Ля мяжы з Харкаўскай вобласьцю Украіны Расея тэрмінова разгарнула будаўніцтва казармаў і вайсковага гарадку, а таксама загадзя перакінула пад населены пункт Валуйкі 23-ю АМСБр. InformNapalm зьдзейсьніў уласнае расьледаваньне, якое дэманструе хаду будаўніцтва вайсковых казармаў, а таксама фіксуе мейсца “баявой варты” 23-й гвардзейскай асобнай мотастралковай брыгады, некаторыя вайскоўцы якой ужо пасьпелі пабываць на Данбасе ў складзе сілаў уварваньня гібрыднае расейскай арміі.

Напачатку верасьня 2015 году сродкі масавай інфармацыі ўскалыхнула навіна пра будаўніцтва новага вайсковага гарадку на 300 гектарах у Валуйскім раёне Белгарадзкай вобласьці за 25 км ад мяжы з Украінай. У выніку тэндэру на выкананьне праэктна-пошукавых і будаўніча-мантажных працаў першага этапу для аб’екту «Капітальнае будаўніцтва аб’ектаў вайсковага гарадку» пераможцам сталася Піцерская кампанія ТАА «Мегалайн», зь якой быў падпісаны кантракт на 3,3 млрд.руб.

Упершыню пра пачатак будаўніцтва аб’екту 9 верасьня 2015 г. паведаміў карэспандэнт Reuters, які пабачыў, як працаўнікі ўсталёўваюць мэталічны плот і пракладваюць дарогу да мейсца будоўлі ў вялікім кукурузным полі каля вёскі Салаці Валуйского раёну.

Гэта сапраўды было падобнае на пачатак будаўніцтва вайсковага гарадку. Пасьля зацьверджаньня распрацаванай падрадчыкам праэктнай дакумантацыі, першы этап прадугледжваў будаўніцтва адміністратыўна-казармавае зоны:

1. Штаб з вузлом сувязі на 328 вайскоўцаў (1 будынак)
2. Казарма на 300 чалавек (5 будынкаў)
3. Казарма на 500 чалавек (4 будынкі)
4. Навучальны корпус
5. Страўня
6. Камбінат бытавога абслугоўваньня
7. Унутрыпляцоўкавыя інжынэрныя сеткі

Тэрмін выкананьня дадзеных будаўніча-мантажных працаў у 1-м этапе паводле патрабаваньняў тэндэрнай дакумантацыі быў да 7 сьнежня 2015 г. Агульны акт прыёмкі працаў у дамове мае быць падпісаны да 29 красавіка 2016 г.

Зь верасня 2015 году на вызначаных пад будаўніцтва землях зьдзяйсьняліся сапёрныя працы, пра што мы даведаліся дзякуючы сапёру з Санкт-Пецярбурга Раману Ложкіну (спасылка на архіў профілю). Будаўніцтва насамрэч пачалося непадалёк чыгуначнага палатна, што пацьведжанае праз геалякацыю фатаздымкаў.

На фатаздымку можна пабачыць ужо знаёмы нам плот, які агароджвае будоўлю.

Напрыканцы кастрычніка 2015 году ўжо была зьдзейсьненая закладка падмурку, пра гэта сьведчыць мантаж арматуры. На фота зафіксаваны аўтамабіль меркаванага падрадчыка зь піцерскім нумарам Т062МВ 178.

Можам зазначыць, што падрадная арганізацыя ня надта сьпяшаецца будаваць гэты аб’ект. Можа быць з-за недастатковага фінансаваньня або зьмены прыярытэтаў Міністэрства абароны РФ. Пераключэньне ўвагі з украінскага канфлікту на турэцка-сірыйскі, магчыма, трохі адсунуў пляны абароннага ведамства суседняй дзяржавы.

А пакуль расейскія вайскоўцы жывуць у памежных з Украінаю палёх і ня хутка пяройдуць у новыя добраўпарадкаваныя казармы. Пацьверджаньнем гэтаму ёсьць перакідваньне напрыканцы 2015 -пачатку 2016 году ў Валуйкі жаўнераў 23-й АМСБр (г.Камлюк, Самарская вобл., в/ч 65349). Напрыклад, пра гэта сьведчаць дадзеныя пэрсанальных блёгаў расейскіх вайскоўцаў 23-й АМСБр Яўгена Чарамісіна (архівы профілю, кантактаў, альбому) і Юрыя Емяльянава (архіў інстаграм-профілю).

У прыватнасьці, у профілі Емяльянава выяўлены фатаздымак  зь геатэгам «Валуйкі» і фота з так званым «дэмбельскім жэтонам» в/ч 65349.

Больш падрабязная інфармацыя пададзеная ў блёгу Чарамісіна. Напрыклад, у яго выяўленае фота з пачкам украінскіх цыгарэтаў, якое таксама мае прывязку да Валуйкаў, або фатаздымкі (1, 2, 3, 4) з сьвяткаваньня Новага года ў гэтым жа мястэчку.

Важна зазначыць, што вайскоўцы з Самары на гэты момант дысьлякуюцца ў прадмесьці г.Валуйкі, пас.Наваказацкім, бо на тэрыторыі «навабуда» вайсковай базы пакуль наўпрост няма дзе жыць.

Пра факт таго, што Чарамісін зьяўляецца жаўнерам 23-й брыгады, сьведчыць ягонае фота з Волжскага раёну Самарскае вобласьці, выява банэра з назвай вайсковай часткі, а таксама знака 23-й АМСБр.

Такім чынам, ня выключана тое, што вайскоўцы 23-й брыгады ў будучыні ўтвораць касьцяк новай групоўкі «валуйскай» вайсковай базы: іх перакідваньне пад Белгарад цалкам укладаецца ў стратэгію пашырэньня прысутнасьці расейскіх войскаў ля мяжы з Украінай. Ну а мы ў сваю чаргу працягнем назіраць як за этапамі будаўніцтва вайсковых гарадкоў, гэтак і за перакідваньнем расейскіх сілаў на памежныя з Украінай тэрыторыі.

Падобная карціна з перакідваньнем самарскіх жаўнераў у Белгарадзкую вобласьць каманда InformNapalm фіксавала яшчэ напачатку 2015 году ў матар’ялах:

• «Расейскія жаўнеры прыехалі з Самары ў Белгарад, каб потым “на Украіну…”»
• «Сьлядамі самарскіх жаўнераў, якія прыехалі ў Белгарад. Храналёгія падзеяў».

Зазначым, што расейскія акупанты з в/ч 65349 у складзе асобных БТГ таксама неаднаразова былі зафіксаваныя ў кантэксьце ўкраінскіх камандыровак:

• «23-я АМБр арміі РФ ваявала ва Украіне. Фота летніх «подзьвігаў»
• «Бранетэхніка і асабовы склад 23-й самарскай брыгады ў складзе НЗФ «наваросіі»

Матар’ял да публікацыі падрыхтаваны на падставе ўласнага OSINT-расьледаваньня міжнароднай валянтэрскай групы InformNapalm. Аўтар расьледаваньня – Victory Krm.

На беларускую мову пераклаў Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Актыўны распаўсюд у сацсетках вітаецца!