Выяўленыя жаўнеры тэрміновае службы 19-й АМСБр ЗС РФ, якія нядаўна вярнуліся з так званай украінскай камандыроўкі.
Яшчэ ўвесну 2014 году паралельна з вераломнай апэрацыяй захопу Крыма Расейская Фэдэрацыя пачала разгортваць магутную ўдарную групоўку ў памежных з Украінай раёнах Растоўскае вобласьці. Асноўнымі мейсцамі базаваньня расейскіх войскаў у Растоўскае вобласьці былі й да гэтага часу зьяўляюцца палігоны Кузьмінскі й Кадамаўскі, а таксама навакольле г. Мілерава.
Нагадваем, што яшчэ ўвосень 2014 году міжнародная выведвальная супольнасьць InformNapalm апублікавала сьпіс расейскіх падразьдзяленьняў, якія ўдзельнічалі ва ўварваньні ва Украіну: гл. Ідэнтыфікацыя сілаў уварваньня ЗС РФ. Падразьдзяленьні і іхныя страты на тэрыторыі Украіны.
Апроч гэтых базавых лягероў, прызначаных для канцэнтрацыі сілаў уварваньня, больш дробныя так званыя перавалачныя базы разгорнутыя ўздоўж усяе лініі дзяржаўнае мяжы з Украінай. Менавіта гэтыя перавалачныя пункты, якія знаходзяцца непасрэдна ля мяжы, прызначаныя для часовага прыёму і далейшага перакідваньня на «мяцежны» Данбас (і назад) асабовага складу, узбраеньня й баявой тэхнікі расейскіх акупацыйных сілаў.
У выніках OSINT-выведкі ў профілі вайскоўца 19-й асобнай мотастралковай брыгады (в/ч 20634, дысьлякацыя – г. Грозны, Паўночная Асэтыя) Паўднёвае вайсковае акругі Вячаслава Бабенкі (архівы профілю, фотаальбому, кантактаў) быў выяўлены фатаздымак з геаграфічнай лякацыяй у Куйбышаўскім раёне Растоўскае вобласьці, выкладзены 14 лютага 2017 году. Дакладнае мейсца геалякацыі – прыблізна за 7 км ад украінскае мяжы, навакольле так званага Куйбышаўскага лесу ля населенага пункту Зарэчны, у якім маецца дарога, што вядзе ў бок Украіны, на Марынаўку.
У фота з геалякацыяй «Куйбышаўскі раён» на левых дзьвярох зафіксаванага тэнтаванага КамАЗа можна выразна пабачыць тактычны знак 19-й АМСБр. Два вайскоўцы апранутыя ў камуфляваную форму «флора», якая ўжо некалькі гадоў выведзеная з забесьпячэньня расейскай арміі. Форма гэтага тыпу разам з формай «горка» сталася асноўным адзеньнем «мяцежных шахтароў», ці больш дакладна – формай расейскага акупацыйнага кантынгенту на Усходзе Украіны.
Досыць характэрнымі ёсьць і іншыя фатаздымкі нашае крыніцы: Бабенка ня толькі пазуе ў той жа форме «флора», але й шчыруе ў камэнтарох. Да фатаздымку, выкладзенага таксама 14 лютага, маецца камэнтар расейскага жаўнера (падаем тут і далей у арыгінале): «Едем с Украины на Кавказ!!!». Да аднаго з здымкаў, выкладзенага ў сьнежні 2016 году з геалякацыяй ва Уладзікаўказе, маецца камэнтар «Командировочка!!!». У іншых фота з гэтай жа сэрыі можна пабачыць і іншых расейскіх вайскоўцаў 19-й АМСБр, апранутых у форму «флора».
Магчыма, скептыкі скажуць, што ўсе пададзеныя вышэй сьведчаньні ўскосныя, але з улікам атрыманага досьведу выведнікам InformNapalm гэтага цалкам дастаткова, каб канстатаваць факт чарговае кароткатэрміновае «растоўска-ўкраінскае камандыроўкі» вайскоўцаў 19-й асобнай мотастралковай брыгады. Да таго ж, вайскоўцаў гэтага злучэньня з Уладзікаўказа мы ўжо фіксавалі на Данбасе, у тым ліку ў складзе незаконнага збройнага фармаваньня «Самалі».
Варта зьвярнуць увагу на яшчэ адную важную дэталь: фігурант і крыніца выкрыцьця В. Бабенка зьяўляецца жаўнерам тэрміновае службы рэкрутаваньня з восені 2016 году, але не вайскоўцам паводле кантракту, якіх мы так часта фіксуем ва «ўкраінскіх камандыроўках».
З усяго пададзенага вышэй вынікае, што расейскае вайсковае камандаваньне застасоўвае на Данбасе апроч жаўнераў-кантрактнікаў жаўнераў тэрміновае службы. Камандыроўка В. Бабенкі ня ёсьць такою працяглаю ў параўнаньні з той, якую праходзяць жаўнеры кантрактнае службы (6 месяцаў) у складзе незаконных збройных фармаваньняў «Л/ДНР». Факт кароткатэрміновае «ўкраінскае камандыроўкі» рэкрутаў (верагодная задача – лягістычнае забесьпячэннье БТГр 19-й АМСБр) сьведчыць пра недахоп кантрактнікаў і іхную “цякучку” ў расейскай арміі, пра што мы зазначалі раней (гл. Агляд агульнай сытуацыі і настрояў у Збройных сілах РФ).
Склад і ўзбраеньне 19-й АМСБр
19-я АМСБр фігуруе ў шасьці OSINT-расьледаваньнях InformNapalm. Гэтыя публікацыі зьвязаныя з фактамі ўварваньня ва Украіну ўлетку-ўвосень 2014 году, а таксама доказамі больш позьняга ўдзелу кантрактнікаў гэтае брыгады ў вайне на Данбасе:
Баявыя разьлікі РСЗВ «Град» 19-й МСБр, якія «партызаняць» у лясох уздоўж мяжы з Украінай
САУ «Мста-С» 19-й МСБр з Паўночнае Асэтыі на мяжы з Украінай
Пра прыгоды роты БПЛА 19-й мотастралковай брыгады ва Украіне
Вайскоўцы роты снайпэраў 19-й АМСБр ЗС РФ у шэрагах НЗФ «Самалі»
Курс на агрэсію: у структуры АМСБр ЗС РФ створаныя новыя выведвальныя дэсантныя роты
Ідэнтыфікацыя вайсковых злачынцаў з 19-й АМСБр ЗС РФ
Матар’ял да публікацыі падрыхтаваў на падставе ўласнага OSINT-расьледаваньня Іраклі Камахідзэ.
Пераклаў на беларускую мову Дзяніс Івашын.
(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.
Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.
Прочитайте нову книгу "Донбас у вогні". Це керівництво буде корисно для журналістів, дослідників, військових експертів, дипломатів та всіх, хто збирає інформацію про війну на Донбасі.
Падчас вышкалаў «Захад-2017» расейскі Ка-52 выпусьціў тры ракеты і пашкодзіў машыну кіраваньня комплексу «Леер-3»
Дзяніс Івашын: Беларусь – гэта лайт-вэрсія ДНР. Гарачы камэнтар тэлеканалу Белсат
Кантракт у баявікі “наваросіі” аформлены ў Валгаградзкім ваенкамаце
Усход – справа тонкая: 29 вайскоўцаў з 291-й артбрыгады ЗС РФ у Сірыі
22-я брыгада СпН ГРУ РФ. Два мэдалі за Данбас і адпачынак у Нікарагуа