6 сакавіка 2017 году на першым канале беларускае дзяржаўнае тэлевізіі «Беларусь 1» адбыўся паказ прапагандысцкага фільму “Звонок другу” (рас.) дзеля дыскрэдытацыі й ачарненьня лідэраў пратэстнага апазыцыйнага руху, значная актывізацыя якога ў Беларусі на працягу апошніх некалькіх тыдняў зьвязаная з антыканстытуцыйным дэкрэтам №3 “О предупреждении социального иждивенчества” (рас.) і агульным пагаршэньнем сацыяльна-эканамічнага становішча. Характэрна, што трансьляцыя была зьдзейсьненая па-за планам і з зьмяненьнем сеткі вяшчаньня.

У выніку аналізу відэаматар’ялу і зьместу інтэрвію можна зрабіць выснову пра значную сьпешнасьць падчас стварэньня гэтага фільму, некампэтэнтнасьць і непрафэсіяналізм ягоных стваральнікаў. Асаблівай увагі заслугоўвае факт выкарыстаньня праслухоўваньня тэлефонных перамоваў лідэраў апазыцыі й грамадзкіх актывістаў, што наўпрост сьведчыць пра ангажаванасьць спэцслужбаў РБ у працэс стварэньня фільму.

Прапагандысцкае відэа мае відавочны антыўкраінскі характар. Калі раней беларускія дзяржаўныя сродкі масавае інфармацыі мелі пераважна нейтральную пазыцыю падчас асьвятленьня ўкраінскіх падзеяў, то цяпер яны перайшлі чырвоную лінію: з экрана адкрыта паліліся ўсе тыя патокі дэструктыўнага інфармацыйнага ўзьдзеяньня, якія да гэтага выкарыстоўвалі мэдыя-кілеры Расейскай Фэдэрацыі – НТВ, Russia Today, LifeNews, Вести.RU і інш. З моманту трансьляцыі гэтага фільму беларуская дзяржаўная тэлевізія стала зь імі ў адзін шэраг.

Беларускія дэміургі прапагандысцкага жанру паміж кадрамі нарэзкі й падтасоўкі фактаў, жахлівай хлусьні і маніпуляцыяў выкарысталі ў фільме таксама інтэрвію зь некалькімі грамадзкімі дзеячамі й палітолягамі, сярод якіх варта асобна вылучыць Уладзімера Карнілава – паводле дадзеных Цэнтра «Міратворац» – сэпаратыста й аднаго з аўтараў ідэі стварэньня тэрарыстычнага фармаваньня «Л/ДНР». Да гэтага ў 2006 годзе ён фігураваў у агітацыйным праэкце падрыхтоўкі рэфэрэндуму што да стварэньня «Данецкай фэдэратыўнай рэспублікі», якім займалася сэпаратысцкая групоўка «Данецкая Рэспубліка». Меркавана, праз свае дзеяньні, якія маюць непасрэдную пагрозу тэрытарыяльнай цэласнасьці дзяржавы, сьпешна пакінуў тэрыторыю Украіны, у гэты момант, паводле інфармацыі «Міратворца», знаходзіцца ў Галяндыі.

Таксама ў стужцы маецца інтэрвію з Канстантынам Бандарэнкам, палітолягам, кіраўніком Фонду “Украінская палітыка”, у 2010-2011 гг. намесьнікам Сяргея Цігіпкі ў партыі «Сильна Україна» і Русланам Бортнікам – дырэктарам Інстытута аналізу й мэнэджмэнту палітыкі. Паводле меркаваньня вядомага журналіста й тэлевядоўцы “Еспрессо TV” Багдана Буткевіча, Бандарэнка й Бортнік непасрэдна супрацоўнічаюць з штабам Віктара Медведчука й зьяўляюцца прыхільнікамі плянаў замірэньня з РФ любым коштам.

Апроч іх свае камэнтары далі Пятро Пятроўскі, адзін з аўтараў чарнасоценнага рэрурсу IMHOClub і фігурант пададзенага ўкраінскімі хактывістамі матар’ялу, у якім маюцца сьведчаньні ягоных замоўных публікацыяў меркавана для каманды Суркова, а таксама Гедрус Грабаўскас, каардынатар летувіскага прарасейскага руху «Віціс».

Твор беларускіх прапагандыстаў насычаны штампамі й прыёмамі іхных старэйшых расейскіх таварышаў. Праз свае неаднаразовыя паўторы вымыслаў расейскіх СМІ пра тое, што «на Майдане выстрелами в спину положили сотню людей», «Небесную Сотню расстреливали в спину свои же» яны ачарняюць памяць Герояў Майдана і з зьдзекам называюць гэта рытуальнай ахвярай.

Больш за тое, робячы экскурс у мінулае, беларускія дзяржаўныя прапагандысты прыпісваюць байцам УПА масавыя расстрэлы ў Баб’ім Яры, карныя апэрацыі ў Беларусі, а украінскім нацыяналістам – удзел у зьнішчэньні Хатыні.

Беларускія ўлады, заяўляючы пра сваю нэйтральную пазыцыю адносна расейска-ўкраінскага канфлікту й надаючы сваю пляцоўку для правядзеньня Менскага перамоўнага працэсу, насамрэч выступаюць на баку агрэсара. Бо падобнае інфармацыйна-псыхалягічнае ўзьдзеяньне, пры якім Украіне і Рэвалюцыі Годнасьці, у прыватнасьці, надаецца дэманічны й варожы вобраз, інакш як сьвядомым актам агрэсіі не назавеш.

Выбудаваная канцэпцыя, у якой Майдан зьяўляецца асноўнай прычынаю страты Крыма й вайны на Усходзе Украіны, а расейская вайсковая агрэсія не фігуруе наагул.

Мы адмыслова чакалі некалькі дзён з спадзевам пачуць афіцыйнае меркаваньне ўкраінскіх уладаў з нагоды гэтага акту інфармацыйнае агрэсіі, аднак, праз тое, што да гэтага часу не атрымалі ніякага адказу і не пабачылі аніякае рэакцыі, вымушаныя прасіць адрэагаваць на яго зьнешнепалітычнае ведамства Украіны, народных дэпутатаў і прадстаўнікоў грамадзкасьці. Просім даць сваю ацэнку арганізаваным супольным дзеяньням дзяржаўных сродкаў масавай інфармацыі і спэцслужбаў Беларусі. На афіцыйным узроўні патрабуем прыцягнуць да адказу тых, хто адкрывае новы інфармацыйны фронт Масквы супроць Украіны і спрабуе пагоршыць беларуска-ўкраінскія стасункі.

Рэдактар беларускае службы міжнароднае выведвальнае супольнасьці InformNapalm Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага й баявога супрацьстаяньня з Крамлём.

«Цемру адолее полымя / Ignis vincit tenebris» – крэда InformNapalm.