Міжнародная валянтэрская група InformNapalm працягвае зьбіраць інфармацыю, зьвязаную з дзеяньнямі РФ у Сірыі. Раней мы паведамлялі, што дзякуючы сюжэтам расейскіх спэцыяльных карэспандэнтаў былі выяўленыя дадзеныя авіяцыйнай групы і расейскіх пілётаў, якія знаходзяцца ў “сірыйскай камандыроўцы” на авіябазе ў Латакіі. Нягледзячы на ​​тое, што прэзыдэнт РФ У.Пуцін 11 кастрычніка 2015 году чарговага разу заявіў, што Расея ня мае намеру ўцягвацца ў наземную апэрацыю ў гэтым рэгіёне, падзеі напрацягу апошніх дзён сьведчаць пра зусім іншае. Апроч раней апублікаваных дадзеных пра фіксацыю бронетранспартэру БТ-82А, апублікаваным у матар’яле “наварасійскі-сірыйская камандыроўка ЗС РФ“, InformNapalm задакумэнтаваў перакідваньне ў Сірыю расейскіх цяжкіх вагнямётных сыстэмаў (ЦВС).

9-10 кастрычніка 2015 году, у твітэры карыстальніка Hassan Ridha, а пазьней і на расейскіх прапагандысцкіх інтэрнэт-рэсурсах, зьявілася інфармацыя з спасылкай на сірыйскія крыніцы, якая дэманструе перавозку на цягачах “Volvo” цяжкіх вагнямётных сыстэмаў (ЦВС) «Санцапёк» ў Сірыі. Характэрна, што гэтыя ЦВС-ы маюць афарбоўку, тыповую для падобнай тэхнікі ЗС РФ, бартавыя нумары ці ж іншыя апазнавальныя знакі не зафіксаваныя.

У кантэксьце гэтых навінаў, у сеціве зьявіліся і іншыя фатаздымкі ЦВС, з афарбоўкай, прыстасаванай для маскаваньня тэхнікі ва ўмовах пустэльні, але гэта фатаздымкі ірацкіх вагнямётных сыстэмаў, якія Расея пастаўляла Багдаду ў 2014-2015 гадох.

На фоне гэтых падзеяў, у запісы wikipedia што да краінаў, якія маюць ва ўзбраеньні гэтыя расейскія сыстэмы (Азэрбайджан, Казахстан, Ірак), быў дададзены запіс і пра Сірыю, зроблены на падставе зьяўленьня апошняе навіны: “Тэрарыстаў у Сірыі будуць спальваць “Санцапёкі””, праз што гэтая пастаўка была часткова “легалізаваная” (падкрэсьлім, што запіс у wikipedia грунтуецца на неафіцыйнай інфармацыі).

З улікам таго, што ЦВС-ы для сірыйцаў зьяўляюцца ўзбраеньнем новага тыпу і яны ня маюць досьведу выкарыстаньня гэтых сыстэмаў, можна зрабіць здагадку, што баявыя разьлікі вагнямётных сыстэмаў будуць укамплектаваныя расейскімі вайскоўцамі, што выконваюць адначасова ролю інструктараў і экіпажаў разьлікаў, якія навучаюць армію Башара Асада  эксплюатацыі і баяваму выкарыстаньню гэтых сыстэмаў.

Адзначым, што каманда InformNapalm нядаўна таксама атрымала інсайдэрскую інфармацыю, паводле якой у другой палове верасьня 2015 году у вайсковай частцы 12102 (20-ы асобны полк радыяцыйнай, хімічнай і біялягічнай абароны /РХБА/ Заходняе вайсковае акругі ЗС РФ, мейсца дысьлякацыі – Ніжненоўгарадзкая вобл., пасёлак Цэнтральны) была зафіксаваная некаторая актыўнасьць, зьвязаная з падрыхтоўкай групы афіцэраў і адмыслоўцаў-кантрактнікаў, а таксама тэхнікі і ўзбраеньня, у тым ліку цяжкіх вагнямётных сыстэмаў, да перакідваньня ў Сірыю.

