

Падчас выведкі адкрытых крыніцаў была выяўленая вельмі цікавая дэталь: выбарчая камісыя Смаленскае вобласьці ў правядзеньні выбараў у Дзярждуму РФ мае намер стварыць пад Ельняй часовую выбарчую дзяльніцу. Правядзеньне выбараў, як вядома, заплянаванае на 18 верасьня 2016 году. Зыходзячы з гэтага факту, можна меркаваць, што значны кантынгент вайскоўцаў, для якіх неабходнае стварэньне асобнае выбарчае дзяльніцы, будзе перадысьлякаваны ў Ельню ўжо ў жніўні 2016 г.

Ніжэй падаем спадарожнікавы здымак сэрвісу «Яндэкс.Мапы» зь мейсцам дысьлякацыі новай мотастралковай дывізыі. На фота зафіксаваная тэрыторыя вайсковай базы, а таксама мікрараён Ельні «Кутузаўскі», у якім пэўны час будзе знаходзіцца частка прыбылых вайскоўцаў, перадусім, афіцэраў.

Таксама зазначым, што дывізыя ў Ельні, як і брыгада ў Клінцах, фармуецца на базе падразьдзяленьняў 28-й АМСБр зь Екатэрынбурга, якая мае значны баявой досьвед, атрыманы падчас вайсковай агрэсіі супроць Украіны й Сірыі. Мейсца ейнае дысьлякацыі ў Смаленскае вобласьці сьведчыць пра абсалютную прыярытэтнасьць беларускага напрамку. Разам з мотастралковай брыгадай ў Клінцах, якая знаходзіцца за 90 км ад Гомлі, новая дывізыя ў Ельні будзе мець значны ўдарны патэнцыял для зьдзяйсьненьня апэрацыяў падчас мажлівай гібрыднай вайны ва Усходняй Беларусі. Можна сьмела выказаць здагадку, што створаныя новыя вайсковыя базы будуць напоўніцу выкарыстоўваць і спэцпадразьдзяленьні ГРУ Генштаба Збройных сілаў РФ, якія пад прыкрыцьцём дысьлякаваных на іх мотастралковых частак, будуць зьздяйсьняць апэрацыі для дэстабілізацыі сытуацыі ў Рэспубліцы Беларусь у выпадку задзейнічаньня любога з сцэнароў анэксіі дзяржавы. Адсутнасьць памежнага кантролю, а таксама значных вайсковых сілау ўздоўж мяжы з Расеяй, істотна спрыяе падобнаму разьвіцьцю падзеяў.

Калі правесьці гістарычныя паралелі між Расіяй і Беларусьсю з хаўрусам Нямеччыны й Італіі падчас Другой усясьветнай вайны, то не выпадае сумнявацца, што ў разе патрэбы, Расея, таксама, як калісьці і Нямеччына, акупуе тэрыторыю свайго ўчорашняга хаўрусьніка, улічваючы, што абарону сваіх так званых «нацыянальных інтарэсаў» яна традыцыйна зьздяйсьняе вайсковым чынам на тэрыторыі іншых дзяржаваў.

Мы будзем і далей сачыць за разьвіцьцём сытуацыі і інфармаваць грамадзкасьць пра рэальныя пагрозы нацыянальнай бяспецы Украіны й Беларусі. Гэта адная з нашых асноўных задачаў і мэтаў. Задачай жа палітычнай эліты Беларусі на гэтым этапе мае быць зьдзяйсьненьне захадаў што да ўзмацненьня сыстэмы нацыянальнай бясьпекі дзяржавы: замяшчэньня вайсковага камандаваньня на выпускнікоў беларускіх вышэйшых вайсковых навучальных установаў, увядзеньне памежнага кантролю з РФ і значнае падвышэньне абароназдольнасьці арміі на ўсходнім напрамку.

Матар’ял да публікацыі падрыхтаваў рэдактар беларускае службы міжнароднае супольнасьці InformNapalm Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.