Гібрыдная спэцапэрацыя РФ та РБ: канал перакідваньня уцекачоў з Сырыі ў Беларусь і патруляваньне межаў РБ расейскімі ядравымі бамбавікамі Ту-22М3

Валянтэры міжнароднай выведвальнай супольнасьці InformNapalm зьвярнулі ўвагу на тое, што за апошнія 7 дзён, прыватная сырыйская авіякампанія Cham Wings Airlines зьдзейсьніла 4 наўпроставых рэйсы з сырыйскага міжнароднага аэрапорту Дамаска ў аэрапорт беларускага Менску. А самая вялікая актыўнасць пералётаў назіралася 7 лістапада. І ўжо 8 лістапада адбылося беспрэцэдэнтнае абвастрэньне сытуацыі на польска-беларускай мяжы, калі вялікая група мігрантаў у суправаджэньні беларускіх сілавікоў зьдзейсьніла некалькі спробаў штурму мяжы Польшчы. Правакацыі на мяжы працягваюцца дагэтуль.

Відавочна, што такая высокая актыўнасць пералётаў можа быць зьвязаная з масавым перавозам нелегальных мігрантаў з Блізкага Усходу ў Беларусь, якіх Крэмль рукамі дыктатара Аляксандра Лукашэнкі выкарыстоўвае для гібрыднай апэрацыі супроць краінаў НАТА, у прыватнасьці Польшчы і Летувы.

Паводле дадзеных сэрвісу Flightradar24 можна ўбачыць, што лятакі кампаніі Cham Wings Airlines з нумарамі  YK-BAG і  YK-BAB зьдзейсьнілі па 2 рэйсы ў Менск за пэрыяд з 5 па 10 лістапада.

Чаму менавіта сырыйская авіякампанія Cham Wings Airlines можа быць часткай гібрыднай спэцапэрацыі спэцслужбаў Расейскай Федэрацыі і Рэспублікі Беларусь? Адказ на гэтае пытаньне мажліва знойдзены ў адкрытых крыніцах. Вядома, што гэтая авіякампанія з 2016 году знаходзіцца пад санкцыямі ЗША за ўдзел у перакідваньні зброі і баевікоў для сырыйскага дыктатара Башара Асада. А ў 2021 годзе Украіна таксама ўвяла свае санкцыі супроць Cham Wings Airlines. Паводле дадзеных сродкаў масавай інфармацыі, лятакі авіякампаніі ажыцяўлялі забароненыя авіярэйсы ў акупаваны Крым, а таксама выкарыстоўваліся, каб перакінуць з Растова-на-Доне ў Сырыю наёмнікаў вядомай расейскай проксі-групы «ПВК Вагнэра».

Чытайце таксама справаздача InformNapalm пра ролю расейскага ПВК у збройных канфліктах.

Вядома, гэта далёка не адзіны спосаб дастаўкі ўцекачоў з Блізкага Усходу да межаў Польшчы і Летувы. Цікава, што напярэдадні актыўнай фазы гэтай гібрыднай спэцапэрацыі 4 лістапада 2021 Уладзімір Пуцін і Аляксандар Лукашэнка падпісалі так званы «Дэкрэт Саюзнай Дзяржавы», які зьмяшчае 28 праграм, сярод якіх ёсьць і канцэпцыя абароннага і міграцыйнага супрацоўніцтва паміж РФ і Рэспублікай Беларусь.

Гібрыдная вайсковая апэрацыя і ТУ-22M3 ў Сырыі і Беларусі

10 лістапада МА Рэспублікі Беларусь распаўсюдзіла паведамленьне і відэа супольнага з РФ патруляваньня ўздоўж дзяржаўнай мяжы Беларусі на заходнім і паўночна-захаднім напрамках. У патруляваньні прымалі ўдзел 2 расейскіх стратэгічных бамбавіка Ту-22M3, якія могуць несьці ядравую зброю.