Пра тое, што ў 20-м палку сапраўды быў нейкі ажыятаж і падрыхтоўка, ускосна сьведчыць навіна ад МА РФ “Вагнямётчыкі ЗВА ўпершыню зьнішчылі паветраны дэсант умоўнага супраціўніка залпам з «Санцапёкаў»” з 30 верасьня 2015 году. Хаця вышкалы пазначаныя як плянавыя, у паведамленьні зазначанае:

“У Ніжненоўгарадзкай вобласьці скончыўся тактыка-спэцыяльны вышкал зь цяжкой вагнямётной ротай асобнага палку РХБА ЗВА, у якім прынялі ўдзел звыш за 100 вайскоўцаў, было задзейнічанае больш за 20 адзінак узбраеньня, у тым ліку цяжкія вагнямётныя сыстэмы ЦВС-1А «Санцапёк». Падчас вышкалу вайскоўцы ў складзе экіпажаў і баявых разьлікаў адпрацавалі дзеяньні ў маршы, зараджаньні цяжкіх вагнямётных сыстэмаў, высоўваньні на пазыцыі, разгортваньні і наводзе на аб’ект, руху падчас баявых дзеяньняў. Вагнямётчыкі выканалі пускі 220-мм некіраваных рэактыўных снарадаў з тэрмабарычнай баявой часткаю… Гэта першыя баявыя стрэльбы зь цяжкіх вагнямётных сыстэмаў з моманту фармаваньня вайсковае часткі ў сьнежні 2014 г.”

У дадатак да інсайдэрскай інфармацыі, праз вывучэньне профіляў вайскоўцаў ніжненоўгарадзкага палку РХБА ў сацсеціве “УКантакце”, атрымалася выявіць некалькі фатаздымкаў, у тым ліку – баявой машыны ЦВС-1А на тле аўтапарку вайсковай часткі, а таксама фатаздымак тэнтаванага аўтамабілю “КамАЗ” з надпісам “Абама – Чмо!“, які ёсьць у фотаальбомах шэрагу вайскоўцаў гэтае вайсковае часткі.

З улікам усяго вышэйпададзенага, напрошваецца выснова, што ўсе апошнія падрыхтоўкі, зафіксаваныя ў 20-м палку РХБА, цалкам мажліва, былі зьвязаныя з “сірыйскай камандыроўкай” вайскоўцаў гэтае вайсковае часткі. А тэхніка, якая была заўважаная ў Сірыі 9 кастрычніка 2015 году, верагодна, зьяўляецца ўзбраеньнем гэтага палку. Таксама можна небезпадстаўна выказаць здагадку, што перакінутыя ў Сірыю расейскія ЦВС “Санцапёкі”, на базе шасі танкаў Т-72, цалкам магчыма, перададуць сірыйскаму боку (бо расейская армія зьдзяйсьняе пераўзбраеньне на ЦВС-ы з шасі Т-90), але некаторы час эксплюатацыю і баявое выкарыстаньне гэтых сыстэмаў у Сірыі, будуць забясьпечваць расейскія вайскоўцы.

Заўвага: асобныя палкі РХБА ў складзе вайсковых акругаў ЗС РФ пачалі фармавацца з 2014 году. Новыя в/часткі РХБА ўжо сфармаваныя ў некаторых акругах. У Ніжнім Ноўгарадзе ЗВА гэта 20-ы полк, два палкі сфармаваныя ў Паўднёвай вайсковай акрузе (Інгушэтыя і акупаваны Крым), гэтаксама два палкі сфармаваныя і ў ЦВА, у Забайкальлі ва УВА да канца году мае сфармавацца новы полк. У штатную структуру гэтых частак РХБА ўваходзяць падразьдзяленьні вагнямётчыкаў, якія узброеныя ручнымі вагнямётамі тыпу “Чмель”, а таксама цяжкімі вагнямётнымі сыстэмамі “Бураціна” і ейнай мадэрнізаванай вэрсыяй “Санцапёк”.

Матар’ял да публікацыі падрыхтаваў Іраклі Камахідзэ

 Пераклаў на беларускую мову – Дзяніс Івашын
(с) Інфармацыя падрыхтаваная адмыслова для сайту InformNapalm.org, падчас перадруку й выкарыстаньня матар’ялу актыўная спасылка на аўтара і наш праэкт абавязковая.