Міжнародная валянтэрская супольнасьць InformNapalm працягвае фіксаваць транспартаваньне расейскага ўзбраеньня і тэхнікі, якую пастаўляе РФ для рэжыму Башара Асада ў Сірыю.

У адной з папярэдніх публікацыяў мы ўжо падавалі доказы таго, што шлях да сухапутнай апэрацыі РФ у Сірыю пракладзены з дапамогай “сірыйскага экспрэса” праз мора. У тым жа матар’яле мы зьвярталі ўвагу на тое, што ў Сірыі зафіксаваная расейская цяжкая вагнямётная сыстэма “Сонцапёк”. Ніжэй мы падаем дадатковыя доказы таго, што РФ пастаўляе ў Сірыю боепрыпасы для ЦВС-1/ЦВС-1А.

Падчас зьдзяйсьненьня OSINT-расьледаваньня было вызначанае, што расейскі жаўнер Аляксандар Бандарэнка (14.08.1996 г.н.), якога мы зафіксавалі раней, пасьля некалькіх нязграбных спробаў схаваць інфармацыю ў сваім сацыяльным профілі, выпадкова “зьліў” дадзеныя пра сакрэтныя пастаўкі ўзбраеньня ў адкрыты доступ. Празь некалькі сэкундаў інфармацыя была выдаленая, але у кэшы Google яна засталася.

Даведка: профіль быў скрыты, а ягоны адрэса – зьмененая з https://vk.com/sasha_14081996 на https://vk.com/sanya_bondar1996 (архівы профілю: https://archive.is/YEEc0, альбому: https://archive.is/ZHjdH, кантактаў: ​​https://archive.is/hJhtQ), папярэдняя захаваная копія старой адрэсы: http://webcache.googleusercontent.com (на 13 лістапада 2015 г.). Архіў кэша: https://archive.is/zVu0I).

Агульная інфармацыя: Аляксандар Бандарэнка – жаўнер тэрміновай службы, в/ч у гэты момант высьвятляецца, як мяркуецца, гэта 108-ы гвардзейскі парашутна-дэсантны полк (108 гв. ПДП) з складу 7-й гвардзейскай дэсантна-штурмавой (горнай) дывізыі, г.Наварасійск. Але гэта ў дадзеным выпадку не галоўнае.

На адным з фатаздымкаў Аляксандра Бандарэнкі з 11 кастрычніка 2015 году можна пабачыць вялікі марскі сухагрузны транспарт (ВМСТ) «Яўза» ВМФ РФ з Мурманска, загрузка якога адбывалася ў порце Наварасійска (архіў: https://archive.is/rRawq).

З адкрытых крыніцаў вядома, што ў кастрычніку 2015 году ВМСТ «Яўза» загружаўся акурат ў Наварасійску і затым прайшоў праліў Басфор у бок Сірыі.

Актыўныю загрузку транспарту ў Наварасійску зафіксавалі блёгеры: фота выкладзенае 15 кастрычніка 2015 году (архівы: https://archive.is/rhtQO, https://archive.is/d95zM).

А тут зафіксаваны праход ВМСТ «Яўза» праз праліў Басфор 16 кастрычніка 2015 году (архіў: https://archive.is/XaMkk).

Мы ўважліва прыгледзеліся да фатаздымкаў, якія расейскі жаўнер Бандарэнка выдаліў з профілю, і выявілі штосьці цікавае.

Паводле дадзеных кэша Google, Аляксандр Бандарэнка выдаліў вельмі цікавае фота, зробленае ў труме караблю і якое дае адказ на пытаньне: дык што ж перавозіць «Яўза» ў Сірыю, апроч звычайных боепрыпасаў?

“Ацаніце прыгажосьць гульні”: у выдаленым Бандарэнкам фатаздымку мы бачым тэрмабарычныя боепрыпасы да цяжкіх вагнямётных сыстэмаў.

Мы ўжо фіксавалі ў Сірыі ЦВС «Сонцапёк» – у матар’яле “У Сірыі зафіксаваныя расейскія цяжкія вагнямётныя сыстэмы “Сонцапёк””.

Улічваючы, што ЦВС няма ва ўзбраеньні арміі Башара Асада, і жаўнеры ўрадавых войскаў ня маюць досьведу эксплюатацыі гэтай вайсковай тэхнікі, цалкам мажліва, што баявыя разьлікі вагнямётных сыстэмаў укамплектаваны расейскімі вайскоўцамі.

Для дадатковага параўнаньня падаем яшчэ адзін фатаздымак, у якім зафіксаванае, як выглядаюць боепрыпасы да цяжкой вагнямётнай сыстэмы (https://archive.is/t6JOx).

Фота для параўнаньня

Зазначым, што фатаздымак з боепрыпасамі да ЦВС у труме караблю знаходзіўся ў адкрытым доступе ў пераназваным блёгу жаўнера Бандарэнкі літаральна 2-3 сэкунды й адразу ж быў выдалены. Аднак хаваньне сьлядоў аказалася няўдалым і прыцягнула дадатковую ўвагу валянтэраў нашае супольнасьці.

Матар’ял да публікацыі падрыхтаваў Nikolay Mahno

На беларускую мову пераклаў Дзяніс Івашын

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.