Цікава, што 10 лістапада на фоне спэцапэрацыі паблізу мяжы Польшчы расейская прапаганда на ток-шоу «60 минут» настойвала, што нібыта калектыўны Захад павінен прыняць усіх уцекачоў, якія знаходзяцца на мяжы Беларусі. Прапагадысты падкрэслівалі, што гэта «наўпроставая адказнасьць Захаду, які разбамбіў дамы мірных сырыйцаў.» У кантэксьце гэтых заяваў, валянтэры міжнароднай супольнасьці InformNapalm зьвярнулі ўвагу на тое, што ў патруляваньні 10 лістапада ўдзельнічалі расейскія бамбавікі Ту-22М3 з нумарамі на борце: 22 (чырвоны), рэгістрацыйны нумар RF-95956, і 24 (чырвоны), рэгістрацыйны нумар RF-94154.

Як мінімум адзін з гэтых лятакоў разам з чальцамі экіпажу ўдзельнічаў у расейскай вайсковай апэрацыі ў Сырыі.

Міжнародныя праваабарончыя арганізацыі неаднаразова публікавалі факты, якія сьведчылі, што менавіта ПКС Расейскай Федэрацыі мэтанакіравана наносілі ўдары па цывільным насельніцтве і ратавальнікам у Сырыі, а таксама выкарыстоўвалі для бамбаваньня жылых раёнаў, забароненыя міжнародным правам некіраваныя снарады, кластарныя і нават бункерныя бомбы.

У 2016 годзе міжнародная валянтэрская супольнасьць InformNapalm збрала дадзеныя 116 афіцэраў ПКС РФ, якія ўдзельнічалі ў нанясеньні ракетных і бомбавых удараў у Сырыі. Расейкая прапаганда назвала гэтыя публікацыі “небяспечнай уцечкай сакрэтных дадзеных”.

Кантэкст

У чэрвені 2021 года міжнародная валянтэрская супольнасьць InformNapalm зьвяртала ўвагу на тое, што фармаваньне новай дывізыі РФ ля межаў Летувы ідзе заўчасна і досыць хутка. У жніўні расейскай прапаганда і прапаганда рэжыма Лукашэнкі перайшлі да актыўнай фазы інфармацыйнага забясьпечаньня гібрыдных атак на Летуву. У верасьні ў межах актыўнай фазы маштабных вайсковых манэўраў «Запад-2021» адбыліся правакацыі на мяжы Украіны і Беларусі. І ўжо на пачатку лістапада, зьявіліся новыя паведамленьні пра назапашваньне вайсковай тэхнікі РФ ў Ельні за 50 км ад мяжы Беларусі і за 200 км ад мяжы Украіны. І ўжо праз тыдзень пасля таго, як гэтыя паведамленьні зьявіліся, пачалася актыўная фаза гібрыднай апэрацыі РФ і РБ на мяжы Польшчы.

Усе гэтыя працэсы, відавочна, зьяўляюцца кампанэнтамі адной крымінальнай авантуры Крамля. Расея ўпэўнілася, што замацавала ЭЗ, і асабліва Нямеччыну, на газавай голцы «Nord Stream 2», таму дзеяньні Масквы становяцца ўсё больш падступнымі і агрэсыўнымі, хоць яны працягваюць хавацца пад маскай гібрыднай вайны. Вайскова-палітычнае паглынаньне Беларусі Расейскай Федэрацыяй імкліва працягваецца. Дыктатар Аляксандар Лукашэнка канчаткова стаўся марыянэткай Уладзіміра Пуціна.

Украіна застаецца ў фокусе расейскай агрэсыі, а пасля паглынаньня Беларусі даўжыня супольнай мяжы як пляцдарма расейскай агрэсыі значна павялічыцца. Цалкам магчыма, што ў выпадку няўдачы прарыву польскай мяжы, гібрыдную атаку ўцекачамі Масква рукамі Менску накіруе на ўкраінскі напрамак.

Пашырэньне й перадрук з спасылкаю на крыніцу вітаюцца! (Creative Commons — Attribution 4.0 International — CC BY 4.0 ) Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram і апэратыўна атрымлівайце інфармацыю пра новыя матар’ялы.