Спэцпадразьдзяленьні «Росгвардии» адпрацоўваюць на тэрыторыі Беларусі правядзеньне навучальна-баявых апэрацыяў. Адбываецца гэта на фоне працягу ў нашай краіне масавых пратэстных акцыяў.

Паводле дадзеных інфармацыйнага рэсурсу Мінабароны РБ, на тэрыторыі Беларусі прайшоў міжведамасны турнір па стральбе з баявой зброі.

Спаборніцтвы праводзіліся сярод падразьдзяленьняў спэцыяльнага прызначэньня Беларусі й Расеі. Нагодай для іхнага правядзеньня сталася 30-годзьдзе спэцпадразьдзяленьня па барацьбе з тэрарызмам (СПБТ) МУС РБ «Алмаз».

Турнір, гаспадаром якога быў «Алмаз», праходзіў у тым ліку на тэрыторыі навучальнага цэнтру вайсковых частак Менскага гарнізону «Валаўшчына», які базуецца пад Менскам.

Нагадаем, што паводле сьведчаньняў экспэртнае супольнасьці, баец, які застрэліў 10 жніўня 2020 г. мірнага пратэстоўца Аляксандра Тарайкоўскага, можа мець наўпроставую датычнасьць акурат да СПБТ «Алмаз».

Аляксандр Тарайкоўскі за імгненьне да сьмерці ад кулі байца спэцпадразьдзяленьня, 10 жніўня 2020 г. / Associated Press

Падчас турніру адпрацоўвалася перадусім праца снайпэрскіх параў, блякаваньне й зьнішчэньне незаконных збройных фармаваньняў. Важным элемэнтам сталася стральба ў цёмны час содняў.

Вызначанае, што ад РФ у спаборніцтвах прымалі ўдзел САХР «Рысь» і 604-ы цэнтар спэцыянальнага прызначэньня «Витязь». Абодва гэтыя спэцпадразьдзяленьні паводле арґанізацыйна-штатнай структуры ўваходзяць у Фэдэральную службу войскаў нацыянальнай гвардыі («Росгвардия») МУС РФ.

Кіраўніцтва расейскага МУС часта называе менавіта атрад «Рысь» элітай паліцэйскага спэцназу РФ.

Ад беларускага боку ў турніры ўдзельнічалі дзьве армейскія групы Сілаў спэцыяльных апэрацыяў (5-я асобная брыгада СпН і 33-і асобны атрад СпН), група «А» КДБ, спэцыяльны атрад хуткага рэагаваньня (САХР) Унутраных войскаў МУС і падразьдзяленьне Дзяржаўнага памежнага камітэту, меркавана АСАМ (асобны атрад актыўных мерапрыемстваў).

Міністар МУС РБ Юры Караеў надае ганаровую грамату байцу спэцпадразьздяленьня «Рысь» «Росгвардии», кастрычнік 2020 г. / rg.ru

Прадстаўнікі спэцназу сілавых ведамстваў РБ праводзяць шчыльнае ўзаемадзеяньне з расейскімі фармаваньнямі, якія непасрэдна ўдзельнічалі ў ваеннай аґрэсіі супроць Украіны.

Вядома, што спэцпадразьдзяленьні «Росгвардии» прыцягваюцца для ўзмацненьня расейскае вайсковае прысутнасьці на часова акупаванай тэрыторыі Данецкае й Луганскае абласьцей.

Паводле інфармацыі Галоўнага ўпраўленьня выведкі (ГУВ) Мінабароны Украіны, спэцпадразьздяленьне «Рысь» мелася прыбыць ў траўні 2016 году на акупаваную тэрыторыю Луганскае вобласьці дзеля ўзмацненьня ціску на крымінальнае атачэньне кіраўніка тэрарыстычнага ўтварэньня «ЛНР» Ігара Платніцкага і для спыненьня дзейнасьці бандыцкіх груповак і захаваньня кантролю за дзеяньнямі падкантрольных Крамлю кіраўнікоў.

Баец спэцпадразьздяленьня «Рысь» «Росгвардии» / warweapons.ru

Таксама паводле выведдадзеных ГУВ МА Украіны, у межах чарговай ратацыі ў верасьні 2016 году ў раён акупаванага н.п. Ясінаватая Данецкае вобласьці з Балашыхі Маскоўскае вобласьці прыбылі падразьдзяленьні 604-га ЦСН «Витязь».

Апроч гэтага, байцы ЦСН «Витязь» актыўна ўдзельнічалі і ў спэцапэрацыі захопу ўкраінскага Крыму.

Вайскоўцы 604-га ЦСН «Витязь» / zarodinu.net

Вядома, што САХР «Рысь» прымае актыўны ўдзел у супольных вайсковых вышкалах АДКБ, якія праводзяцца на тэрыторыі краінаў-удзельніцаў.

У гэты момант на тэрыторыі Беларусі зводнае падразьдзяленьне «росгвардзейцаў» прысутнічае таксама пад выглядам удзелу ў камандна-штабных вышкалах АДКБ «Нерушимое братство 2020».

Адкрыцьцё КШВ «Нерушимое братство 2020» на палігоне «Лосвіда», 12 кастрычніка 2020 г. / dfnc.ru

Сьлед асабліва зазначыць, што пра гатоўнасьць задзейнічаць на тэрыторыі Беларусі сфармаваны рэзэрв байцоў «Росгвардии» кіраўнік Расеі Уладзімер Пуцін заявіў у жніўні пасьля праведзеных таемных перамоваў з рэжымам Лукашэнкі ў першы тыдзень масавых пратэстаў.

Відавочна гэта можа сьведчыць пра скаардынаваныя дзеяньні вышэйшага вайскова-палітычнага кіраўніцтва РБ і РФ што да намераў задушыць мірныя пратэсты ў нашай краіне сілавым чыньнікам.

Фота: warweapons.ru

Можна канстатаваць, што ў пэрыяд значнае пратэстнае актыўнасьці ў Беларусі прысутнасьць байцоў «Росгвардии» пад прыкрыцьцём удзелу ў разнастайных спаборніцтвах і вайсковых вышкалах мае на тэрыторыі нашай краіны рэгулярны характар і забясьпечваецца на ратацыйнай аснове.

Ня выключанае, што вайскоўцы спэцпадразьдзяленьняў «Росгвардии» могуць прыцягвацца на тэрыторыі Беларусі і для ўдзелу ў апэрацыях МУС РФ супроць удзельнікаў мірных пратэстаў. Таксама ня сьлед выключаць і мажлівасьць правядзеньня імі сплянавых правакацыяў ці дывэрсіяў для дэстабілізацыі грамадзка-палітычнай сытуацыі, а таксама эскалацыі супрацьстаяньня ў Беларусі.

Аддзел маніторынгу беларускае службы
міжнароднае выведвальнае супольнасьці InformNapalm.

Загалоўнае фота – soldierweapons.ru.

Пашырэньне й перадрук з спасылкаю на крыніцу вітаюцца!
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.